ހަނީމޫނަށް މަރުގެ ނިމުމެއް، ދެއްކީ ހުސް އިހުމާލު!

ކައިވެންޏަށް އެންމެ ތިން ހަފްތާގައި ޗައިނާގެ މި ދެމަފިރިން މި މަހު ރާއްޖެ އައީ ހަނީމޫނަށް މިއަށް ވުރެ ވަކިން ރަނގަޅު ގައުމެއް ނޯންނާނެތީ އެވެ. މުޅިން އަލަށް ރާއްޖެއަށް ކުރި މި ދަތުރުން ދުވަހަކު ނުލިބޭހާ އުފާވެރިކަމާއި ހިތްހަމަޖެހުމަށް އުންމީދުކުރި ނަމަވެސް ޖަންގް މިދިޔަ އަންގާރަ ދުވަހު ފުރައިގެން އެ ދިޔައީ އޭނާގެ ފިރިމިހާގެ ފުރާނަ ނެތް މަސްގަނޑު ހިފައިގެންނެވެ.

މި މަހުގެ ހަ ވަނަ ދުވަހު ކ. މާފުށީގައި ސްނޯކެލިން އަށް ގޮސް އުޅެނިކޮށް ގެނބިގެން އުމުރުން 38 އަހަރުގެ ފިރިމީހާ، ލީ މަރުވީ އެވެ.

ޓޫރިސްޓުން ގެނބިގެން މަރުވުމަކީ ރާއްޖޭގައި އާދަޔާ ހިލާފު ކަމަކަށް ނުވިޔަސް ޖަންގް، 31، އަށް ހުރީ މި ލިބުނު ހިތާމާގައި މިކަން ލުއިކޮށް ދޫކޮށްލާ ގޮތަކަށް ނޫނެވެ. މި ވާހަކަ ކިޔައިދޭން އޭނާ އަށް އުނދަގޫވި އެވެ. ރޮމުން، އެތައް ފަހަރަކު ވާހަކަ މެދުކަނޑާލަން ޖެހުނެވެ.

ލީ އާއި ޖަންގް ހަނީމޫން ހޭދަކުރަން ރާވާފައި އޮތީ ރިސޯޓެއްގަ އެވެ. އެކަމަކު "ލޯކަލް ޓޫރިޒަމް" ތަޖުރިބާކޮށްލަން ބޭނުންވެ އެ ދެމަފިރިން މާފުށީގައި މަޑުކޮށްލަން ބޭނުންވި އެވެ.

އެ ރަށަށް ދިޔަ ދުވަހުގެ، ހަވީރު އެ މީހުން އޮތީ ސްނޯކެލިން އަށް ދާން ބޭނުންވެގެން، އެ ހިދުމަތްދޭ ތަނެއްގައި ނަން ނޯޓުކޮށްފަ އެވެ. އެކަމަކު މޫސުން ގޯސްވެގެން އެ ދަތުރު ކެންސަލްވީ އެވެ.

"ހަ ވަނަ ދުވަހުގެ މެންދުރު ފަހު މާފުއްޓަށް ދެވުނީ. އެ ދުވަހުގެ ހަވީރު ވޯޓާ ސްޕޯޓްސް އެކްޓިވިޓީގެ ހިދުމަތްދޭ ތަނެއްގައި ސްނޯކެލިން އަށް ދާން ނަން ނޯޓުކުރީ. އެންމެން އަންނަން އޮތީ [އަނެއް ދުވަހު] 7:15. އެކަމަކު އަނެއް ދުވަހު އަހަރެމެންނަށް އެންގީ މޫސުން ގޯސްވެގެން ސްނޯކެލިން ދަތުރު ކެންސަލް ކަމަށް،" ޗައިނާ ބަހުން، ތަރުޖަމާނެއްގެ އެހީގައި ޖަންގް ބުންޏެވެ.

ޖަންގް ބުނީ ދަތުރު ކެންސަލްވުމުން ދެން އެ މީހުން ނުކުތީ ރަށުތެރެ ބަލައިލަން ކަމަށެވެ. އެހެން އުޅުމުގެ ތެރޭގައި އެހެން ބަޔަކު ސްނޯކެލިން އަށް ދާ މަންޒަރު ފެނުމުން، އެ މީހުންނާ ވާހަކަ ދައްކައި، މި ދެމަފިރިން ވެސް އެ މީހުންނާ އެކު ދާން ނިންމި އެވެ.

