ލަތީފާއި އަލިބެ ތުރުކީގެ ވެޓްރަންސް މުބާރާތުން ޗެމްޕިއަންކަން ހޯދައިފި

އިސްތަންބޫލް ވެޓްރަންސް ޓޭބަލް ޓެނިސް އެސޯސިއޭޝަނުން ތުރުކީގެ ބޯރޫމްގައި ބޭއްވި ބައިނަލްއަގްވާމީ ޓީޓީ މުބާރާތުގެ 60 އަހަރުން މަތީގެ ކެޓަގަރީން ރާއްޖޭގެ ސީވީޑް އަހުމަދު ލަތީފާއި އަލީ އާދަމް މަނިކު (ތާޅަފިލި އަލިބެ) ޗެމްޕިއަންކަން ހޯއްދަވައިފި އެވެ.

މިއީ ދިވެހި ކުޅިވަރުގެ ތާރީހުގައި ބައިނަލްއަގްވާމީ މުބާރާތެއްގައި އެންމެ ފުރަތަމަ ވާދަކުރި ކުޅިވަރު ކަމަށްވާ ޓީޓީ އަށް ބައިނަލްއަގްވާމީ ވެޓްރަންސް މުބާރާތަކުން ލިބުނު އެންމެ ބޮޑު ކާމިޔާބެކެވެ.

މުބާރާތުގެ ސިންގަލްސް ކެޓަގަރީގެ 60 އަހަރުން މަތީގެ އުމުރުފުރާ އިން އަލިބެ ދެ ވަނަ އަދި، 65 އަހަރުން މަތީގެ އުމުރުފުރާ އިން ލަތީފް ވަނީ ތިން ވަނަ ހޯއްދަވައިފަ އެވެ.

މި މަހު 7 އިން މިއަދުގެ ނިޔަލަށް ބޭއްވި ބޯރޫމް ފްރެންޑްޝިޕް މުބާރާތުގެ 60 އަހަރުން މަތީގެ ކެޓަގަރީން ލަތީފާއި، އަލިބެ ޗެމްޕިއަންކަން ހޯއްދެވީ އިއްޔެ އޮތް ފައިނަލް މެޗުގައި ތުރުކީގެ އަޓިލާ ޓެސްޑަން އާއި ބެކްޓަސް އައިދޯގަން އަތުން 3-1 އިން މޮޅުވެގެންނެވެ.

މީގެ ތެރެއިން އަލިބެ މިއަދު އިތުރު ތަށްޓެއް ހޯއްދެއްވުމާ ގާތަށް ދިޔަ ނަމަވެސް އެ އުމުރުފުރާގެ ސިންގަލްސް ފައިނަލުން ތުރުކީގެ ކެނަން އަޓަލޭ އަތުން 3-2 އިން ނާކާމިޔާބުވީ އެވެ. މުބާރާތުގެ 65 އަހަރުން މަތީގެ ސިންގަލްސްގެ ތިން ވަނަ ހޯއްދެއްވި ލަތީފް ސެމީ ފައިނަލުން ބަލިވީ ރަޝިއާގެ ސާޖެއީ ސަފެއަނޯފް އަތުންނެވެ.

މި މުބާރާތުގެ ތުރުކީ އާއި ރަޝިއާގެ އިތުރުން ޖަރުމަނާއި، ބަލްގޭރިއާ އާއި، ޖޯޖިއާ އާއި، ޑެންމާކް ކުޅުންތެރިން ހިމެނޭހެން 150 އަށް ވުރެ ގިނަ ވެޓްރަންސް ކުޅުންތެރިން ވާދަކުރި އެވެ.

ޓީޓީ އެސޯސިއޭޝަނުގެ ކުރީގެ ރައީސް ލަތީފާއި، އެ އެސޯސިއޭޝަނުގެ ކުރީގެ އެގްޒެކެޓިވް ކޮމިޓީ މެމްބަރު އަލިބެ އަކީ، ރާއްޖޭގެ ޓީޓީގެ ތާރީހާ ގުޅިފައިވާ ކުރީގެ ދެ ތަރިންނެވެ. ލަތީފަކީ، ރާއްޖޭން އެންމެ ފުރަތަމަ ބޭރަށް ދިޔަ ކުޅިވަރު ޓީމު ކަމަށްވާ 1973 ގައި ޗައިނާގައި އޮތް ތުރީއޭ ގޭމްސްގައި ވާދަކުރި ޓީޓީ ޓީމުގެ ކުޅުންތެރިއެކެވެ. އޭގެ ހަ އަހަރު ފަހުން 1979 ވަނަ އަހަރު ރިޔޫނިއަންގައި އޮތް އިންޑިއަން އޯޝަން އައިލެންޑް ގޭމްސްގައި ވާދަކުރި ޓީޓީ ޓީމުގައި ވެސް ލަތީފް ހިމެނިވަޑައިގަތެވެ. އެ ގޭމްސްއަކީ އަލިބެގެ ފުރަތަމަ ބައިނަލްއަގްވާމީ މުބާރާތެވެ.

ގައުމީ ޗެމްޕިއަންކަން އެތައް ފަހަރަކު ހޯއްދަވާފައިވާ އަލިބެ ވަނީ ވަރަށް ފަހަކާ ޖެހެންދެން ވެސް ގައުމީ މުބާރާތްތަކުގައި ވާދަކުރައްވައިފަ އެވެ. ގައުމީ ސިންގަލްސް ޗެމްޕިއަންކަން 1973، 1974، އަދި 1981 ގައި ހޯއްދެއްވި ލަތީފް އެންމެ ފަހުން މަތީ ފެންވަރުގައި ކުޅުއްވީ، 1990 ވަނަ އަހަރު ޗައިނާގައި އޮތް އޭޝިއަން ގޭމްސްގަ އެވެ.

އެކަމަކު، ޓީޓީގެ މަޝްހޫރު ސީވީޑް އާއިލާގެ ދޮށީ މެމްބަރު ލަތީފް އަންނަނީ ފިޓްނަސް ހިފަހައްޓަވައި ގަވާއިދުން ރާއްޖެ އާއި ރާއްޖޭން ބޭރުގެ ވެޓްރަންސް މުބާރާތްތަކުގައި ކުޅުއްވަމުންނެވެ. ރާއްޖޭން ޖަރުމަނަށް ކަނޑައަޅުއްވާފައިވާ ސަފީރުގެ ގޮތުގައި އެ ގައުމުގައި ހުންނެވިއިރު ލަތީފް ވަނީ ޖަރުމަނުގެ ލީގު ސިސްޓަމުގައި ހިމެނޭ ކްލަބަކަށް ވެސް ކުޅުއްވައިފަ އެވެ.

ލަތީފަކީގެ ކުރީގެ ކްރިކެޓް ކުޅުންތެރިއެއް ވެސް މެ އެވެ. އެކަމަކު، ވިކްޓްރީ ސްޕޯޓްސް ކްލަބުން 1983 ވަނަ އަހަރު ގައުމީ ކްރިކެޓް ތަށި މިލްކުކުރިއިރު އެ ޓީމަށް ވެސް ކުޅުއްވި ލަތީފުގެ އެންމެ ހާއްސަ ކުޅިވަރަކީ އަބަދުވެސް ޓީޓީ އެވެ.

"ގަވާއިދުން ޓީޓީ ނުކުޅެވެންޏާ ހަމަޖެހިލައިގެން ނިދާ ވެސް ނުލެވޭނެ،" އިއްޔެގެ ފައިނަލަށް ފަހު ލަތީފް ވިދާޅުވި އެވެ.