ރައީސާއި ޖައިޝަންކަރު ބައްދަލުކުރައްވައިފި

ރައީސް ޑރ. މުހައްމަދު މުއިއްޒު މިއަދު އިންޑިއާ އަށް ފެއްޓެވި ފުރަތަމަ ފުރަމާނަ ދަތުރުފުޅުގައި އެ ގައުމުގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރުއާ މިރޭ އިރާކޮޅު ބައްދަލުކުރައްވައިފި އެވެ.

ރައީސް މުއިއްޒުގެ ދެކަނބަލުން މިއަދު ހަވީރު އިންޑިއާގެ ދިއްލީ އަށް ވަޑައިގެންފައިވާއިރު، އެންމެ ފުރަތަމަ ބައްދަލުވުން އޮތީ އެކްސްޓާނަލް އެފެއާޒް މިނިސްޓަރު ޖައިޝަންކަރުއާ އެކު އެވެ.

ދިއްލީގައި ރައީސް މުއިއްޒު ހުންނަވާ ހޮޓަލުގައި ބޭއްވެވި މި ބައްދަލުުވުމުގައި ދެ ގައުމުން އިސްކަންދޭ ކަންކަމާ ގުޅޭ ގޮތުން ފުޅާދާއިރާއެއްގައި މަޝްވަރާ ކުރެއްވި ކަމަށް ރައީސް އޮފީހުން ބުންޏެވެ.

ރައީސް ދެން މިރޭ ބައްދަލުކުރައްވާނީ ދިއްލީގައި ދިރިއުޅޭ ދިވެހިންނާ އެވެ. އެ ބައްދަލުވުން ވެސް އޮންނާނީ އެ މަނިކުފާނު ހުންނަވާ ހޮޓަލުގަ އެވެ.

ރައީސް މުއިއްޒުގެ މި ދަތުރުފުޅުގެ އެންމެ މުހިންމު ކަންތައްތައް އޮންނާނީ މާދަމާ އެވެ. އެއީ އިންޑިއާ އިން އެ މަނިކުފާނަށް ރަސްމީކޮށް މަރުހަބާ ދެންނެވުމާއި ބޮޑުވަޒީރު ނަރެންދުރާ މޯދީ އާއި ރައީސްގެ ބައްދަލުވުމާއި ދެ ގައުމުގެ ރަސްމީ ވާހަކަތައް އަދި އެއްބަސްވުންތަކުގައި ސޮއިކުރެއްވުމެވެ.

ރައީސް މުއިއްޒުގެ ދެކަނބަލުން އިންޑިއާގެ ދަތުރުފުޅު ފެއްޓެވުމުގެ ކުރިން ބީބީސީއަށް ދެއްވި އިންޓަވިއުއެއްގައި ވިދާޅުވީ އިންޑިއާއަކީ ރާއްޖޭގެ ތަރައްގީގައި ވަރަށް މުހިންމު ބައިވެރިއެއް ކަމަށެވެ. އަދި ރާއްޖެއަށް މިހާރު ކުރިމަތިވެފައިވާ މާލީ ހާލަތުން އަރައިގަތުމަށް ވެސް އިންޑިއާ އިން އެހީވާނެ ކަމަށް ރައީސް ވިދާޅުވި އެވެ.

ރާއްޖެ އާއި އިންޑިއާ އިން މުހިންމު އެއްބަސްވުންތަކުގައި ސޮއިކުރަން ނިންމާފައި ވިޔަސް އޭގެ ތަފުސީލެއް އަދި ހާމައެއް ނުކުރެ އެވެ.

ރައީސް މުއިއްޒުގެ ދަތުރުފުޅުގައި ދިއްލީގެ އިތުރުން މުމްބާއީ އަދި ބެންގަލޫރަށް ވެސް ވަޑައިގަންނަވާނެ އެވެ. ރައީސް ދިއްލީ އަށް ވަޑައިގެންނެވިއިރު، ދިއްލީގެ މަގުތަކުގައި ވަނީ ރާއްޖެ އާއި އިންޑިއާގެ ދިދަ ޖަހައި، މަރުހަބާ ދެންނެވުމަށްޓަކައި އެ މަނިކުފާނުގެ ފޮޓޯފުޅުތައް ހަރުކޮށްފަ އެވެ.