އާރުއޭސީއެލް ހިމެނޭ ގޮތަށް ތިން ކުންފުންޏެއްގެ މިދިޔަ އަހަރުގެ މާލީ ހިސާބުތައް ސައްހައެއް ނޫން: އޮޑިޓް

ރީޖަނަލް އެއާޕޯޓްސް ކޮމްޕެނީ (އާރުއޭސީއެލް) އާއި އެމްއައިޓީޑީސީ އާއި އައްޑޫ އެއާޕޯޓް ކުންފުނީގެ މިދިޔަ އަހަރުގެ މާލީ ހިސާބުތައް ސައްހަކަން ކަށަވަރު ނުވާ ކަމަށް އޮޑިޓްތަކުން ފެންނަ ކަމަށް ޕްރައިވަޓައިޒޭޝަން އެންޑް ކޯޕްރަޓައިޒޭޝަން ބޯޑު (ޕީސީބީ) ގެ އެނުއަލް ފައިނޭންޝަލް ރިވިއުގައި ހާމަކޮށްފި އެވެ.

އެ ރިޕޯޓުގައިވާ ގޮތުން، އެ ތިން ކުންފުނީ އޮޑިޓް ކުރީ ކްރޯ މޯލްޑިވްސް އިންނެވެ. ކުންފުނިތައް އޮޑިޓް ކުރުމަށް ދިމާވެފައިވާ އެންމެ ބޮޑު ދަތިކަމަކީ ކުންފުނިތަކުން މާލީ ހިސާބުތައް ނުދޭތީ ކަމަށް އޮޑިޓަރުން ފާހަގަކޮށްފައިވެ އެވެ.

ފައިނޭންޝަލް ރިވިއުގައިވާ ގޮތުން، މާލީ ބައެއް ހިސާބުގައި މައްސަލަތައް އުޅޭކަން ފާހަގަކުރެވޭ ހަ ކުންފުންޏެއް އެބައޮތެވެ. އެއީ ފަހި ދިރިއުޅުން ކޯޕަރޭޝަނާއި ފެނަކަ އާއި އެމްއެމްޕީއާރުސީ އާއި އެމްޓީޑީސީ އާއި އާރުޑީސީ އަދި ސްޓެލްކޯ އެވެ.

ވެމްކޯ އާއި ޕީއެސްއެމްގެ ގިނަ މައްސަލަތަކެއް ފާހަގަކުރެވިފައިވާތީ އޮޑިޓަރުގެ އޮޕީނިއަން ނުދޭން ވަނީ ނިންމައިފަ އެވެ.

މިދިޔަ އަހަރު ސަރުކާރު ހިއްސާވާ ކުންފުނިތަކަށް އާމްދަނީގެ ގޮތުގައި 53 ބިލިއަން ރުފިޔާ ލިބުނެވެ. ފައިދާގެ ގޮތުގައި 6.4 ބިލިއަން ރުފިޔާ ލިބިފައިވެ އެވެ. އެއީ ސަރުކާރު ހިއްސާވާ 30 ކުންފުނީގެ ތެރެއިން 14 ކުންފުންޏަށް ލިބުނު ފައިދާ އެވެ. ބާކީ ހުރި ކުންފުނިތަކަށް މިދިޔަ އަހަރު ވީ ގެއްލުމެވެ.