90 ޕަސެންޓަކީ އާރުޓީއައި އަށް އެއްވެސް ޖަވާބެއް ނުދީގެން ހުށަހަޅާ މައްސަލަތައް: އައިކޮމް

އިންފޮމޭޝަން ކޮމިޝަން (އައިކޮމް) އަށް ހުށަހަޅާ މައްސަލަތަކުގެ 90 ޕަސެންޓަކީ މައުލޫމާތު ހޯދައި ލިބިގަތުމުގެ ގާނޫނުގެ ދަށުން އާރުޓީއައި ފޯމު ހުށަހަޅައިގެން އިދާރާތަކުން އެއްވެސް ޖަވާބެއް ނުދީގެން ހުށަހަޅާ މައްސަލަތައް ކަމަށް އެ ކޮމިޝަނުން މިއަދު ބުނެފި އެވެ.

އައިކޮމްގެ މަސައްކަތްތަކާ ގުޅޭ މައުލޫމާތު ހޯދުމަށްޓަކައި ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް މިއަދު ވަނީ އެ ކޮމިޝަންގެ އިސްވެރިން ހާޒިރުކޮށްފަ އެވެ.

އެ ބައްދަލުވުމުގައި އިންފޮމޭޝަން ކޮމިޝަނަރު އަހުމަދު އާހިދު ރަޝީދު ވިދާޅުވީ، މި އަހަރުގެ ފުރަތަމަ ހަ މަސްދުވަހު އެވްރެޖުކޮށް މަހަކު 35 މައްސަލަ އެ ކޮމިޝަނަށް ހުށަހަޅާފައިވާ ކަމަށެވެ. އޭގެ ތެރެއިން ގިނަ މައްސަލަތަކަކީ އިދާރާތަކުން އެއްވެސް ޖަވާބެއް ނުލިބިގެން ނުވަތަ މައުލޫމާތަށް އެދިގެން ދޭ ޖަވާބާ މެދުގައި ހިތްހަމަނުޖެހިގެން ހުށަހަޅާ މައްސަލަތައް ކަމަށް އޭނާ ވިދާޅުވި އެވެ.

"ހުށަހެޅޭ މައްސަލަތަކުގެ ތެރެއިން 90 ޕަސެންޓް މައްސަލައަކީ އިދާރާތަކުން އެއްވެސް ޖަވާބެއް ނުދީގެން ހުށަހެޅޭ މައްސަލަތައް،" އޭނާ ވިދާޅުވި އެވެ.

މީގެ ސަބަބުން ކޮމިޝަންގެ މަސައްކަތްތަކަށް ވެސް ވަރަށް ބުރަ ބޮޑުވާ ކަމަށް އޭނާ ވިދާޅުވި އެވެ.

އާހިދު ވިދާޅުވި ގޮތުގައި، ކޮމިޝަނުގެ މުވައްޒަފުންގެ އަދަދު 2017 ވަނަ އަހަރުން ފެށިގެން އިތުރު ނުވެ އެވެ. މިދިޔަ 10 އަހަރު ދުވަހުގެ ތެރޭގައި ކޮމިޝަނަށް ހުށަހަޅަމުންދާ މައްސަލަތައް ވަރަށް ބޮޑަށް އިތުރުވި ނަމަވެސް، އެ މުއްދަތުގައި މުވައްޒަފުންގެ އަދަދު މަތި ނުވާތީ މައްސަލަތައް ބެލުމަށް ވަރަށް ބޮޑެތި ގޮންޖެހުންތަކާ ކުރިމަތިވެފައިވާ ކަމަށް އޭނާ ވިދާޅުވި އެވެ.

ކޮމިޝަނަށް ހުށަހަޅާ މައްސަލަތައް 30 ދުވަހުގެ ތެރޭގައި ނިންމަން ޖެހޭއިރު، މަދު މުވައްޒަފުން ކޮޅަކާ އެކު މައްސަލަތައް އަވަހަށް ނިންމަން ދަތިވާ ކަމަށް އޭނާ ވިދާޅުވި އެވެ.

"ވަރަށް ބޮޑު ގޮންޖެހުމެއްގެ ތެރޭގައި އަޅުގަނޑުމެން މަސައްކަތް ކުރަމުން މި ދަނީ،" އޭނާ ވިދާޅުވި އެވެ.

އޭނާ ވިދާޅުވީ ޖަވާބު ނުދެވޭ އެކިއެކި ސަބަބުތައް އިދާރާތަކުން ވެސް ދައްކާ ކަމަށެވެ.

"ބައެއް އިދާރާތަކުން ބުނަނީ އެ ފަރާތުގެ ވެސް ނެތޭ އެހާ ވަސީލަތްތަކެއް މި ބުނާ މުއްދަތުގެ ތެރޭގައި ޖަވާބު ފޯރުކޮށްދޭން. އާންމުކޮށް އިދާރާތަކުން ފާހަގަކުރާ ސަބަބެއް އެއީ،" އޭނާ ވިދާޅުވި އެވެ.

އާހިދު ވިދާޅުވި ގޮތުގައި، މި އަހަރުގެ މިހާތަނަށް އެ ކޮމިޝަނުން އަންނަނީ 258 މައްސަލައެއް ބަލަމުންނެވެ. އެއީ މި އަހަރު ހުށަހެޅި 214 މައްސަލައަކާއި މިދިޔަ އަހަރު ނުނިމި ހުރި 44 މައްސަަލައެކެވެ. އޭގެ ތެރެއިން އެއްކޮށް ނިމިފައި ވަނީ 115 މައްސަލަ އެވެ.

ކޮމިޓީގައި އައިކޮމް އިން އާންމުކުރި މައުލޫމާތުގައިވާ ގޮތުގައި، މި އަހަރުގެ މިހާތަނަށް 3،000 އަށް ވުރެ ގިނަ އާރުޓީއައި ފޯމު ވަނީ ސަރުކާރުގެ އެކި އިދާރާތަކަށް ހުށަހަޅައިފަ އެވެ.