ވިލާ ކޮލެޖުން 1،200 އަށް ވުރެ ގިނަ ދަރިވަރުން ދަސްވެނިވެއްޖެ

ވިލާ ކޮލެޖުގެ އެކި ޕްރޮގްރާމްތައް ނިންމި 1،237 ދަރިވަރަކު މި އަހަރު ދަސްވެނިވެއްޖެ އެވެ.

އެ ކޮލެޖުން ދަސްވެނިވުނު ދަރިވަރުންނާ ސެޓްފިކެޓު ހަވާލުކުރުމަށް އިއްޔެ ދެ ބުރެއްގެ މަތިން ޖަލްސާ ބޭއްވި އެވެ.

ހެނދުނު ބޭއްވި ރަސްމިއްޔާތުގައި ދަސްވެނިވުނީ ފެކަލްޓީ އޮފް އެޑިއުކޭޝަނަލް ސްޓަޑީޒް އާއި ފެކަލްޓީ އޮފް ހެލްތް ސައިންސާއި ފެކަލްޓީ އޮފް ޝަރީއާ އެންޑް ލޯ އާއި ގާސިމް އިބްރާހިމް ސްކޫލް އޮފް ބިޒްނަސް އަދި ސްކޫލް އޮފް ކޮމްޕިއުޓަ ސްޓަޑީޒްގެ ދަރިވަރުންނެވެ.

މެންދުރު ބޭއްވި ރަސްމިއްޔާތުގައި ދަސްވެނިވިފައިވަނީ ސެންޓަ ފޯ ޕޯސްޓް ގްރެޖުއޭޓް ސްޓަޑީޒް އާއި ފެކަލްޓީ އޮފް އެޑިއުކޭޝަނަލް ސްޓަޑީޒް އާއި ސްކޫލް އޮފް ސައިކޮލޮޖީ އާއި ފެކަލްޓީ އޮފް ޝަރީއާ އެންޑް ލޯ އާއި ފެކަލްޓީ އޮފް ހެލްތް ސައިންސަސް އަދި ގާސިމް އިބްރާހިމް ސްކޫލް އޮފް ބިޒްނަސްގެ ދަރިވަރުންނެވެ.

ވިލާ ކޮލެޖުން ބުނި ގޮތުގައި މި އަހަރު 53 ޕްރޮގްރާމަކުން ދަރިވަރުން ދަސްވެނިވުނެވެ. އޭގެ ތެރެއިން 15 ޕްރޮގްރާމެއް ހިންގީ ޔުނިވާސިޓީ އޮފް ދަ ވެސްޓް އޮފް އިންގްލޭންޑާ ގުޅިގެންނެވެ. އަދި 38 ޕްރޮގްރާމް ހިންގީ ސީދާ ވިލާ ކޮލެޖުންނެވެ.

އެ ކޮލެޖުން މި ފަހަރު ދަސްވެނިވުނު ދަރިވަރުންގެ ތެރެއިން 71 ޕަސެންޓަކީ އަންހެން ދަރިވަރުންނެވެ. އަދި 29 ޕަސެންޓަކީ ފިރިހެން ދަރިވަރުންނެވެ.

ވިލާ ކޮލެޖުގެ ދަސްވެނިވުނު ހަފުލާގައި އެ ކޮލެޖުގެ ވައިސް ރެކްޓަ ޑރ. އަލީ ނަޖީބު ވަނީ ދަރިވަރުން ކިޔެވި ދާއިރާތަކުން ކުރިއަށް ދިއުމަށް ހިތްވަރު ދެއްވައިފަ އެވެ.

ޑރ. ނަޖީބު ވިދާޅުވީ ވިލާ ކޮލެޖަކީ ދަރިވަރުންގެ ކިޔެވުން ފުރިހަމަ އަށް ކުރިއަށް ގެންދިއުމަށް ހިތްވަރުދޭ ތައުލީމީ މުއައްސަސާއެއް ކަމަށެވެ. މިދިޔަ އަހަރާ ބަލާއިރު ދަސްވެނިވިފައިވާ ދަރިވަރުންގެ އަދަދު 10 ޕަސެންޓު އިތުރުވެފައިވާ ކަމަށް ވެސް ވިދާޅުވި އެވެ.

ވިލާ ކޮލެޖުގެ ރެކްޓަރ ޑރ. އަހުމަދު އަންވަރު ވިދާޅުވީ ވިލާ ކޮލެޖުގެ ޕްރޮގްރާމްތައް ފަރުމާކޮށްފައި ވަނީ އެ ޕްރޮގްރާމްތަކުގެ ތެރެއިން ނުވަތަ އެ ޕްރޮގްރާމްތައް ނިންމުމުން ދަރިވަރުންގެ ކިބައިގައި ހުންނަންޖެހޭ ގްރެޖުއޭޓް އެޓްރިބިއުޓްތައް އަށަގަންނަ ގޮތަށް ކަމަށެވެ. މި ސިފަތަކުގެ ތެރޭގައި ހިމެނޭ އިލްމު ހޯދުމުގެ ގާބިލުކަމާއި ކަންކަން ތަރައްގީކޮށް، ކުރިއެރުވުމުގެ ރޫހާއި ފަންނީ ގާބިލުކަން ދަރިވަރުންގެ ކިބައިގައި އަށަގެންފައިވާނެ ކަމަށާއި އޭގެ ސަބަބުން ދިރިއުޅުމަށް ވެސް އޭގެ ހެޔޮ އަސަރުކުރާނެ ކަމަށް ވިދާޅުވި އެވެ.

އިއްޔެގެ ރަސްމިއްޔާތުތަކުގައި ޔުނިވަސިޓީ އޮފް ދަ ވެސްޓް އޮފް އިންގްލެންޑްގެ ވައިސް ޗާންސެލާ ސްޓީވެން ވެސްޓް ވެސް ބައިވެރިވެވަޑައިގެންނެވި އެވެ. އޭނާ ވަނީ ވިލާ ކޮލެޖަކީ ރާއްޖޭގައި ކިޔެވުމަށް އެންމެ ރަނގަޅު އެއް ކޮލެޖުކަމުގައި ވިދާޅުވެފަ އެވެ.