ވެލާނާގެ އަބްދުލްމަޖީދު މާހިރު އަވަހަރާވެއްޖެ

ދައުލަތަށް ގިނަ އަހަރުތަކެއް ވަންދެން ހިދުމަތް ކުރައްވާފައިވާ ވެލާނާގޭ އަބްދުލްމަޖީދު މާހިރު އުމުރުން 96 އަހަރުގައި މިއަދު އަވަހާރަވެއްޖެ އެވެ.

ރާއްޖޭގެ ކުރީގެ ބޮޑުވަޒީރު އަދި ރައީސް އިބްރާހީމް ނާސިރުގެ ބޮޑުބޭބޭފުޅު އަބްދުލްމަޖީދު ވަރަށް ފަހަކާ ޖެހެންދެން ވެސް އުޅުއްވީ ވަރަށް ހަރަކާތްތެރި ދިރިއުޅުއްވުމެކެވެ. ސޯޝަލް މީޑިއާގައި ވެސް އުޅުއްވި އެވެ.

އޭނާ އަވަހާރަވުމުގެ ހިތާމަ ފާޅުކުރައްވައި ރައީސް ޑރ. މުހައްމަދު މުއިއްޒު ކުރެއްވި ޓްވީޓެއްގައި ވިދާޅުވީ، ރާއްޖޭގެ އިސް ރަށްވެހީންގެ ތެރެއިން ގަދަރުވެރިކަމާއި ހިދުމަތްތެރި އަދި ތަޖުރިބާކާރު ހަރުދަނާ ޝަހުސިއްޔަތު އަވަހާރަވި ޚަބަރު އެއްސެވީ ފުން ހިތާމައާ އެކު ކަމަށެވެ.

"މަރްހޫމު މާހިރަކީ ދިވެހި ބޭސްވެރި ހަކީމެކެވެ. ދިވެހި ތާރީހާއި އާދަކާދައިގެ އެތައް މައުލޫމާތެއް މިއަދުގެ ޖީލަށް އޮޅުންފިލުއްވައިދެއްވި އުސްތާޒެކެވެ. ގައުމަށް ހިދުމަތްތެރި އިލްމީ ގާބިލް ދަރީންތަކެއް ތަރުބިއްޔަތު ކުރެއްވި އަގުހުރި ބައްޕައެކެވެ،" ރައީސް މުއިއްޒުގެ ޓްވީޓުގައިވެ އެވެ.

އަބްދުލްމަޖީދުގެ ބޭފުޅުންގެ ތެރޭގައި ކުރީގެ ޑިފެންސް މިނިސްޓަރު އަމީން ފައިސަލާއި އިނގިރޭސި ވިލާތުގައި ހުންނަވާ ރާއްޖޭގެ ސަފީރުކަން ދެ ދައުރު ކުރައްވާފައިވާ ފަރަހާޒް ފައިސަލް ހިމެނެ އެވެ. އެ ދެ ބޭފުޅުންނާއި އިބްރާހިމް ފައިސަލަކީ، އަތިރީގޭ އަމީނާ މުހައްމަދު އަމީނާއި އަބްދުލްމަޖީދު ކުރެއްވި ކައިވެނިން ލިބުނު ބޭފުޅުންނެވެ.

އޭގެ ކުރިން ކޮލިގޭ ފާތިމަތު ނާސިރާއާ ކައިވެނި ބައްލަވައިގެން ދެ ބޭފުޅުން ލިބިވަޑައިގަތެވެ. އެއީ ރާއްޖޭގެ ޓޫރިޒަމް ވިޔަފާރީގައި ކުރިން އިސްކޮށް އުޅުއްވި މަރްހޫމް މުހައްމަދު މާހިރު ދީދީ (ކޮލިގޭ މުހައްމައިދީ) އާއި ރާއްޖެ އާއި ސީޝެލްސްގެ ޓޫރިޒަމްގެ ވިޔަފާރީގައި އުޅުއްވާ އަހުމަދު މާހިރު ދީދީ (ކޮލިގޭ އަހައްމައިދީ) އެވެ.

އެންމެ ފަހުން ކައިވެނިކުރެއްވީ ހީރާ ޔޫސުފްފުޅުގެ ސައީދާއާ އެވެ. އެ ކައިވެންޏަށް ލިބިވަޑައިގަތީ މިދުހަތު މާހިރާއި ގުލްނާޒް މާހިރާއި ތޮލްއަތު މާހިރެވެ.

