ސިޔާސީ މުވައްޒަފުންގެ މުސާރައަކީ ބަޖެޓުގެ އެއް ޕަސެންޓު: ޒަމީރު

ސިޔާސީ މުވައްޒަފުންގެ މުސާރައަކީ އެ ކަމަށް ކުރާ ޖުމްލަ ހަރަދުގެ ހަތަރު ޕަސެންޓަށް ވުރެ ވެސް ކުޑަ އަދަދެއް ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.

ރައްޔިތުންގެ މަޖިލިހުގެ މިއަދުގެ ޖަލްސާ އަށް 5.1 ބިލިއަން ރުފިޔާގެ ސަޕްލިމެންޓްރީ ބަޖެޓު ހުށަހަޅުއްވައި ދެއްވަމުން ޒަމީރު ވިދާޅުވީ، ސިޔާސީ މުވައްޒަފުންގެ މުސާރައަކީ ޖުމްލަ ބަޖެޓުގެ އެއް ޕަސެންޓު ކަމަށެވެ. އެހެންވެ، ސިޔާސީ މުވައްޒަފުންގެ މުސާރަ އަށް އަހަރު ހޭދަކުރާނީ ގާތްގަނޑަކަށް 120 މިލިއަން ރުފިޔާ އެވެ. އެއީ ކޮންމެ މަހަކު ގާތްގަނޑަކަށް 10 މިލިއަން ރުފިޔާ އެވެ. "މިހާރު" އާ ސަރުކާރުގެ އެކި އިދާރާތަކުން ހިއްސާ ކޮށްފައިވާ މައުލޫމާތުތަކަށް ބަލާއިރު، މިވަގުތު ސިޔާސީ މުވައްޒަފުންގެ އަދަދު އުޅެނީ 1،200 އިން ވުރެ މަތީގަ އެވެ.

ފިނޭންސް މިނިސްޓަރު ވިދާޅުވީ، ދައުލަތުގެ ފިސްކަލް ހަރަދުގެ ދެމެހެއްޓެނިވި ކަން ކަށަވަރު ކުރުމަށް މުހިއްމު ފިޔަވަޅުތަކެއް އަޅާ އިރު ހުރިހާ ދާއިރާއަކުން ވެސް އެފަދަ ފިޔަވަޅުތައް އަޅާނެ ކަމަށެވެ.

ރައީސް ޑރ. މުހައްމަދު މުއިއްޒު ރޭ ވަނީ ސިޔާސީ މުވައްޒަފުންނާއި ދައުލަތުގެ އިސްވެރިންނާއި ކުންފުނިތަކުގެ އިސްވެރިން އަދި ރައްޔިތުންގެ މަޖިލީހުގެ މެމްބަރުންނާއި ފަނޑިޔާރުން ވެސް ހިމެނޭ ގޮތަށް، މުސާރައިން 10 ޕަސެންޓް، ދެ އަހަރު ދުވަހުގެ މުއްދަތަށް އުނިކުރަން ހުށަހަޅަން ނިންމަވައިފަ އެވެ. ރައީސް ވަނީ އެ މަނިކުފާނުގެ މުސާރައިގެ 50 ޕަސެންޓު ނުނަގަން ވެސް ނިންމަވައިފަ އެވެ. އޭގެ އިތުރުން ސަރުކާރު ހިއްސާވާ ކުންފުނިތަކުގެ ވެރިންނަށް އެންމެ ބޮޑުކޮށް ދެވޭނީ 90،000ރ. ކަމަށް ވެސް ކަނޑައެޅުމަށް އެންގެވި އެވެ.

"ސިޔާސީ ފަރާތްތަކުގެ މުސާރަ އަށް ކުރާ ހޭދައަކީ ސަރުކާރުގެ މުޅި މުސާރަ އާއި އިނާޔަތްތަކަށް ހޭދަކުރާ މިންގަނޑުގެ ހަތަރު ޕަސެންޓަށް ވުރެ ދަށް އަދަދެއް. މުޅި ދައުލަތުގެ ހަރަދުގެ އެއް ޕަސެންޓު. މިބަދަލު ގެންނަނީ ވެސް ފިސްކަލް ދެމެހެއްޓެނިވި ކަންކަން އިޔާދަކުރުމަށް ކުރަމުންދާ މަސައްކަތްތަކުގައި ފުރިހަމައަށް ބައިވެރިވެ ކުޑަ ނަމަވެސް ފިޔަވަޅުގައި،" އޭނާ ވިދާޅުވި އެވެ.

ޒަމީރު ވިދާޅުވީ، ހަރަދުތައް ކުޑަ ކުރުމަށް ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާ ކުރުމަށް ކުންފުނިތައް ފައިދާވާ ކުންފުނިތަކަށް ހަދައި، ސަރުކާރަށް ބަރޯސާވާ މިންވަރު ކުޑަކޮށް، ކުންފުނިތަކުގެ ސްޓްރަކްޗާ ބަދަލުކޮށް، އުވާލަންޖެހޭ ކުންފުނިތައް ފާހަގަކޮށް އެ ފިޔަވަޅުތައް އަޅަމުން އަންނަ ކަމަށެވެ.

"ޕީއެސްއައިޕީ ޕައިޕްލައިން ދައުލަތުގެ މާލީ ހާލަތާއި ބައްދަލު މިންވަރަކަށް ގެނައުމަށް އަލުން ތަރުތީބު ކޮށްފައިވާއިރު، ސަރުކާރުގެ ހިންގުމުގެ ހަރަދުތައް ކުޑަކުރަން ވެސް ވަނީ ފިޔަވަޅުތަކެއް އަޅާފައި. މިގޮތުން، ދަތުރުފަތުރާއި ހަފްލާތައް ބޭއްވުން ފަދަ ކަންކަމަށް ކުރާ ހަރަދުތައް ހިފެހެއްޓުމަށް ގިނަ ކޮންޓްރޯލްތަކެއްގެ ތެރެއިން މަސައްކަތް ކުރަމުންދާއިރު، މިކަމުގެ ނަތީޖާ ދަނީ ފެންނަމުން،" އޭނާ ވިދާޅުވި އެވެ.