"...ދެން މިހެން ނުކުމެ އުޅެނިކޮށް މި ފެންނަނީ ބައެއް ޓޫރިސްޓުން ސްނޯކެލިން އަށް ދާން އުޅޭ މަންޒަރު. އޭގެ ތެރޭގައި ހަ ވަނަ ދުވަހު އަހަރެމެންނާ ދިމާވި ޗައިނާ ޓޫރިސްޓަކު ވެސް ހިމެނޭ. އެ މީހުން ބުނެފި ސީ ޑްރޮޕް ޓުއާސް ނަމަކަށް ކިޔާ ތަނަކުން މި މީހުންދާން އުޅޭ ވާހަކަ. އެހެންވެ އަހަރެމެން ވެސް އެތަނަށް ގޮސް ބޮލަކަށް 30 ޑޮލަރުގެ މަގުން ފައިސާ ދެއްކިން ސްނޯކެލިން އަށް ދާން،" ހަނީމޫން ދަތުރު ހިތްދަތިކަމަށް ބަދަލުވެގެން ދިޔަ ދަތުރުގެ ފެށުނު ގޮތް އޭނާ ކިޔައިދިނެވެ.

"މިވަރަށް މި ހިދުމަތްދޭ ތަންތަނަށް ގޮސް އަހަރެމެންނަށް ފަތަން ނޭނގޭއޭ ބުނީމަ ވެސް ނުބުނޭ ފަތަން ނޭނގެންޏާ ނުދެވޭނެއޭ. އެންމެން ވެސް ބުނީ ފަތަން ނޭނގުނަސް ސްނޯކެލިން އަށް ދެވޭނެއޭ."

އެ މީހުންނާ އެކު 21 ޓޫރިސްޓުން މި ދަތުރުގައި ސްނޯކެލިން އަށް ދިޔައިރު އެ މީހުންގެ ކަންކަން ބަލަހައްޓަން ތިބީ ފަސް ވަރަކަށް މީހުންނެވެ. އެއީ ޓޫރިސްޓުންނާ އެކު މޫދަށް ފޭބި ތިން އިންސްޓްރަކްޓަރުންނާއި ދޯނީގައި ތިބި ދެ މީހުންނެވެ.

އެކަމަކު އެކި ގައުމުތަކުގެ މީހުން ތިބި މި ދަތުރުގައި މޫދަށް އެމީހުން ބޭލުމުގެ ކުރިން ލައިފްޖެކެޓާއި މާސްކާއި ފިންސް އަދި ހޮޅި ދިނަސް މާބޮޑު އިރުޝާދެއް ނުދޭ ކަމަށް ޖަންގް ބުންޏެވެ. އެހެންވެ، ބައެއް މީހުންނަށް މާސްކް އަޅައިގެން ހޮޅި ބޭނުންކުރަންވާ ގޮތެއް ވެސް ނޭނގެ އެވެ.

"އެ އެއްޗެހި ދިންއިރު ވެސް ކިޔައެއް ނުދޭ ކިހިނެއް ކަމެއް ބޭނުންކުރަނީ. ދަަސްކޮށް ވެސް ނުދޭ ބޭނުންކުރާނެ ގޮތެއް. ސުވާލެއް ވެސް ނުކުރޭ. އަހަރެން މާސްކް އެޅީ ވެސް ކައިރީ ހުރި މީހާ އަޅާ ގޮތް ބަލައިގެން. އެ މީހުން މޫދަށް ފައިބަމުން އިނގިރޭސި ބަހުން ވާހަކައެއް ދެއްކި،" މުޅިން އަލަށް ސްނޯކެލިން އަށް ދިޔަ ޖަންގް ބުންޏެވެ.

"އެކަމަކު އިނގިރޭސި އެނގޭ މީހާ [ޓޫރިސްޓެއް] ވެސް ބުނީ އިންސްޓްރަކްޝަނެއް ނުދެއޭ މޫދަށް ފައިބަމުން."

މުޅި ރާއްޖެއަށް ވައިޓް އެލާޓް ވެސް ނެރެފައި އޮއްވައި ކުރި މި ދަތުރުގައި އެންމެ ފުރަތަމަ އެ މީހުން ގޮވައިގެން ދިޔައީ ކަނޑުގެ ސަރަހައްދަކަށެވެ. އެތަނުގައި އެހެން ދޯނިތަކެއް ވެސް އޮތްއިރު ޓޫރިސްޓުން ވެސް މޫދަށް ފައިބައިގެން އުޅުނެވެ.