އަބްދުލްމަަޖީދުގެ ބައްޕައަކީ ވެލާނާ މުހައްމައިދީ އެވެ. މަންމައަކީ ފުވައްމުލަކު ފުނާޑު ގަނޑުވަރު އައިޝާ ދީދީ އެވެ. މައިފުށުން އޭނާ ނިސްބަތްވެވަޑައިގަންނަވަނީ ދިޔަމިގިލީ ދަރިކޮޅުން އެންމެ ފަހަށް ރަސްކަންކުރެެއްވި އައްސުލްތާނު މުހައްމަދު ގިޔާސުއްދީން (ޝަހީދުކުޅަ ބަންޑާރައިން) ގެ ދަރިކޮޅަށެވެ.

ރާއްޖޭގެ ތާރީހު ދިރާސާކުރައްވާ އަހުމަދު އަލާ ދީދީ ވިދާޅުވި ގޮތުގައި އަބްދުލްމަޖީދު މާހިރު އަވަހާރަވުމަކީ ރާއްޖޭގެ ތާރީހުގެ ބާބެއް ނިމިގެން ދިއުން ކަމަށެވެ

"އެމަނިކުފާނަކީ ރާއްޖޭގެ ވަރަށް ގިނަ ތާރީހީ ހާދިސާތަކާއި، ތަންތަން ދެކެވަޑައިގެން، އަތްޕުޅުން ހިއްޕެވި ބޭފުޅެއް. އެފަދަ ބޭފުޅުންގެ ތެރެއިން ވެސް އެ ކަންކަން މިއަދުގެ ޖީލަށް ކިޔައިދެވޭ ފަދަ ސިއްހަތެއްގައި މިއަދާ ހަމަޔަށް ވެސް ހުންނެވި ބޭފުޅެއް އެއީ،" އަލާ ވިދާޅުވި އެވެ.

އަބްދުލްމަޖީދު މާހިރަކީ، މުހައްމަދު ޝަމްސުއްދީނުގެ ރަސްކަން އިންގިލާބު ކޮށްލި ހާދިސާ އިން ފެށިގެން، ހަސަން ނޫރައްދީނުގެ ރަސްކަން ވެއްޓުން ފަދަ އެތައް ކަމެއް ފެނިވަޑައިގެންނެވި ބޭފުޅެކެވެ. އަދި ގަން އިނގިރޭސިންނަށް ކުއްޔަން ދޭން ނިންމި މައްސަލައިގައި އޭރުގެ ބޮޑުވަޒީރު ފާމުލަދޭރިކިލެގެފާނު އިސްތިއުފާ ދެއްވަން މަޖުބޫރުވެވަޑައިގެންނެވިއިރު، ކިލެގެފާނުގެ އަރިސް ބޭފުޅެއްގެ ގޮތުގައި ހުންނެވި އެވެ. އޭގެ ފަހުން ސިޔާސީ މައްސަލައެއްގައި ޖަލަށް ވެސް ލި އެވެ.

އަބްދުލްމަޖީދަކީ، އިބްރާހިމް ފާމުލަދޭރި ކިލެގެފާނުގެ ބޮޑުވަޒީރުކަމުގައި، އައްޑޫގައި އިނގިރޭސިން ތިބިއިރު އެ އަތޮޅުގައި ހުންނަ ލޭޒަން އޮފީހުގައި މަސައްކަތްކުރައްވާފައިވާ ބޭފުޅެކެވެ. އޭގެ ފަހުން އޭނާ ވަނީ މާލޭ މުނިސިޕަލް ކައުންސިލުގެ ރައީސްކަން ވެސް ކުރައްވައިފަ އެވެ. ނަމަވެސް އެންމެ ބޮޑު ޝައުގުވެރިކަމެއް ދެއްވައިގެން މަސައްކަތްކުރެއްވީ މާލޭގެ ފެނުގެ ނިޒާމް ގާއިމްކުރުމުގެ މަސައްކަތުގަ އެވެ. އެގޮތުން އޭރުގެ ފެނާ ބެހޭ އޮފީހުގައި ގިނަ ދުވަސްތަކެއް ހިދުމަތްކުރެއްވި އެވެ. އޭނާ ދިވެހި ބޭސްވެރިކަމުގެ މަސައްކަތް ވެސް ކުރެއްވި އެވެ. އަދި ސަގާފީ ބައެއް މަސައްކަތްތައް އާލާކުރައްވަން ވެސް މަސައްކަތްކުރެއްވި އެވެ.