ސަރުކާރުން ގިނަ އަދަދެއްގެ ބޭސްތަކެއްގެ އަގު ކޮންޓްރޯލްކޮށްފި، 220 މިލިއަން ރުފިޔާ ސަލާމަތް ކުރެވޭނެ!

އާސަންދަ ނިޒާމަކީ ދެމެހެއްޓެނިވި ގޮތެއްގައި ފެންވަރު ރަނގަޅު ހިދުމަތް ފޯރުކޮށްދޭ ނިޒާމަކަށް ހެދުމަށްޓަކައި ކުރާ މަސައްކަތުގެ ދަށުން، އެންމެ ގިނައިން ރާއްޖޭގައި ދޫކުރާ 250 ބޭހެއްގެ އަގު އަންނަ މަހުން ފެށިގެން ކޮންޓްރޯލް ވާނެ ކަމަށް އެންސްޕާ އިން މިރޭ ބުނެފި އެވެ.

އެ އިދާރާ އިން އެޅި މި ފިޔަވަޅުތަކުގެ ސަބަބުން، ބޮޑު އަގުގައި ވިއްކަމުން އައި ބޭސްތަކުގެ އަގު ހެޔޮވެ، އާސަންދަ ސްކީމުގެ ދަށުން ބޭހަށް ކުރާ ހަރަދުން އަހަރަކު 220 މިލިއަން ރުފިޔާ ސަލާމަތް ކުރެވޭނެ ކަމަށް މިރޭ ނެރުނު އިއުލާނެއްގައި ވެ އެވެ.

އެ އިއުލާނުގައިވާ ގޮތުން، 250 ބޭހުގެ އަގަށް ބަދަލު ގެންނާނީ އެކި ފިޔަވަހިތަކަކަށް ބަހާލައިގެންނެވެ.

އެންސްޕާ އިން ބުނިގޮތުގައި، މިހާރު އަގުތައް މުރާޖައާ ކޮށްފައިވާ 87 ބޭހެއްގެ އަގަށް އަންނަ ނޮވެމްބަރު 1 އިން ފެށިގެން ބަދަލު ގެނައުމާ އެކު 126 ބޭހެއްގެ އަގަށް ނޮވެމްބަރު 24 އިން ފެށިގެން ބަދަލު ގެންނަން ވަނީ ނިންމައިފަ އެވެ. އަގު މުރާޖައާ ކުރާ ބޭހުގެ ތަފްސީލުތައް އާސަންދައިގެ ވެބްސައިޓުގައި އާންމުކުރާނެ ކަމަށް ވެސް އެންސްޕާ އިން ބުންޏެވެ.

އަގު ކޮންޓްރޯލްކުރާ ހުރިހާ ބޭހެއް ވެސް އެސްޓީއޯގެ ބޭސްފިހާރަތަކުން ލިބޭނެ ކަމަށް އެންސްޕާ އިން ބުންޏެވެ.

އެ އިދާރާ އިން ބުނީ، ބޭހުގެ އަގަށް ބަދަލުތަކެއް ގެނައި ނަމަވެސް އޭގެ ސަބަބުން އާންމުންނަށް ހިލޭ ބޭސް ލިބިދިނުމުގެ އިންތިޒާމަށް އެއްވެސް ބަދަލެއް ނާންނާނެ ކަމަށެވެ.

"މި ބަދަލާ ގުޅިގެން އާސަންދަ ސްކީމު މެދުވެރިކޮށް ރައްޔިތުންނަށް ރައްޔިތުންނަށް ހިލޭ ބޭސް ލިބިދިނުމުގެ އިންތިޒާމު އެއްވެސް ބަދަލެއް ނައިސް، މި ބޭސް ލިސްޓުގައި ހިމެނޭ ކޮންމެވެސް އެއް ބްރޭންޑެއް އެސްޓީއޯގެ ފާމަސީތައް މެދުވެރިކޮށް، އިތުރު އަގަކާ ނުލައި ލިބެން ހުންނާނެކަން ފާހަގަކުރަމެވެ،" އިއުލާނުގައި ވެ އެވެ.

އެންސްޕާ އިން ބުނިގޮތުގައި އާސަންދަ ސްކީމުގައި ރަޖިސްޓަރީ ކޮށްފައިވާ އަމިއްލަ ފާމަސީތަކުގެ ތެރެއިން މި ބޭސްތައް ވިއްކުމަށް ރަޖިސްޓަރީ ކޮށްފައިވާ ފާމަސީތައް މެދުވެރިކޮށް، އިތުރު އަގަކާ ނުލައި ބޭސް ލިބޭނެ އިންތިޒާމު ވަނީ ހަމަޖައްސައިފަ އެވެ.