އެކަމަކު އެ ތަނުގައި މަޑުނުކޮށް އެ މީހުން އެހެން ތަނަކަށް މިސްރާބު ޖެހި އެވެ. އެހެން ތަނެއްގައި މަޑުކުރުމަށް ފަހު ބައެއް ކަންކަން ކިޔައިދިން ނަމަވެސް މާ ގިނަ ވާހަކައެއް ނުދައްކަ އެވެ.

"އެހެންވެ، [ނޭނގޭތީ] އެހެން މީހުން ހަދާ ގޮތް ބަލައިގެން ލައިފްޖެކެޓާއި އެހެން އިކުއިޕްމެންޓްތައް ބޭނުންކުރީ. އެހެން މީހުން ހަމަ އެ އެއްޗެހި އެޅި ގޮތަށް މޫދަށް ފުންމާލި. އެކަމަކު އަހަރެމެން މޫދަށް ފުންމާލުމުގެ ކުރިން އެ މީހުން ނުބަލާ އަހަރެމެން އެއްޗެހި އަޅައިގެން ތިބީ ރަނގަޅަށްތޯ. އެހީއަކަށް ބޭނުންވެއްޖެއްޔާ ހަދާނީ ކިހިނެއްތޯ،" ފިރިމީހާގެ މަރުގައި އިހުމާލު އޮތް ކަމަށް ބުނެ ޖަންގް ކިޔައިދިނެވެ.

ޖަންގް ބުނި ގޮތުގައި މޫދަށް ފުންމާލިއިރު އޮއި ވަރަށް ބާރެވެ. މޫދުގެ އަޑި ފުންކަމުން ނުފެނެ އެވެ. އެހެންވެ ބިރުން މޫދުގައި އޮންނަން އިތުރަށް އޭނާއަކަށް ނުކެރުނެވެ. މޫދަށް ފުންމާލިތާ ގާތްގަނޑަކަށް 10 މިނެޓުގެ ތެރޭގައި އަތުން ހަނާއަޅަން ފެށުން އަނބުރާ ދޯންޏަށް ނެގި އެވެ.

"އަތުން ހަނާއަޅަން ފެށިއިރު ކައިރި ހުރި ސްޓާފެއް. އޭނާ ބުނީ މޫދު އަޑިއަށް ބަލާށޭ. އެކަމަކު ފުންވީމާ ޕެނިކްވެގެން މީހާ ބިރުން މި އުޅެނީ ... ދެން އަހަރެން އެދުނީ ދޯންޏަށް ނަގަން."

ދޯންޏަށް އެރިއިރު ފިރިމީހާ ފެންނާކަށް ނެތް!

މޫދުގައި އޮންނަން ނުކުރެގިގެން ޖަންގް ދޯންޏަށް ނެގި އިރު ފިރިމީހާ ފެންނާކަށް ނެތެވެ. މީހާ ހާސްވެގެން ދޯނީގެ އެކި ދިމާދިމާލަށް ބެލުނެވެ. ޖަންގް ބުނީ ދޯނީގައި ވެސް އަދި މޫދުގައި ވެސް ފިރިމީހާ ފެންނަން ނެތުމުން ދޯނީގައި ތިބި މީހުން ކައިރީ ބުނުމުން ވެސް ފުރަތަމަ މާބޮޑު ސަމާލުކަމެއް ނުދޭ ކަމަށެވެ.

"ފިރިމީހާ ފެނޭތޯ ބަލައިދޭން އެދުނިން. މޫދުގައި ތިބި މީހުންނަށް އިވޭ ވަރަށް ގޮވަން ފެށިން ފިރިމީހާ އޮތްތޯ ބަލައިދޭން. އެކަމަކު އެވަރުން ވެސް ސްޓާފުންގެ ފަރާތުން ހާސްކަމެއް ނުފެނޭ. ފަހުން ޓޫރިސްޓަކު ގެއްލިގެން އުޅޭކަން އެނގުނީމާ މޫދުގައި ތިބި ޓޫރިސްޓުން ވެސް ދޯންޏަށް އަރަން ފެށި،" އޭނާ ބުންޏެވެ.

