ހަނީމޫނަށް ރާއްޖެއަށް ކުރި ދަތުރުގައި ގެނބިގެން މަރު، ފުލުހުން ތަހުގީކުރަނީ

ހަނީމޫނަށް ރާއްޖެއަށް އައި ޗައިނާ ދެމަފިރިއަކު ކ. މާފުށީގައި ސްނޯކެލިން އަށް ގޮސް އުޅެނިކޮން ފިރިމީހާ ގެނބިގެން މަރުވެއްޖެ އެވެ.

ޓޫރިސްޓުން ގެނބިގެން މަރުވުމުގެ ހާދިސާތައް ކުރިން ހާމަކުރަމުން އައި ނަމަވެސް މި މަހުގެ ހަތް ވަނަ ދުވަހު ހިނގި މި ހާދިސާގެ ވާހަކަ އެއްވެސް އިދާރާއަކުން ހާމަކޮށްފައެއް ނުވެ އެވެ. އެކަމަކު "މިހާރު" އިން ސުވާލުކުރުމުން ފުލުހުން ވަނީ އެފަދަ ހާދިސާއެއް ހިނގި ކަމާއި އެ މައްސަލަ ތަހުގީގުކުރަމުން އަންނަ ކަމަށް ބުނެފަ އެވެ.

މި ހާދިސާއާ ބެހޭ ގޮތުން "މިހާރު" އަށް ލިބިފައިވާ މައުލޫމާތަށް ބަލާއިރު ދެމަފިރިން ސްނޯކެލިން އަށް ދިޔައީ މޫސުން ގޯސް ދުވަހެއްގައި، ވޯޓަ ސްޕޯޓްސްގެ ހިދުމަތްދޭ ބައެއްގެ ހަވާލުގަ އެވެ. އެ މީހުން ގޮސް ތިބި ގެސްޓް ހައުސް އިން އެ ދުވަހު މޫސުން ގޯސްކަމުން އޮތީ ސްނޯކެލިން ކެންސަލްކޮށްފަ އެވެ.

އެކަމަކު މުޅިން އަލަށް ރާއްޖެ އައި ދެމަފިރިންނަށް، އެހެން ބަޔަކު ސްނޯކެލިންއަށް ދާ ތަން ފެނުމުން އެ މީހުންނާ އެކު ދިޔައީ އޭރު މޫސުން ރަނގަޅު ކަމަށް، އެ މީހުން ގޮވައިގެން ދިޔަ ވޯޓަ ސްޕޯޓްސް ހިދުމަތް ދޭ ތަނުން ބުނުމުން ކަމަށްވެ އެވެ.

އެ މީހުންނާ އެކު ގިނަ އަދަދެއްގެ ޓޫރިސްޓުން ދިޔަ އެވެ. ފަތަން ނޭނގޭ ގިނަ ބަޔަކު ތިބި އިރު އެ މީހުން މޫދަށް އެރުވީ ލައިފް ޖެކެޓް އަޅުވައިގެންނެވެ. ހަނީމޫނަށް އައިސް އުޅުނު ދެމަފިރިން ވެސް ލައިފް ޖެކެޓާ އެކު މޫދަށް އެރުވިތާ އިރުކޮޅެއް ފަހުން ފިރިހެން މީހާ ގެއްލުނީ ކަމަށް އެކަމުގެ މައުލޫމާތު އެނގޭ މީހަކު ބުންޏެވެ.

"އަންހެން މީހާ ލައިފް ޖެކެޓާ އެކު މޫދުގައި އޮންނަން ނުކެރިގެން އެރީ. އެކަމަކު އޭރު ފިރިހެން މީހާ ނެތްކަން ފާހަގައެއް ނުވޭ. ބައިވަރު ގެސްޓުން މޫދުގައި ތިބި. އެ އެންމެން ބެލެހެއްޓޭ ވަރަށް ވޯޓަ ސްޕޯޓްސް މީހުންނެއް ނެތް،" ހާދިސާ ހިނގި ގޮތް އެނގޭ މީހަކު ކިޔައިދިނެވެ.

އޭނާ ބުނި ގޮތުގައި ފިރިހެން މީހާ ފެނުނީ ރަށުގެ ގޮނޑުދޮށަށް ލައްވެފައި އޮއްވަ އެވެ.

މި ހާދިސާ ތަހުގީގުކުރަމުން އަންނަ ކަމަށް ބުނި ނަމަވެސް މިކަމާ ބެހޭ ތަފްސީލެއް ފުލުހުން ނުދެ އެވެ.