ކުރަނގި އޮޕަރޭޝަންގައި 4،000 އަށް ވުރެ ގިނަ ބިދޭސީންގެ ބަޔޮމެޓްރިކް ޑާޓާ އެއްކޮށްފި

ރާއްޖޭގައި އުޅޭ ހުރިހާ ބިދޭސީންގެ ފޮޓޯ އާއި އިނގިލީގެ ނިޝާން ނަގަން ފަށައި، ގަވާއިދާ ހިލާފަށް އުޅޭ ބިދޭސީން ގަވާއިދަށް ފެއްތުމަށް މިދިޔަ މެއި މަހު ފެށި އޮޕަރޭޝަން "ކުރަނގި"ގެ ދަށުން މިހާތަނަށް 4،000 އަށް ވުރެ ގިނަ މީހުންގެ ބަޔޮމެޓްރިކް ޑާޓާ އެއްކޮށްފި އެވެ.

"މިހާރު" އިން އެދިގެން ހޯމްލޭންޑް މިނިސްޓްރީން މިއަދު ދިން މައުލޫމާތުގައިވާ ގޮތުން މީހުން ދިރިއުޅޭ 45 ރަށެއްގައި ވަނީ ކުރަނގި އޮޕަރޭޝަން ފަށައިފަ އެވެ. މިހާތަނަށް ވަނީ އޭގެ ތެރެއިން 8 ރަށެއްގައި ތިބި ހުރިހާ ބިދޭސީންގެ މައުލޫމާތު އެއްކޮށް ނިންމައިފަ އެވެ.

އެ 45 ރަށުން ވަނީ ޖުމްލަ 4،272 ބިދޭސީއެއްގެ ބަޔޮމެޓްރިކް ޑާޓާ އެއްކޮށްފަ އެވެ.

ބިދޭސީން އެންމެ ގިނައިން ތިބީ، އެންމެ ފުޅާދާއިރާއެއްގައި ލޯކަލް ޓޫރިޒަމްގެ ވިޔަފާރިކުރާ ކ. މާފުށީގަ އެވެ. އެ ރަށުން ވަނީ 1،076 ބިދޭސީއެއްގެ ބަޔޮމެޓްރިކް ޑާޓާ އެއްކޮށްފަ އެވެ. އަދި ދެވަނަ އަށް ބިދޭސީން އެންމެ ގިނަ ކ. ހިންމަފުށިން ވަނީ 701 މީހުންގެ ބަޔޮމެޓްރިކް ޑާޓާ އެއްކޮށްފަ އެވެ.

އޮޕަރޭޝަން "ކުރަނގި" ފެށީ ވެސް ހިންމަފުށިންނެވެ.

"ކުރަނގި" އޮޕަރޭޝަންގެ ބައެއް ހިސާބުތައް

• ހއ. ދިއްދޫން 390 ބިދޭސީން

• ރ. އަލިފުށިން 178 ބިދޭސީން

• ރ. ދުވާފަރުން 140 ބިދޭސީން

• ކ. ގާފަރުން 105 ބިދޭސީން

• ކ. ހިންމަފުށިން 701 ބިދޭސީން

• ކ. މާފުށިން 1،076 ބިދޭސީން

• ލ. ގަމުން 200 ބިދޭސީން

• ސ. ހިތަދޫން 114 ބިދޭސީން

"ކުރަނގި" އަކީ ހޯމްލޭންޑް ސެކިއުރިޓީ މިނިސްޓްރީ އާއި ފުލުހުންނާއި އިމްގްރޭޝަން ގުޅިގެން ހިންގާ އޮޕަރޭޝަނެކެވެ.

ބިދޭސީންގެ ފިންގަޕްރިންޓާއި ފޮޓޯ ނަގައި ގަވާއިދަށް ފެއްތުމުގެ މަސައްކަތް ނިމޭއިރު، މައުލޫމާތު ކަށަވަރު ނުވާ އެއްވެސް މީހަކު ރާއްޖޭގައި ނުހުންނާ ކަމަށް ހޯމްލޭންޑް މިނިސްޓަރު އަލީ އިހުސާން ވަނީ ކުރިން ވިދާޅުވެފަ އެވެ.

އިހުސާން ވިދާޅުވެފައިވާ ގޮތުގައި، ދެ ފިޔަވައްސަށް ބަހާލައިގެން ތިން އަހަރަށް އަމާޒުކޮށްގެން ކުރިއަށް ގެންދާ އެ އޮޕަރޭޝަން ނިމޭއިރު، އަމާޒަކީ ރާއްޖޭގައި މުޅިން ވެސް ތިބޭނީ 100 ޕަސެންޓް ވެރިފައި ކުރެވިފައި ތިބި ބިދޭސީންނަށް ހެދުމެވެ.

ގަވައިދާ ހިލާފަށް އުޅޭ ބިދޭސީންގެ މައްސަލަ ބޮޑުވެ، ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ސެޕްޓެމްބަރު، 2019 ގައި ވެސް ވަރުގަދަ ކެމްޕެއިނެއް ފެށި އެވެ. އެ ހަރަކާތުގައި 40،000 އަށް ވުރެ ގިނަ ބިދޭސީން ރަޖިސްޓަރީ ކުރި އެވެ. އެކަމަކު، އެ ސަރުކާރުގެ މުއްދަތު ހަމަވިއިރު ވެސް ބިދޭސީންގެ މައްސަލަ ހައްލު ކޮށް ނުދެވުނެވެ. ފަހުން ބިދޭސީންގެ ރަޖިސްޓްރޭޝަންގެ ކަންކަން ވެސް ހުއްޓުނީ އެވެ.

ރައީސް ޑރ. މުހައްމަދު މުއިއްޒުގެ ސަރުކާރުން އަންނަނީ ރާއްޖޭގައި ގަވާއިދާ ހިލާފަށް އުޅޭ ބިދޭސީން ވެސް ހުއްޓުވުމަށް ވެސް ހާއްސަ އޮޕަރޭޝަނެއް ހިންގަމުންނެވެ. އެ އޮޕަރޭޝަންގައި ހިފެހެއްޓި ބިދޭސީންގެ ގަވާއިދާ ހިލާފަށް ރާއްޖޭގެ އުޅުނު 4،000 އަށް ވުރެ ގިނަ މީހުން ވަނީ ޑީޕޯޓްކޮށްފަ އެވެ.