އެކަމަކު ޓޫރިސްޓުންތައް ދޯންޏަށް އަރަން ފެށުމުން ކަމެއް ގޯސްވެއްޖެކަން ރެއަކާލައި ސްޓާފުން، ޖަންގުގެ ފިރިމީހާ ހޯދަން ފެށީ ދެނެވެ. އޭރު ކައިރީގައި އޮތް ސޭންޑް ބޭންކް ކައިރިން މީހަކު ފެނިގެން އުޅޭ ވާހަކަ ޓޫރިސްޓަކު ބުނުމާ އެކު ހާސްވެގެން ސްޓާފުން ތެޅިގަތެވެ.

"މީހަކު ގޮނޑުދޮށުގައި އެބަ އޮތޭ އެތަނުން މީހަކު ބުނާ އަޑުއިވޭ. އެ ހިސާބުން ސްޓާފުންގެ ފަރާތުން ވެސް ހާސްކަމެއް ފެނުނީ. ދެން ދޯނިން އަންހެން ސްޓާފެއް މޫދަށް ފުންމާލާފައި އެ ދިޔައީ އެ ސޭންޑް ބޭންކާ ދިމާލަށް،"

އޭގެ ކުޑައިރުކޮޅެެއް ފަހުން އެ އަންހެން ސްޓާފް އަނބުރައި ދޯންޏަށް އަރައި އޭނާގެ ގައިގައި ބައްދާލީ ރޮމުންނެވެ. ކަމެއް ގޯސްވެއްޖެކަން އޭނާއަށް އިހުސާސްވީ މި ހިސާބުންނެވެ.

އެކަމަކު އޭރު ވެސް އޭނާގެ ފިރިމީހާ ލީ ދޯންޏަކަށް ނާރުވަ އެވެ. އޭނާ ރޮއެ އާދޭސް ކުރަން ފެށުމުން، ދޯނި އެ ސޭންޑްބޭންކާ ދިމާލަށް ގާތްކޮށް އޭނާ ދޯންޏަށް އެރުވި އެވެ. އޭރު ލީގެ އަނގައިން ފޮނު އައިސް، ނޭފަތުން ވެސް އޮތީ ލޭ އައިސްފަ އެެވެ. ލައިފް ޖެކެޓު ފިޔަވައި، މޫދަށް ފޭބި އިރު އަޅައިގެން ހުރި އެއްވެސް އިކުއިޕްމަންޓެއް ވެސް ގަޔަކު ނެތެވެ.

ޖަންގް ބުނީ މާފުއްޓަށް ދާން ވިއްސަކަށް މިނެޓުވި މި ދަތުރުގައި ފިރިމީހާއަށް ސީޕީއާރު ދޭން ޖެހުނީ ވެސް އޭނާ އަމިއްލައަށެވެ.

"އަހަންނަށް ދުރު ނުސާފުވީމާ އެހާ ބޮޑަކަށް ނޭނގޭ ފިރިމީހާގެ ކައިރިއަށް ގޮސް އެ މީހުން [ސްޓާފަކާއި ޔޫރަޕްގެ ޓޫރިސްޓެއް] ހެދީ ކިހިނެއް ކަމެއް. އެކަމަކު ސީޕީއާރު ދޭން މޭ މަތީގައި އަތް ބާއްވައިގެން އުޅޭ ކަހަލަ ގޮތަކަށް ފެނުނު. އެކަމަކު ދޯންޏަށް އެރުވިއިރު ގައިގައި ލައިފްޖެކެޓް އޮތް. މާނައަކީ ސީޕީއާރު ދިން ގޮތް ވެސް ގޯހޭ،"

"އަހަރެން ލައިފްޖެކެޓް ނައްޓުވައި ސީޕީއާރު ފެށީ. މާފުއްޓަށް ދެވުނީ ވިއްސަކަށް މިނެޓުން. އެ ހިސާބުން ހޮސްޕިޓަލަށް ގެންދިޔަ. އެތަނުގައި ވެސް ތިރީހަކަށް މިނެޓު ފަރުވާ ދިން. އެތަނުން ޑޮކްޓަރު ބުނީ އުއްމީދެއް ނެތޭ. އެކަމަކު އަހަރެން ބުނިން ފޮނުވާށޭ މާލެއަށް. އެތަނުގައި ނޫންހޭ ރަނގަޅު ފަރުވާ އޮތީ. އެކަމަކު އެމީހުން އިންކާރުކޮށް އަހަރެން ލައްވައި އެތަނުގައި ޕޭޕަ ވޯކް ނިންމުވި. އޭގައި ސޮއިކުރަން ވެސް ދިހަ ވަރަކަށް މިނެޓު ހޭދަވި. މާލެ އައިސް ފަސް މިނެޓް ނުވާނެ މަރު ޑިކްލެއާ ކުރީ."

