ޓެލެގްރާމްގައި ކުށުގެ އަމަލުތައް ހިންގުން ހުއްޓުވަން ފީޗާތަކެއް ހިމަނަނީ

ޓެލެގްރާމްގައި ކުށުގެ އަމަލުތައް ހިންގުމަށް ފުރުސަތުދޭ ކަމަށް ބުނެ ފްރާންސުން އެ ކުންފުނީގެ ބާނީ އަދި ޗީފް އެގްޒެކެޓިވް ޕަވެލް ޑްރޯވް ހައްޔަރުކޮށް ދައުވާ އުފުލިތާ ހަފްތާއެއް ފަހުން ބޭއަދަބީ ކޮންޓެންޓާއި ބޮޓް އަދި މަކަރާއި ހީލަތުގެ އަމަލުތައް ހިންގުމާ ދެކޮޅަށް އާ ފީޗާތަކެއް އިއުލާނުކޮށްފި އެވެ.

ޑްރޯވް ހައްޔަރުކޮށް ހަތަރު ދުވަސް ފަހުން ދޫކޮށްލި ފަހުން މިދިޔަ ބުރާސްފަތި ދުވަހު ފުރަތަމަ ފަހަރަށް އެކަމާ ގުޅޭ ގޮތުން ކުރި ޕޯސްޓެއްގައި ބުނީ އޭނާ ހައްޔަރުކޮށް ދައުވާކުރީ ރަނގަޅު މައުލޫމާތުގެ މައްޗަށް ނޫން ކަމަށާއި ފްރާންސްގެ އެ ނިންމުމާ މެދު ހައިރާންވާ ކަމަށެވެ.

ނަމަވެސް އޭނާ ބުނީ ޓެލެގްރާމަކީ "ފުރިހަމަ އެއްޗެއް ނޫން" ކަން ގަބޫލުކުރާ ކަމަށެވެ. އޭނާ ބުނި ގޮތުގައި ގާނޫނުތަކާއި އުސޫލުތަކާ ހިލާފަށް ކޮންޓެންޓް ބޭނުންކުރަނީ ޓެލްގްރާމް ބޭނުންކުރާ 950 މިލިއަން މީހުންގެ ތެރެއިން ވަރަށް މަދު ބައެއް ކަމަށެވެ. އެކަމަކު އެ މަދު މީހުންގެ އަމަލުތަކާ ދެކޮޅަށް ވެސް ފިޔަވަޅު އަޅާނެ ކަމަށް ބުންޏެވެ.

"ޓެލެގްރާމް ބޭނުންކުރާ މީހުންގެ ތެރެއިން 99.999 ޕަސެންޓަކީ މިފަދަ ކުށުގެ އަމަލުތަކާ އެއްވެސް ގުޅުމެއް ނެތް މީހުން. މަނާ ކަންކަމުގައި ބައިވެރިވާ 0.001 ޕަސެންޓް މީހުންގެ ސަބަބުން މުޅި ޕްލެޓްފޯމަށް ނުބައި ތަސައްވުރެއް އުފެދި، ގާތްގަނޑަކަށް ބިލިއަން ކަސްޓަމަރުންގެ މަސްލަހަތު ނުރައްކަލަށް ހުށަހެޅިގެންދޭ،" ޓެލެގްރާމްގައި އާންމުކުރި ބަޔާނެއްގައި ބުންޏެވެ.

އޭނާ ބުނީ ޓެލެގްރާމްގެ ކޮންޓެންޓް މޮޑެރޭޓްކުރުމާ ގުޅޭ ގޮތުން ހުރި ފާޑުކިޔުންތައް މި އަހަރު ތައުރީފަށް ބަދަލުކުރުމަށް އަޒުމު ކަނޑައަޅާފައިވާ ކަމަށެވެ.

ޑްރޯވް ބުނީ ޓެލެގްރާމް ބޭނުންކުރާ، ކައިރީގައި އުޅޭ މީހުން ދެނެގަނެވޭ "ޕީޕަލް ނިއާބައި" ފީޗާ މިހާރު އުވާލާފައިވާ ކަމަށާއި އެކަމަކު އެ ފީޗާ ބޭނުންކުރަނީ ވެސް ޓެލެގްރާމް ބޭނުންކުރާ މީހުންގެ ތެރެއިން 0.1 ޕަސެންޓަށް ވުރެ މަދު މީހުން ކަމަށެވެ. އެއީ ވެސް ބޮޓް އަދި ސްކޭމްކުރާ މީހުން ބޭނުންކުރި ފީޗާއެއް ކަމަށް ބުންޏެވެ.

އޭގެ ބަދަލުގައި ޓެލެގްރާމުން ވަނީ ކައިރީގައި ހުރި ސައްހަ ވިޔަފާރިތައް ބަލައިލެވޭ ގޮތަށް "ބިޒްނަސަސް ނިއާބައި" ތައާރަފްކުރުމުގެ މަސައްކަތް ފަށައިފައެވެ.

ހަރުކަށި ފިކުރާއި ގާނޫނާ ހިލާފު ކޮންޓެންޓްތައް ހުއްޓުވުމުގައި ޓެލެގްރާމް އިހުމާލުވެފައިވާ ކަމަށް ބުނެ ޑްރޯވް، 39، ހައްޔަރުކޮށް ގިނަ ދައުވާތަކެއް ވަނީ އުފުލައިފަ އެވެ.

ޑްރޯވް ފަސް މިލިއަން ޔޫރޯ (5.5 މިލިއަން ޑޮލަރު) ގެ ކަފާލާތަކަށް ދޫކޮށްލާފައި ހުރީ ހަފުތާއަކު ދެ ފަހަރު ޕޮލިސް ސްޓޭޝަނަކަށް ރިޕޯޓް ކުރުމަށާއި ފްރާންސުން ބޭރަށް ނުދިއުމަށް ޝަރުތުކޮށްފަ އެވެ. މި މައްސަލައާ ބެހޭ ގޮތުން ޑްރޯވް ބުރާސްފަތި ދުވަހު ބުނީ "ޕްލެޓްފޯމުގައި ތިން ވަނަ ފަރާތަކުން ހިންގާ ޖަރީމާތަކަށް" އޭނާ ޖަވާބުދާރީ ކުރުވުމަކީ ފްރާންސުން ހެދި ގޯހެއް ކަމަށެވެ.

މަދުން ނޫނީ އާންމުކޮށް ވާހަކަ ނުދައްކާ ޑްރޯވް އަކީ ރަޝިއާ، ފްރާންސް އަދި ޔުނައިޓެޑް އަރަބް އެމިރޭޓްސްގެ ރައްޔިތެކެވެ. ފޯބްސް މަޖައްލާއިން އަންދާޒާ ކުރާ ގޮތުގައި އޭނާގެ މިހާރުގެ މިލްކިއްޔާތު 15.5 ބިލިއަން ޑޮލަރަށް އަރަ އެވެ. -- އޭއެފްޕީ