އެކި ދާއިރާތަކުން ބޭރުގެ އިންވެސްޓްމެންޓްތަކަށް ފުރުސަތު ފަހިކުރަން އިސްކަންދެން: ރައީސް

ރާއްޖެއިން މިވަގުތު އެންމެ ބޮޑު އިސްކަމެއް ދެނީ އިގްތިސާދު އެހެން ދާއިރާތަކުން ފުޅާކޮށް، ބޭރުގެ އިންވެސްޓަރުންނަށް މިހާރަށް ވުރެ ފަހި ފުރުސަތުތަކެއް ހޯދައި ދިނުމަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އދ. ގެ އާއްމު މަޖިލީހުގައި ބައިވެރިވެވަޑައިގަތުމަށް ކުރެއްވި ދަތުރުފުޅުގެ ތެރެއިން، އެމެރިކާގެ މަޝްހޫރު ޕްރިންސްޓަން ޔުނިވާސިޓީގައި ވާހަކަފުޅު ދައްކަވަމުން ރައީސް ވިދާޅުވީ، އިންވެސްޓަރުންނަށް މިހާރަށް ވުރެ ފަސޭހައިން ފުރުސަތުތައް ހޯދައިދިނުމަށް ބޭރުގެ ފަރާތްތަކަށް ރާއްޖޭގައި އިންވެސްޓްކުރެވެން ހުރި ދާއިރާތައް ޕްރޮމޯޓްކުރަން ހާއްސަ އިސްކަމެއް ދެއްވާ ކަމަށެވެ. ފޮރިން އިންވެސްޓްމަންޓްގެ އާ ގާނޫނަކަށް މިދިޔަ މަހު އަމަލުކުރަން ފަށާފައިވާ ކަން ވެސް ރައީސް ފާހަގަކުރެއްވި އެވެ.

ރައީސް ވިދާޅުވި ގޮތުގައި އާ އިންވެސްޓްމެންޓްތަކުގެ ފުރުސަތުތައް، ޒަމާނީ ޓެކްނޮލޮޖީތަކާ ގުޅޭ ދާއިރާތަކުން ވެސް ރާއްޖެއަށް އަންނާނެ ގޮތްތަކެއް އެ ގާނޫނުގެ ތެރެއިން ފަހިވާނެ އެވެ.

އެމަނިކުފާނު ވިދާޅުވީ، ކުދި ގައުމުތަކަށް ދިމާވެފައިވާ މައްސަލަތަކަށް ހަގީގީ ހައްލެއް ލިބެން އޮތީ އެ ގައުމުތަކުގެ އުފެއްދުންތެރިކަން އިތުރުކޮށް، އިގްތިސާދުތައް ފުޅާކޮށްގެން ކަމަށެވެ. އެކަން ކުރުމަށްޓަކައި ކުދި ގައުމުތަކަށް ކްލައިމެޓް ފައިނޭންސް ލިބުން ވަރަށް ބޮޑަށް ފަސޭހަވާން ޖެހޭ ކަމަށް ރައީސް ވިދާޅުވި އެވެ.

ރާއްޖެއަކީ ވޭތުވެދިޔަ ވިއްސަކަށް އަހަރު، ތިމާވެށީގެ މައްސަލަތަކާއި މުޅި ދުނިޔެ ހޭލުންތެރިކުރަން އެންމެ ބޮޑަށް ވަކާލާތު ކުރި އެއް ގައުމުކަން ފާހަގަކުރައްވައި ރައީސް ވިދާޅުވީ، ކުރިއަށް އޮތްތަނުގައި ވެސް ރާއްޖޭގެ ތަރައްގީގެ ޕްލޭންތައް ރާވަނީ، ތިމާވެއްޓާ އެންމެ ރައްޓެހި ގޮތްތައް ބަލައިގެން ކަމަށެވެ. މުހިއްމު ބަދަލެއްގެ ގޮތުގައި، 2028 ވަނަ އަހަރު އަންނަ އިރު ރާއްޖޭގައި ކަރަންޓު އުފެއްދުމަށް ބޭނުން ކުރާ 33 ޕަސެންޓު ހަކަތަ، އިޔާދަކުރަނިވި ހަކަތައަށް ހެދުމުގެ އަމާޒެއް އެބަ އޮތް ކަމަށް ވެސް ރައީސް ވިދާޅުވި އެވެ.

"ސިޑްސްގެ ގައުމުތަކަށް ކްލައިމެޓް އެޑޮޕްޓޭޝަން ފައިނޭންސް ފަސޭހައިން ލިބޭނެ ގޮތްތައް ހޯދުމަށް ރާއްޖެއިން މި އަންނަނީ މަސައްކަތް ކުރަމުން. ކުދި ގައުމުތަކަށް އެފަދަ ފަންޑުތައް ރަނގަޅު ރޭޓުތަކެއްގައި ލިބެން ޖެހޭ،" އޭނާ ވިދާޅުވި އެވެ.

ރައީސް ވިދާޅުވި ގޮތުގައި ކުދި ގައުމުތައް ތަރައްގީވުމަކީ މުޅި ދުނިޔޭގައި ހުރި ތިމާވެށީގެ މައްސަލަތަކަށް ހައްލުތަކެއް ހޯދަން މުހިއްމު ކަމެއް ކަމެކެވެ. ރާއްޖޭގެ ރައީސް ކަމާ އެމަނިކުފާނު ހަވާލުވެވަޑައިގެން ވެސް އެންމެ ބޮޑު އިސްކަމެއް ދެއްވި އެއް ކަމަކީ ރާއްޖޭގެ ތިމާވެށީގެ މައްސަލަތަކަށް އަވަސް ހައްލުތަކެއް ހޯދުމަށް ކަމަށް ވިދާޅުވި އެވެ.

"ކުދި ގައުމުތަކުން މިހާރު ވެސް އަންނަނީ ދުނިޔޭގެ 20 ޕަސެންޓް، ބައޯޑައިވާސިޓީގެ ރައްކާތެރިކަމަށް މަސައްކަތް ކުރަމުން. އެ ގައުމުތަކުގައި ދުނިޔޭގެ 40 ޕަސެންޓް ފަރުތައް އެބަހުރި. އެގައުމުތަކުން ތިމާވެށީގެ މައްސަލަތަކަށް ހައްލުހޯދައި، އެކަމަށް ބޭނުންވާ ރިސާޗުތައް އެބަ ހަދާ،" ރައީސް ވިދާޅުވި އެވެ.

ރައީސްގެ ވާހަކަފުޅުގައި ވަނީ ސަރުކާރުން ތަރައްގީ ކުރަން ނިންމާފައިވާ "ރަސްމާލެ" ވެސް ތިމާވެއްޓާ ރައްޓެހި، އެންމެ ޒަމާނީ ޓެކްނޮލޮޖީތައް ހިމެނޭ ސްމާޓް ސިޓީއެއް ހެދުމަށްޓަކައި އަމާޒު ހިފާފައި ކަން ފާހަގަކުރައްވައިފަ އެވެ.