އިހުމާލުވި، ބޭނުމީ މާފަށް އެދުމާއި އިންސާފު!

ޖަންގް ބުނި ގޮތުގައި މި ހުރިހާ ކަމެއް ދިމާވިއިރު ދޯނީގައި ތިބި މުވައްޒަފުންގެ ތެރޭގައި ފަސްޓް އެއިޑް އެނގޭ މީހަކު ނެތެވެ.

"ސީޕީއާރު ދެމުން އަހަރެން އެހިން ސީޕީއާރު ދޭ މެޝިން އެބަ އޮތްހޭ. އެ މީހުން ބުނީ ނެތޭ. އެ މީހުން އެއްވެސް ކަމެއް އެ ވަގުތު ނުކޮށްދޭ. އަހަރެން ދޯނީގައި ސީޕީއާރު ވެސް ދިނީ،"

ފިރިމީހާގެ މަރަށް މާދަމާ ދެ ހަފުތާ ވާއިރު، ޖަންގް ވަނީ އޭނާގެ ގާނޫނީ ވަކީލުންގެ ޓީމާ އެކު މާފުއްޓަށް މިދިޔަ ހޯމަ ދުވަހުގެ ހަވީރު ގޮސްފަ އެވެ. އެކަމަކު "ސީ ޑްރޮޕް" ގެ މުވައްޒަފުންގެ ފަރާތުން ފެނުނު ކަންކަމުން އޭނާ އިތުރަށް ހިތްދަތިވި އެވެ. ޖަންގް ބުނީ އެ މީހުން އެކަކު އަނެކަކަށް ހީ ސަމާސާ ކުރަމުން ދިޔައީ ހިތުގައި އެއްވެސް ހަމްދަރުދީއެއް ނެތި އެވެ.

"އެ މީހުންނަށް އެއްވެސް ކަމެއްވިހެން ހީވެސް ނުވެޔޭ އަހަރެން ހިތަށް އެރީ،" އޭނާ ބުންޏެވެ.

މިހާތަނަށް އެ މީހުން ބެލި ބެލުމުން އެނގޭ ގޮތުގައި މި ހިދުމަތް ދިން މީހުންގެ ވިޔަފާރި ލައިސަންސް ވެސް އޮތީ މިދިޔަ ޖޫން ހިސާބުގައި މުއްދަތު ހަމަވެފަ އެވެ. ޓްރޭޑް މިނިސްޓްރީގެ ބިޒްނަސް ޕޯޓަލް އިން ވެސް ދައްކަނީ އިބްރާހިމް ޝާން ކިޔާ މީހެއްގެ ނަމުގައި ރަޖިސްޓްރީ ކޮށްފައިވާ އަމިއްލަ ފަރުދުންގެ ވިޔަފާރިއެއް ކަމަށްވާ "ސީ ޑްރޮޕް ޓުއާސް" ގެ ހުއްދައިގެ މުއްދަތު ހަމަވެފައިވާ ކަމަށެވެ.

ވަރަށް ބޮޑަށް ބާވެ، ހަލާކުވެފައިވާ ތަކެތި އެ މީހުންގެ ސްނޯކެލިން ދަތުރުގައި ބޭނުންކުރި ކަމުގެ ތުހުމަތު ޖަންގް ކުރެ އެވެ.

ރާއްޖެއަކީ ނަން މަޝްހޫރު ތަނަކަށް ވާއިރު ޓޫރިސްޓުންނަށް ދޭ ހިދުމަތްތަކުގެ ފެންވަރު ރަނގަޅަށް ރެގިއުލޭޓް ކުރެވޭތޯ އާއި އެ މީހުން ބޭނުންކުރާ ސާމާނުތަކުގެ ރައްކާތެރިކަން ބެލުމަށް އެކަށީގެންވާ މަސައްކަތް ކުރެވޭތޯ އޭނާ ސުވާލު އުފެއްދި އެވެ.

