ދަރުމަވަންތަ ސްކޫލުގައި ކުދިން ކިޔަވަން ތިއްބާ ފަންކާއެއް ވެއްޓިއްޖެ

އަލަށް އިމާރާތްކޮށް މިދިޔަ އަހަރުގެ އޮގަސްޓް މަހު ބޭނުންކުރަން ފެށި ދަރުމަވަންތަ ސްކޫލުގެ އާ އިމާރާތުގެ ކްލާސްރޫމެއްގައި ކުދިން ކިޔަވަން ތިއްބާ އިއްޔެ ފަންކާއެއް ވެއްޓިއްޖެ އެވެ.

ސްކޫލުގެ ބެލެނިވެރިއަކު ބުނީ ގްރޭޑް 4 ގެ ކުދިން ކްލާހުގައި ކިޔަވަން ތިއްބާ ފަންކާއެއް ވެއްޓުނީ އެ ކުދިންގެ ޑެސްކު މައްޗަށް ކަމަށެވެ. މި ހާދިސާގައި އެއްވެސް ކުއްޖަކަށް އަނިޔާއެއް ނުވާ ކަމަށް އެ ބެލެނިވެރިޔާ ބުންޏެވެ.

އެކަމާ ގުޅޭ ގޮތުން "މިހާރު" އިން މިއަދު ސުވާލު ކުރުމުން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވީ ފަންކާއެއް ވެއްޓުމުގެ ހާދިސާއެއް އިއްޔެ ހިނގި ކަމަށާއި އެފަދަ ކަންކަން ސިއްރު ނުކޮށް އެންގުމަކީ މުހިންމު ކަމަކަށް ވާތީ ބެލެނިވެރިންނާ އެކަން ހިއްސާ ކޮށްފައިވާ ކަމަށެވެ.

މިނިސްޓްރީން އިއްޔެ އެ ސްކޫލަށް ގޮސް ހުރިހާ ކްލާސްރޫމެއްގެ ފަންކާތައް ރަނގަޅުތޯ ބެލި ކަމަށާއި އެއްވެސް މައްސަލައެއް ނެތް ކަމަށް މިނިސްޓަރު ވިދާޅުވި އެވެ.

އެ ސްކޫލުގެ ކުޑަދޮރުތަކުގައި ޖަހާފައިހުރި ބިއްލޫރިތައް ތަޅައިގެންދާ މައްސަލައެއް ވެސް މިދިޔަ އަހަރުގެ ޑިސެމްބަރު މަހު ފާހަގަވި އެވެ. އޭރު މިނިސްޓަރު ވިދާޅުވީ ފިޔަވަހިތަކަށް ބަހާލައިގެން އެ ހުރިހާ ދޮރެއް ބަދަލުކުރާނެ ކަމަށެވެ.

ވިލާ ކޮލެޖު ކުރިމަތީގައި އޮންނަ ބިމުގައި ދަރުމަވަންތައިގެ އާ އިމާރާތް ހަދަން އެޑިއުކޭޝަން މިނިސްޓްރީން ފެބްރުއަރީ 4، 2020 ގައި ހަވާލުކުރީ އެސްޖޭ ކޮންސްޓްރަކްޝަން ކުންފުންޏާ އެވެ.

އެ މަޝްރޫއު ފުރަތަމަ ހަވާލުކުރީ 74.9 މިލިއަން ރުފިޔާ އަށް އެއް އަހަރުގެ ތެރޭގައި ނިންމާ ގޮތަށެވެ. ނަމަވެސް، މުއްދަތަށް މަސައްކަތް ނުނިމުމުން މުއްދަތު އިތުރުކޮށް، އެ ކުންފުންޏަށް އިތުރު 20 މިލިއަން ރުފިޔާއާ އެކު، 94 މިލިއަނަށް ވުރެ ގިނަ ރުފިޔާ ވަނީ އޭރު ދީފަ އެވެ.

ދަރުމަވަންތަ ސްކޫލް ކައިރީގައި ހުރި އިއްޒުއްދީން ސްކޫލްގެ އިމާރާތުގައި ރެނދުލައި ވަރަށް ބޮޑަށް ހަލާކުވެފައި ވާތީ އެ ތަން ބަންދުކޮށް އެ ސްކޫލު ދަރިވަރުން ވެސް މިހާރު ކިޔަވަނީ ދަރުމަވަންތަ ސްކޫލުގަ އެވެ. އެ ދެ ސްކޫލު ދަރިވަރުންނާ އެކު ދަރުމަވަންތަ ސްކޫލްގެ ދަރިވަރުންގެ އާބާދީ މިހާރު ވަނީ 1400 އިން މައްޗަށް އަރައިފަ އެވެ.