އިޒްރޭލުގެ ހަމަލާތަކުގައި ލުބްނާނުން މަރުވި އަދަދު 500 އަށް

ލުބްނާންގައި ހިޒްބުﷲ ޖަމާއަތުގެ ބާރު އޮންނަ ސަރަހައްދުތަކަށް އިއްޔެ ދިން ހަމަލާތަކުގައި މަރުވި މީހުންގެ އަދަދު އެންމެ މަދުވެގެން ވެސް މިހާރު 492 އަށް އަރާފައިވާ ކަމަށްވާ ހެލްތު މިނިސްޓްރީން ބުނެފި އެވެ.

ފަލަސްތީނުގެ ޣައްޒާގައި އިޒްރޭލުން ހިންގަމުންދާ ގަތުލްއާންމުގެ ބަދަލު ހިފަން ހިޒްބުﷲ އިން ބޯޑަރު ހުރަސްކޮށް އިޒްރޭލަށް ދެމުންދާ ހަަމަލާތައް ހުއްޓުވާނެ ކަމަށް ބުނެ އިޒްރޭލުން ދޭން ފެށި ހަމަލާތަކުގައި މަރުވި މީހުންގެ ތެރޭގައި 35 ކުޑަކުދިން ވެސް ހިމެނެ އެވެ.

ޣައްޒާގައި ދެމުންދާ ހަމަލާތައް މުޅި ސަރަހައްދަށް ފެތުރިދާނެ ކަމުގެ ކަންބޮޑުވުން އޮއްވައި ދޭން ފެށި މި ހަމަލާތަކަކީ އިޒްރޭލުގެ ލާއިންސާނީ އަމަލުތައް އިތުރަށް ފުޅާކުރުން ކަމަށް ބުނެ އަރަބި ގައުމުތަކުން ވަނީ އެކަން ކުށްވެރިކޮށްފަ އެވެ.

މިދިޔަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސް އިން އިޒްރޭލަށް ހަމަލާދީ ހާހަކަށްވުރެ ގިނަ މީހުން މަރާލުމާ އެކު އިޒްރޭލުން ޣައްޒާއަށް ހަމަލާދޭން ފެށުމުން ހިޒްބުﷲ އިން ވެސް ދިޔައީ އިޒްރޭލަށް ރޮކެޓާއި މިސައިލުން ހަމަލާ ދެމުންނެވެ.

އިޒްރޭލުން ބުނީ އިއްޔެ ލުބްނާންގައި ދިން ހަމަލާތައް އަމާޒުކުރި ހިޒްބުﷲގެ ހަނގުރާމަވެރިންގެ މަގާމުތަކަށް ކަމަށެވެ. މި ހަމަލާތައް 1،600 ތަނަކަށް އަމާޒުކުރި ކަމަށާއި މީގެ ތެރެއިން ބައެއް ހަމަލާތަކަކީ ހިޒްބުﷲގެ ވަކިވަކި މީސްމީހުންނަށް އަމާޒުކޮށްގެން ދިން ހަމަލާތަކެއް ކަމަށް ވެސް ބުންޏެވެ.

ލުބްނާންގެ ވެރިރަށް ބައިރޫތުގައި "އޮޕަރޭޝަން ނޯތު އެރޯ" ގެ ނަމުގައި އިޒްރޭލުން ހިންގި އޮޕަރޭޝަނެއްގައި ހިޒްބުﷲގެ ތިން ވަނަ އަށް އެންމެ އިސް ކޮމާންޑަރު އަލީ ކަރާކީ އަށް ހަމަލާއެއް އަމާޒުކުރި އެވެ. ހިޒްބުﷲ އިން ބުނީ އޭނާ ސަލާމަތްވި ކަމަށާއި މިހާރު ވަނީ ރައްކާތެރި ހިސާބަކަށް ގެންގޮސްފައިވާ ކަމަށެވެ.

ލުބްނާންގެ ގައުމީ ޓީވީން ބުނި ގޮތުގައި އިޒްރޭލުން ގެންދަނީ އިރުމަތީ ސަރަހައްދުތަކަށް ވެސް ހަމަލާ ދެމުންނެވެ. އަނެއްކޮޅުން ހިޒްބުﷲ އިން ވަނީ އިޒްރޭލުގެ ފަސް ތަނަކަށް ހަމަލާ ދީފައިވާ ކަމަށް ބުނެފަ އެވެ. ހިޒްބުﷲގެ ހަމަލާތަކުން ސަލާމަތްވާން އިޒްރޭލުގެ ހައިފާގައި އާންމުން އުޅޭ މަންޒަރުތައް ފެނިފައިވެ އެވެ.

ލުބްނާނުގެ ހެލްތު މިނިސްޓްރީން ބުނީ އިޒްރޭލުގެ ހަމަލާތަކުގައި 35 ކުޑަކުދިންނާއި 58 އަންހެނުންނާ އެކު 492 މީހުން މަރުވެ 1،645 މީހަކު ޒަހަމްވެފައިވާ ކަމަށެވެ. ހެލްތް މިނިސްޓަރު ފިރާސް އަބިއާދު ވިދާޅުވީ އެތައް ހާސް އާއިލާއެއްގެ ގެދޮރު ގެއްލިފައިވާ ކަމަށެވެ.

ޣައްޒާ އާއި އިޒްރޭލުގެ ދެކުނު ބޯޑަރުން ލުބުނާންގެ އުތުރުގައި ހަމަނުޖެހުންތައް ވަރުގަދަވުމާ އެކު ދުނިޔޭގެ ބާރުތަކުން އިޒްރޭލާއި ހިޒްބުﷲ އިން ހަނގުރާމައާ ދުރުވާން ދަނީ ގޮވާލަމުންނެވެ. -- އޭއެފްޕީ