ޣައްޒާ އާއި ލުބްނާންގެ މައްސަލައިގައި ސައޫދީ އާއި އުރުދުންގެ ވެރިން ބައްދަލުކުރައްވައިފި

ޣައްޒާ އާއި ލުބްނާންގައި ހިންގަމުންދާ ހަމަނުޖެހުންތައް ހުއްޓުވަން ކުރެވިދާނެ މަސައްކަތާ ބެހޭ ގޮތުން، ސައޫދީ އަރަބިއްޔާގެ ވެރިކަމުގެ ބާރުތައް ތަންފީޒުކުރައްވަމުން ގެންދަވާ ވަލީ އަހުދު މުހައްމަދު ބިން ސަލްމާނާއި އުރުދުންގެ ރަސްގެފާނު އަބްދުﷲ، އަންގާރަ ދުވަހު މަޝްވަރާކުރައްވާފައިވާ ކަމަށް ސައޫދީގެ ފޮރިން މިނިސްޓްރީން ބުނެފި އެވެ.

އުރުދުންގެ ރަސްގެފާނު ސައޫދީގެ ވެރިރަށް ރިޔާދަށް ކުރެއްވި ދަތުރުގައި، "ސަރަހައްދުގެ ސަލާމަތާއި ރައްކާތެރިކަމާ ގުޅޭގޮތުން، އަދި ޣައްޒާ އަދި ލުބްނާންގައި ހަނގުރާމަ ހުއްޓުވުމަށާއި ގެއްލުންތައް ކުޑަކުރުމަށް ކުރެވޭ މަސައްކަތްތަކާ" ގުޅޭގޮތުން މަޝްވަރާކުރެއްވިކަމަށް ފޮރިން މިނިސްޓްރީން ބުންޏެވެ.

އަރަބި ދެ ވެރިންގެ ބައްދަލުވުން މި ބޭއްވީ، ޣައްޒާ އަދި ލުބްނާންގައި އިޒްރޭލުން ދެމުން ގެންދާ ހަމަލާތައް ހުއްޓުވުމަށް ކުރާ މަސައްކަތުގައި އެމެރިކާއިން ވެސް އަލުން މަސައްކަތް ފަށާފައި ވަނިކޮށެވެ.

އެމެރިކާގެ ސެކްރެޓަރީ އޮފް ސްޓޭޓް އެންޓަނީ ބްލިންކަން މިއަދު އުރުދުން އަށް ވަޑައިގަންނަވާނެ އެވެ. އެއީ އިޒްރޭލުން ޣައްޒާއަށް ދެމުން ގެންދާ ހަމަލާތަކާ ހެދި އާންމުން ހާލުގައި ޖެހިފައި ތިބި އިރު އެ މީހުންނަށް އިންސާނީ އެހީ ފޯރުކޮށްދިނުމަށް ހުރަސްއެޅިފައިވާތީ އެކަމާ ގުޅޭ ގޮތުން މަޝްވަރާކުރެއްވުމަށެވެ.

އުރުދުންގެ ރަސްގެފާނުގެ ގަނޑުވަރުން ބުނީ، ސައޫދީ އަދި އުރުދުންގެ ވެރިން "ޣައްޒާ އަދި ލުބްނާންގައި ހަނގުރާމަ ހުއްޓުވުމަށާއި ގެއްލުންތައް ކުޑަކުރުމަށް ކުރެވޭ މަސައްކަތްތައް އިތުރުކުރަން ޖެހޭކަން" ފާހަގަކުރެއްވި ކަމަށެވެ.

ފަލަސްތީނުގެ ޣައްޒާގައި ހަމާސްއާ ދެކޮޅަށް ކަމަށް ބުނެ އިޒްރޭލުން ދެމުން ގެންދާ ހަމަލާތަކަށް އަހަރަކަށްވުރެ ގިނަ ދުވަސްވެފައި ވާއިރު އިޒްރޭލުން މިހާރު އަމާޒުކުރަނީ ލުބްނާންގެ ހިޒްބުﷲ އަށެވެ.