ރާއްޖެ އެތެރެކުރަން އުޅުނު ހަތަރު ކިލޯއެއްހާ ޑްރަގް އަތުލައިގެންފި

ވައިގެ މަގުންނާއި ޕޯސްޓު މެދުވެރިކޮށް ރާއްޖެ ގެނައި 3.48 ކިލޯގެ މަސްތުވާތަކެތި ކަސްޓަމްސް އިން މި ހަފްތާ ތެރޭގައި އަތުލައިގެންފި އެވެ.

މި މަސްތުވާތަކެތީގެ ތެރެއިން 2.44 ކިލޯގެ މަސްތުވާތަކެތި އަތުލައިގަތީ މި މަހުގެ ފަސް ވަނަ ދުވަހު ވައިގެ މަގުން ރާއްޖެ އައި ބްރެޒިލް އަންހެނެއްގެ ލަގެޖުންނެވެ.

ކަސްޓަމްސް އިން ބުނީ ފުރަތަމަ މަރުހަލާގައި އެ ތަކެތި ޓެސްޓުކުރިއިރު، މަސްތުވާތަކެތީގެ ބާވަތެއް ކަމަށްވާ ކޮކެއިންއަށް އެ ތަކެތި ޕޮޒިޓިވް ވެފައިވާ ކަމަށެވެ. މި ތަކެތީގެ މަގުމަތީގެ އަގު ހަ މިލިއަނަށް އަރާނެ ކަމަށް ކަސްޓަމްސް އިން ލަފާކުރެ އެވެ.

ކަސްޓަމްސް އިން ބުނީ ޕޯސްޓު މެދުވެރިކޮށް ގެނައި ޕެކޭޖެއްގެ ތެރެެއިން އަތުލައިގަތީ 1.04 ގެ މަސްތުވާތަކެތި ކަމަށެވެ. މި މަހުގެ ހަތް ވަނަ ދުވަހު އެތެރެކުރި މި ތަކެތި، ހެރޮއިން އަށް ޕޮޒިޓިވް ވެފައިވާ ކަމަށާއި މި ތަކެތީގެ އަގު 1،040،000ރ. އަށް އަރާ ކަމަށް ކަސްޓަމްސް އިން ބުންޏެވެ.

ކަސްޓަމްސް އިން ބުނީ މަސްތުވާތަކެތި އެތެރެކުރި ބްރެޒިލްގެ އަންހެން މީހާ އާއި ޕޯސްޓުން ޕެކޭޖު ބަލައި ދިޔަ 40 އަހަރުގެ ދިވެހި ފިރިހެން މީހާ ފުލުހުންނާ ހަވާލުކޮށްފައިވާ ކަމަށެވެ.