ރާއްޖެ އަށް ޕޭޕަލް ތައާރަފު ކުރުމުގެ ޕްރޮޕޯޒަލް ފޮނުވައިފި

ދުނިޔޭގެ އެކި ސަރަހައްދުތަކުން ފައިސާ ފޮނުވާ އަދި ފައިސާ ލިބިގަތުމަށް ބޭނުންކުރާ މަޝްހޫރު ޕޭމަންޓް ސިސްޓަމް "ޕޭޕަލް" ރާއްޖެ އަށް ތަރާއަފު ކުރުމަށްޓަކައި ދިވެހި ސަރުކާރުގެ ޕްރޮޕޯޒަލް މިދިޔަ ހަފުތާގައި އެ ކުންފުންޏަށް ހުށަހަޅާފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު ރޭ ވިދާޅުވެއްޖެ އެވެ.

ޓީވީއެމްގެ "ރާއްޖެ މިއަދު" ގައި ވާހަކަ ދައްކަވަމުން މިނިސްޓަރު ވިދާޅުވީ، ދިވެހި ސަރުކާރުގެ "ފުލް ޕްރޮޕޯޒަލް" ޕޭޕަލް އަށް ފޮނުވީ މީގެ ތިން ދުވަސް ކުރިން ކަމަށެވެ.

"އަޅުގަނޑުމެން މި އިންތިޒާރު ކުރަނީ ވަރަށް އަވަހަށް އިރާދަކުރެއްވިއްޔާ ކޮންމެވެސް ކަހަލަ އެއްބަސްވުމަކަށް އަޅުގަނޑުމެންނަށް އާދެވޭނެ ކަމަށް. ސީދާ އަޅުގަނޑު ނެތިން ދަންނަވާކަށް މިވެނި ދުވަހަކުއޭ ޕޭޕަލްގެ ހިދުމަތް ރާއްޖޭގައި ފެއްޓޭނީ. އެހެން ނަމަވެސް އިރާދަކުރެއްވިއްޔާ ޕޭޕަލް ރާއްޖެ އަށް ގެނެވޭނެ އަޅުގަނޑުމެންނަށް،" ސައީދު ވިދާޅުވި އެވެ.

ޕޭޕަލްގެ އެކްސެސް ރާއްޖެ އަށް ހޯދުމަށް ހުރި ދަތިތައް ހައްލުކުރުމަށް މިނިސްޓަރު ސައީދު މިދިޔަ މަހުގެ 22 ގައި ވަނީ އެ ކުންފުނީގެ އިސް ވެރިންނާ އޮންލައިންކޮށް މަޝްވަރާ ކުރައްވައިފަ އެވެ. އެ މަޝްވަރާތައް ދިވެހި ސަރުކާރުން ކުރިއަށް ގެންދިޔައީ އެ ކުންފުނީގެ ގްލޯބަލް މާކެޓިންގެ ރައީސާ އެކު އެވެ.

ރާއްޖެ އަށް ޕޭޕަލްގެ ހިދުމަތް ތައާރަފްކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެ ހިދުމަތް ގެނައުމަށްޓަކައި މި ސަރުކާރު އައި ފަހުން ވަނީ އެމެރިކާގެ ސަރުކާރާއި ކަމާ ގުޅޭ އެކި ފަރާތްތަކާ އެކު މަޝްވަރާތައް ކޮށްފަ އެވެ.

ސައީދު ވެސް ރޭ ވިދާޅުވި ގޮތުގައި، ޕޭޕަލް ކުންފުނީގެ އިސްވެރިންނަށް ރާއްޖެ އަށް ތައާރަފު ކުރުމުގައި އެމެރިކާގެ ދައުރު ވަރަށް ބޮޑެވެ. މިނިސްޓަރު ވިދާޅުވީ، އޭނާ އެންމެ ފަހުން ވޮޝިންޓަނަށް ކުރެއްވި ދަތުރުގައި ވެސް ރާއްޖެ އާއި ޕޭޕަލް ގުޅުވައި ދިނުމަށް އެމެރިކާ ސަރުކާރުގެ އިސްވެރިންގެ އެހީތެރިކަން ލިބުނު ކަމަށެވެ.

ސަައީދު ވިދާޅުވީ، ޕޭޕަލްގެ އިސްވެރިންނާ އެކު ކުރެއްވި މަޝްވަރާތަކުގެ ސަބަބުން ރާއްޖޭގެ މާކެޓާ ގުޅޭ ގޮތުން ކުރިން އޮޅުން ނުފިލާ ވަރަށް ގިނަ ކަންކަން އެ ބޭފުޅުންނަށް އޮޅުން ފިލި ކަމަށެވެ.

"ރާއްޖެ މިހާރު އައިސްފައި އޮތް ހިސާބާއި ހާއްސަކޮށް ޑިޖިޓަލް ސްޕޭސްގެ ތަރައްގީ އާއި މި ހުރިހާ އެއްޗަކަށް ބަލާއިރުގައި ވަރަށް ބޮޑު އެއްޗެއް އެ ބޭފުޅުންނަށް ވެސް ކުރިން އޮޅުން ނުފިލާ އެއްޗެހިތަކެއް އޮޅުން ފިލާ ދިޔަ،" މިނިސްޓަރު ވިދާޅުވި އެވެ.

ޕޭޕަލް މެދުވެރިކޮށް ފައިސާ ލިބޭނެ މަގުފަހި ކުރުމުގެ ގޮތުން، ބޭރުގެ މަނީ ޓްރާންސްފާ ޕްލެޓްފޯމްތަކާއި ޑިޖިޓަލް ވޮލެޓްގެ ހިދުމަތް ބޭންކް އޮފް މޯލްޑިވްސް (ބީއެމްއެލް) އިން ވަނީ މިދިޔަ މާޗް މަހު ފަށައިފަ އެވެ.

ޕޭޕާލްގެ އިތުރުން ޕެޔޮނިޔާ، ސްކްރިލް، ސްޓްރައިޕް އަދި ނެޓެއްލާ ރާއްޖެއަށް ގެންނަން ރައީސްގެ މުއިއްޒުގެ މެނިފެސްޓޯގައި ވަނީ ހިމަނައިފަ އެވެ.