އުރީދޫން އެއާ އެމްބިއުލާންސަށް 16 މިލިއަން ރުފިޔާގެ ސާމާނު ހަދިޔާކޮށްފި

ގައުމީ އެއާ އެމްބިއުލާންސްގެ ހިދުމަތަށް ބޭނުންވާ 16 މިލިއަން ރުފިޔާގެ މެޑިކަލް އިކުއިޕްމަންޓް އުރީދޫއިން ހަދިޔާކޮށްފި އެވެ.

އުރީދޫން ހަދިޔާކުރި އިކުއިޕްމަންޓްތަކަކީ ދަތުރުމަތީގައި ފަރުވާ ރަނގަޅުކޮށް، ރާއްޖޭގެ އެކި ކަންކޮޅުތަކުގައި ދިމާވާ މެޑިކަލް އިމަޖެންސީ ހާލަތްތަކުގައި މިހާރަށް ވުރެ ފުރިހަމައަށް އެހީތެރިވެދިނުމަށް ބޭނުންވާނެ ހާއްސަ އިކުއިޕްމަންޓްތަކެވެ.

އެކަމަށް ބޭއްވި ރަސްމިއްޔާތުގައި، މި އިކުއިޕްމަންޓުތަކާއި ހަވާލުވެވަޑައިގަތުމަށްފަހު ހެލްތު މިނިސްޓަރު އަބްދުﷲ ނާޒިމް ވިދާޅުވީ މި އިކުއިޕްމަންޓުތަކަކީ މިހާރަށް ވުރެ ފުރިހަމައަށް ހިދުމަތްތައް ދިނުމުގައި ބޭނުންތެރި ތަކެތި ކަމަށެވެ. އަދި ސީއެސްއާރުގެ ދަށުން އާއްމުންނަށް ބޭނުންވެފައިވާ މިފަދަ މަސައްކަތްތައް ވިޔަފާރިތަކަށް ކުރެވޭނެކަން އުރީދޫގެ ސަބަބުން ހާމަވާ ކަމަށް އޭނާ ވިދާޅުވި އެވެ.

"ކޯޕަރޭޓް ސޯޝަލް ރެސްޕޮންސިބިލިޓީގެ ގޯލްޑް ސްޓޭންޑަޑެއް ތިޔަ ބޭފުޅުން ކަނޑައަޅުއްވައިފި. އަޅުގަނޑުމެން އުންމީދު ކުރަނީ، އެހެން ފަރާތްތަކުން ވެސް މުޖުތަމައުގެ ފައިދާއަށް މަސައްކަތް ކުރުމުގައި ތިޔަ ބޭފުޅުން ތިދެއްކެވި ނަމޫނާ ބެއްލެވުން." މިނިސްޓަރު ވިދާޅުވި އެވެ.

އުރީދޫގެ ސީއީއޯ ހާލިދް އަލް ހަމާދީ ވިދާޅުވީ ސިއްހީ ހިދުމަތަކީ އަސާސީ ހައްގަކަށް ވާއިރު، އާއްމުންގެ ފުރާނަ ސަލާމަތް ކުރުމުގައި މުހިންމު ދައުރެއް އަދާކުރާ އެއާ އެމްބިއުލަންސްގެ ހިދުމަތް ފުޅާކުރުމަށް ސަރުކާރާ ގުޅިގެން މަސައްކަތް ކުރުމަކީ އެ ކުންފުންޏަށް ލިބޭ ފަހުރެއް ކަމަށެވެ.

"އަޅުގަނޑުމެންގެ ފަރާތުން ގާތްގަނޑަކަށް 16 މިލިއަން ރުފިޔާގެ މި އިންވެސްޓްމަންޓަކީ ވަކި ސަރަހައްދަކަށް ބެލުމެއްނެތި، ކޮންމެ މީހަކަށްވެސް ބޭނުންވެއްޖެ ހިނދެއްގައި ކްރިޓިކަލް ކެއާ ލިބޭނެ އިންތިޒާމު ހަމަޖެހޭނެ ކަމެއް. އަޅުގަނޑުމެން އެންމެން ގުޅިގެން، އަޅުގަނޑުމެންގެ މުޖުތަމައުތަކާ އެއްބައިވެގެން ސިއްހީ ހިދުމަތް ކުރިއެރުވުމަށް މަގުފަހިކޮށްދީ، އަދި މިފަދަ ހައްލެއް އެންމެ ބޭނުން ޖެހިފައިވާ ދާއިރާއަށް އިންވެސްޓްކޮށްގެން ދުޅަހެޔޮ އަދި ހަރުދަނާ ގައުމެއް ބިނާކުރުމަކީ އަޅުގަނޑުމެން އަހައްމިއްޔަތުކަން ދޭ ކަމެއް." އޭނާ ވިދާޅުވި އެވެ.

މިދިޔަ މާޗު މަހު ފެށި އެއާ އެމްބިއުލަންސްގެ ހިދުމަތް ފެށުމަށް ވެސް އުރީދޫން ވަނީ އެހީތެރިކަން ފޯރުކޮށްދީފަ އެވެ. އެއާ އެމްބިއުލާންސްގެ ހިދުމަތް ފެށުނީއްސުރެ މިހާތަނަށް 436 ކޭސް ގައި، 517 ޕޭޝަންޓުންނަށް ވަގުތުން ބޭނުންވާ ފަރުވާ ހޯދުމަށް ވަނީ ދަތުރުތައް ކޮށްފަ އެވެ.

އުރީދޫއިން ރާއްޖޭގެ ސިއްހީ ދާއިރާއަށް އެހީތެރިކަން ފޯރުކޮށްދެމުން ދަނީ ކުންފުނީގެ ސީއެސްއާރުގެ ދަށުންނެވެ.