"އަހަރެންގެ ބައިވަރު ސުވާލު އެބަހުރި. އާންމު ތަންތަނުގައި ހިދުމަތް ދެމުން ދާއިރު އެ މީހުންނަކީ ސެޓްފިކެޓް އޮތް ބައެއްތޯ ބަލަމުންދޭހޭ. މި އެކްޓިވިޓީއަށް ގެންދާ މީހުންގެ ސެޓްފިކެޓެއް ލައިސެންސެއް އޮވޭހޭ. ފަސްޓްއެއިޑް ދެވޭނެ ގޮތެއް ދޯނީގައި އޮންނަން ޖެހޭ ހެއްޔޭ. ކިތައް ޑައިވިން ގައިޑާއި ކިތައް ޓޫރިސްޓުންނަށް ހެއްޔޭ އެއްފަހަރާ ދެވޭނީ. ކޮން ތަންތަނަކަށް ހެއްޔޭ ދެވޭނީ. ރެގިއުލޭޝަންތަކާއި ގަވައިދުތަކާއި ލިމިޓޭޝަންތަކެއް އެބަ އޮތް ހެއްޔޭ މިތަނުގައި،" އޭނާގެ ސުވާލުތައް ބަންޑުންކޮށްލި އެވެ.

ފަތަން ނޭނގޭ މީހުން ސްނޯކެލިން އަށް ނުދެވޭ ނަމަ އެފަދަ ބޯޑުތަކެއް މި ހިދުމަތްދޭ ތަންތަނުގައި ހަރުކުރަންޖެހޭ ކަމަށް އޭނާ ގަބޫލުކުރެ އެވެ. ދޯނީގައި ވެސް ވަރަށް ތަޖުރިބާ ހުރި ރެސްކިއު ޑައިވަރަކު ހުންނަން ޖެހޭ ކަމަށް ޖަންގް ބުންޏެވެ.

"އަހަރެމެން ރާއްޖެ އައީ ރާއްޖެއަކީ މަޝްހޫރު ތަނަކަށް ވާތީ. އަހަރެމެން ހީކުރީ ވަރަށް ރަނގަޅު ޓޫރިސްޓު ހިދުމަތޭ މިތަނުން ދެނީ. އަހަރެމެން ހީކުރީ ލޯކަލް ރަށްރަށުގައި ވެސް މިކަން ކުރެވޭނެ ގޮތްތަކާއި އުސޫލުތަކެއް އޮންނަ ކަމަށް. މި ހާދިސާ ދިމާވި ފަހުން މީހަކު ބުނި، އަހަރެން ފިރިމީހާގެ ފިންސް ވެސް އޮތީ ހަލާކުވެފައޭ މޫދުގައި އޮތްއިރު ވެސް،" ކަންބޮޑުވުމާ އެކު ޖަންގް ކިޔައި ދިނެވެ.

މިހާ ހިސާބަށް ވާހަކަ ދައްކާފައި އޭނާ ހުއްޓުން އެރި އެވެ. ފިރިމީހާ މަރުވި ފަހުން އެއްޗެއް ނުކެވި އޭނާގެ ގަޔަކު ވަރެއް ނެތެވެ. ފެން ބޮއެގެން އޭނާ ހިފަހައްޓަމުން އަންނައިރު ބޯ އަނބުރާތީ އިންޓަވިއު މެދުކަނޑާލަން ޖެހުނެވެ. އެކަމަކު މި އިންޓަވިއު ދޭން އޭނާ ބޭނުންވަނީ ރާއްޖޭގައި ހާދިސާތައް އާންމުވިޔަސް އެކަމަށް މާބޮޑު ފިޔަވަޅެއް ނޭޅޭތީ އެވެ.

ރާއްޖެއަކީ ޓޫރިޒަމަށް ބަރޯސާވެފައި އޮތް ގައުމަކަށްވާއިރު ޓޫރިސްޓުންނަށް ދިމާވާ މިފަދަ ހަދިސާތައް ސީރިއަސް މައްސަލަތަކެއްގެ ގޮތުގައި ބަލައި ފިޔަވަޅު ނާޅައިފި ނަމަ، އެކަމުގެ ސަބަބުން ޓޫރިޒަމަށް ވެސް އަސަރުކުރާނެ ކަމަށް އޭނާ ދެކެ އެވެ. މި ޚަބަރު ރާއްޖެއިން ބޭރުގެ އެހެން މީޑިއާތަކަށް ވެސް ދޭން އޭނާ ހުރީ ނިންމައިގެންނެވެ.

