ތޫފާން "ޑާނާ"ގެ ބާރުގަދަވުމުން އިންޑިއާގައި މިލިއަނަކަށް ވުރެ ގިނަ މީހުން ރައްކާތެރި ހިސާބުތަކަށް

އިންޑިއާގެ އިރުމަތީ ކަނޑު، ބޭ އޮފް ބެންގޯލްގައި މިހާރު އުފެދިފައިވާ ބާރުގަދަ ތޫފާން "ޑާނާ"ގެ ނުރައްކާތެރިކަން ބޮޑުވުމުން އިންޑިއާގައި މިލިއަނަކަށް ވުރެ ގިނަ މީހުން ރައްކާތެރި ހިސާބުތަކަށް ބަދަލުވާން ފަށައިފި އެވެ.

އިންޑިއާގެ ސަރުކާރުގެ ބައެއް އޮފިޝަލުން އޭއެފްޕީ އަށް ބުނި ގޮތުގައި، މި ތޫފާނުގެ ސަބަބުން މަދުވެގެން 1.1 މިލިއަން މީހުން ރައްކާތެރި ހިސާބުތަކަށް ބަދަލުކުރަން ޖެހޭނެ އެވެ.

އިންޑިއާގެ މޫސުމާ ބެހޭ އިދާރާ އިން ބުނީ 150 މިލިއަނަށް ވުރެ ގިނަ މީހުން ދިރިއުޅޭ ވެސްޓް ބެންގާލް އާއި އޮޑިޝާ ސްޓޭޓަށް މި ބާރުގަދަ ތޫފާން އަރާނީ މިއަދުގެ ވަގުތެއްގައި ކަމަށެވެ. އެއީ "ސިވިއާ ސައިކްލޯނިކް ސްޓޯމް" ނުވަތަ ވަރަށް ނުރައްކާތެރި އަދި ބާރުގަދަ ތޫފާނެއް ކަމަށް ވެސް އެ އިދާރާއިން ބުންޏެވެ.

މޫސުމާ ބެހޭ އިދާރާއިން ލަފާކޮށްފައިވާ ގޮތުގައި، މި ތޫފާނާ އެކު އަންނަ ވިލާގަނޑުތަކުގައި ގަޑިއަކު 120 މޭލުގެ ބާރުމިނުގައި ވައިޖެހޭނެ އެވެ. ތޫފާނާ ގުޅިގެން އިންޑިއާގެ އިރުމަތީ އައްސޭރިފަށުގެ ހިސާބުތަކަށް އާންމުކޮށް އުދައަރާ ވަރަށް ވުރެ ދެ މީޓަރު އުސްމިނުގައި ރާޅު އަރާނެ ކަމަށް ވެސް ވަނީ ލަފާކޮށްފަ އެވެ.

މި ތޫފާނާ ގުޅިގެން އެ ސަރަހައްދުތަކުގެ ވަރަށް ގިނަ އެއާޕޯޓުތައް ވެސް ބަންދުކުރަން ވަނީ ނިންމައިފަ އެވެ. އޭގެ ތެރޭގައި ވަރަށް ބާރުބޮޑު އެއާޕޯޓެއް ކަމަށްވާ ކޮލްކައްތާގެ އެއާޕޯޓު ވެސް ހިމެނެ އެވެ. މިހާރު ވެސް އެ ސިޓީއަށް ވަނީ މި ތޫފާނުގެ އަސަރުކުރަން ފަށައިފަ އެވެ.

ރިޕޯޓްތައް ބުނި ގޮތުގައި، މި ތޫފާނުގެ ބާރު އެންމެ ގަދަވާނީ މާދަމާ އެވެ. އަދި އެންމެ ބޮޑު އަސަރެއް ވެސް ކުރާނީ ކޮލްކައްތާއަށެވެ.

މި ތޫފާނުގެ އަސަރު ބަންގުލަދޭޝަށް ވެސް ކުރާނެ ކަމަށް ވަނީ ލަފާކޮށްފަ އެވެ. އެހެންވެ، އެ ގައުމުން ވެސް ވަނީ ރައްކާތެރިކަމުގެ ފިޔަވަޅުތައް އަޅަން ފަށައިފަ އެވެ.

އޮޑިޝާ ސްޓޭޓްގެ ހެލްތު މިނިސްޓަރު މުކޭޝް މަހަލިންގް އޭއެފްޕީއަށް ވިދާޅުވިި ގޮތުގައި، އެ ސްޓޭޓުގެ އައްސޭރިފަށުގައި ދިރިއުޅޭ ގާތްގަނޑަކަށް މިލިއަނެއްހާ މީހުން ވަގުތީ ހިޔާލަތަކަށް ބަދަލުކުރުމުގެ މަސައްކަތް މިހާރު އަންނަނީ ކުރަމުންނެވެ.

ވެސްޓް ބެންގާލްގެ ސްޓޭޓް ސަރުކާރުގެ މިނިސްޓަރު ބަންކިމް ޗަންދުރަ ހަޒްރާ ވިދާޅުވީ އެ ސްޓޭޓުން 100،000 އަށް ވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފައިވާ ކަމަށެވެ.

ދުނިޔޭގެ މޫސުމަށް މިހާރު އަންނަމުންދާ ނޭދެވޭ ބަދަލުތަކުގެ ސަބަބުން މި ކަހަލަ ނުރައްކާތެރި ތޫފާންތައް އުފެދޭ ވަރު ވަރަށް ބޮޑަށް އިތުރުވަމުންދާ ކަމަށް ސައިންސްވެރިން ވަނީ ތަކުރާރުކޮށް އިންޒާރު ދީފަ އެވެ.

މިދިޔަ މެއި މަހު ވެސް އިންޑިއާގެ އިރުމަތީ ކަނޑުގައި ވަނީ ނުރައްކާތެރި ތޫފާނެއް އުފެދިފަ އެވެ. ރެމަލް ކިޔާ އެ ތޫފާނުގައި އިންޑިއާއިން 48 މީހުން އަދި ބަންގަލަދޭޝް އިން 17 މީހުން މަރުވި އެވެ.