އެންސްޕާ އިން ވަނީ އާސަންދަ ސްކީމު މެދުވެރިކޮށް ހިދުމަތް ހޯދުމަށް ފަހު ރަސީދު ހޯދުމަށް ވެސް އިލްތިމާސްކޮށްފަ އެވެ. ބޭސް ވިއްކަން ޖެހޭ އަގުގެ ލިސްޓާ ހިލާފަށް ބޭސް ދޫކުރާ ނަމަ އެކަން އެންސްޕާގެ "ޝިކާވަތި" ޗެޓްލައިން 7951400 އަށް ރިޕޯޓު ކުރުމަށް ވެސް ވަނީ އެދިފަ އެވެެ.

ބޭހުގެ އަގު ކޮންޓްރޯލް ކުރުމަކީ ސީދާ ރައީސް ޑރ. މުހައްމަދު މުއިއްޒުގެ ބެއްލެވުމުގެ ދަށުން އެންސްޕާ އިން ކުރަމުން އަންނަ ކަމެކެވެ. މިދިޔަ ސެޕްޓެމްބަރު މަހު އެ މަނިކުފާނު ވަނީ ރާއްޖޭގައި އާދަޔާ ހިލާފު ބޮޑު ފައިދާއެއް ލައިގެން ބޭސް ވިއްކުމުގެ މައްސަލަ ހައްލުކުރުމަށް ގާނޫނުގައި ކަނޑައަޅާފައިވާ ކަންކަން ތަންފީޒު ނުވެ އޮތް އޮތުން ނިމުމަކަށް ގެނެސް، ބޭހުގެ އަގު ކޮންޓްރޯލް ކުރުމަށް އަޅަންޖެހޭ ފިޔަވަޅުތައް އެޅުމަށް ކަމާބެހޭ އިދާރާތަކަށް އަންގަވައިފަ އެވެ.

ޑޮކްޓަރީ ބޭސް ވިއްކޭނެ އެންމެ މަތީ އަގު ކަނޑައަޅަން ވާނެ ކަމަށް ސިއްހީ ހިދުމަތް ދިނުމުގެ ގާނޫނުގައި ބުނާތީ އެކަން ތަންފީޒުކުރަން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ވެސް މަސައްކަތްކުރި އެވެ. ބޭސް ވިއްކޭނެ އެންމެ މަތީ އަގު ނުވަތަ މެކްސިމަމް ރީޓެއިލް ޕްރައިސް (އެމްއާރުޕީ) ކަނޑައަޅައި އެކަން ފެށުމަށް އެކި ތާރީހުތައް ދިން ނަމަވެސް ބޭހުގެ ވިޔަފާރީގައި އުޅޭ މީހުންގެ ޝަކުވާތަކާ ހެދި ކޮންމެ ފަހަރަކު ވެސް އެކަން ޖެހުނީ ފަސްކުރާށެވެ.

އެ މައްސަލާގައި ރައީސް މުއިއްޒު ވިދާޅުވީ ރާއްޖޭގެ ބާޒާރުގައި ބޭސް ވިއްކާ އަގުތައް ހުރީ 200 ޕަސެންޓާއި 2،000 ޕަސެންޓާ ދެމެދުގެ ފައިދާއެއް ނަގާ މިންވަރުގައި ކަމަށެވެ. އެހެންވެ، އެ ވަރުގެ ބޮޑު ފައިދާއެއް ނެގުން ހުއްޓުވުމަށް އަޅަން ޖެހޭ ފިޔަވަޅުތައް އެޅުމަށް ކަމާ ގުޅުން ހުރި ހުރިހާ މުއައްސަސާތަކަށް އަންގާފައިވާ ކަމަށް ރައީސް ކުރން ވިދާޅުވި އެވެ.

އެންމެ އަގު ބޮޑުކޮށް ބޭސް ވިއްކޭނެ އަގު ނުވަތަ އެމްއާރްޕީ ކަނޑައެޅުމަށް މީގެ ކުރިން ހެލްތު މިނިސްޓްރީން ހެދި ގަވާއިދެއްގައި އޮންނަނީ ބޭސް ވިއްކާއިރު ފައިދާގެ ގޮތުގައި އެންމެ ގިނަވެގެން ނެގޭނީ 100 ޕަސެންޓް ކަމަށެވެ.

މި ސަރަހައްދުން ބޭހަށް އެންމެ ބޮޑު ހޭދައެއް ކުރާ އެއް ގައުމަކީ ރާއްޖެ އެވެ. ދުނިޔޭގެ ސިއްހަތު ޖަމިއްޔާއިން ކުރިން ބުނި ގޮތުގައި ދެކުނު އޭޝިއާގެ ގައުމުތަކާ އަޅާބަލާއިރު ރާއްޖެއިން ބޭހަށް ކުރާ ހޭދަ 70 ޕަސެންޓް އިތުރެވެ.