ފިރިމީހާގެ މަރަށް ފަހު، ރާއްޖެ އިން ކުރެވުނު ތަޖުރިބާ އިން އޭނާ ހުރީ ހިތުގައި ޖެހިފަ އެވެ. މިކަހަލަ ހާދިސާއެއް ހިނގުމުން ރާއްޖޭގެ އިދާރާތަކުން އަމަލުކުރީ ކަން ކުރަންޖެހޭ ގޮތަށް ކަމަށް އޭނާ ނުދެކެ އެވެ.

ޖަންގް ބުނިގޮތުގައި، އެ މީހުން ހިދުމަތް ހޯދި ތަނާ މެދު މިހާތަނަށް ސަރުކާރުން ފިޔަވަޅެއް އަޅާފައި ނެތުމަކީ އޭނާ ދެކޭ ގޮތުގައި ކަމެއް ނުވާ ކަމަށް ހެދުމެވެ. އެކަމަކު ރާއްޖޭގައި އެތައް ޓޫރިސްޓުންނެއް މަރުވަމުން ދާއިރު މިއަށް ވުރެ ބޮޑަށް ސަމާލުކަން ދޭންޖެހޭ ކަމަށް އޭނާ ބުންޏެވެ.

ރާއްޖެ އަށް އެންމެ ގިނަ ޓޫރިސްޓުން އަންނަ ގައުމުގެ ގޮތުގައި ޗައިނާ އޮތްއިރު އެ ގައުމުގެ ޓޫރިސްޓަކަށް މިކަހަލަ ކަމެއް ދިމާވުމުން ވެސް މާބޮޑު އަޅާލުމެއް ދިވެހި ސަރުކާރުން ނުދޭ ކަމަށް އޭނާ ބުންޏެވެ.

ޖަންގް ބުނާ ގޮތުގައި މި ހާދިސާ ހިނގި ފަހުން، ސީ ޑްރޮޕުން މިހާތަނަށް އޭނާގެ ކިބައިން މާފަކަށް ވެސް ނޭދެ އެވެ.

"އަހަރެން މިތާ ހުރިއިރު އެއިން މީހަކު އަހަރެން ކައިރިއަށް ނުވެސް އާދޭ. އެ މީހުން އުފާވެރިކަމާ އެކު އެ މީހުންގެ ދިރިއުޅުން އެބަދޭ. އެތަން ވެސް އެބަ އޮޕަރޭޓްކުރޭ،" ގިސްލަމުން ބުންޏެވެ.

މި ތުހުމަތުތަކާ ގުޅޭ ގޮތުން ސީ ޑްރޮޕްގެ ބަހެއް ހޯދަން، އެ ތަނުގެ ފޭސްބުކް ޕޭޖްގައިވާ ނަންބަރަށް "މިހާރު" އިން ގުޅައި މެސެޖުކުރި ނަމަވެސް ޖަވާބެއް ނުދެ އެވެ. މެސެޖު ބަލާފައިވާ ކަން އެނގެން އޮތް އިރު ވެސް މެސެޖުތަކަށް ޖަވާބެއް ނުދެ އެވެ.

"އެ މީހުން މާފަކަށް ނޭދޭ. އެހެންވީމާ އަހަރެމެން ގާނޫނީ ފިޔަވަޅު އަޅައި ބަދަލު ހޯދަން މަސައްކަތްކުރާނަން،" އޭނާ ބުންޏެވެ.

ލީ އަކީ އޭނާގެ އާއިލާގެ ހުރިހާ ޒިންމާތަކެއް ބަލަހައްޓަމުން އައި އަދި އެ އާއިލާގެ ހުރި ހަމައެކަނި ފިރިހެން ދަރިފުޅެވެ. ޒުވާން އުމުރުގައި އޭނާ މަރުވި އިރު 70 އަހަރުގެ މައިންބަފައިން މިހާރު އެ ތިބީ އެކަނިވެފަ އެވެ.

އެހެންވެ މިކަމުގައި އާއިލާ އިން އޮތީ ދޫދޭ ގޮތަކަށް ނޫނެވެ. އިހުމާލުވި ފަރާތްތަކަށް ފިޔަވަޅު އަޅައި، ދެން އިތުރު އެހެން އާއިލައަކަށް މިކަން ދިމާނުވާނެކަން އާއިލާ އިން ކަށަވަރުކުރަން ބޭނުންވެ އެވެ.

"މިއަދު މިއީ އަހަންނަށް ދިމާވި ކަމެއް. މާދަމާ ތިއިން މީހަކަށް ދިމާވެދާނެ."