މޮރޮކޯ އާއި މިސްރު ވެސް ގުރޫޕްގެ އެއް ވަނައިގައި ކުއާޓާ އަށް

ޕެރިސް (ޖުލައި 31) - އޮލިމްޕިކްސް ފިރިހެން ފުޓްބޯޅަ އިވެންޓުގައި ވާދަކުރި ގްރޫޕުގެ އެއް ވަނަ ހޯދައި މޮރޮކޯ އާއި މިސްރު މުބާރާތުގެ ކުއާޓާ ފައިނަލަށް ދަތުރު ކޮށްފި އެވެ.

މޮރޮކޯ ވަނީ އިއްޔެ ކުޅުނު މެޗުގައި 3-0 އިން އިރާގު ބަލިކޮށްފަ އެވެ. ފުރަތަމަ ހާފުގައި މޮރޮކޯގެ ގޯލުތައް ޖަހައިދިނީ އާމިރު ރިޗަޑްސަން އާއި ސުފިއާން ރަހީމީ އަދި އަބްދޭ އެޒަލްޒޫލީ އެވެ.

މޮރޮކޯއާ އެއް ގުރޫޕެއްގައި ހިމެނުނު އާޖެންޓީނާ ވެސް އިއްޔެ ކުޅުނު މެޗުގައި 2-0 އިން ޔޫކްރޭން ބަލި ކުރުމާ އެކު، އާޖެންޓީނާ އާއި މޮރޮކޯ އަށް ވެސް ވަނީ ހަ ޕޮއިންޓް ލިބިފަ އެވެ. ނަމަވެސް މޮރޮކޯ އަށް ގުރޫޕްގެ އެއް ވަނަ ލިބުނީ ހެޑް ޓު ހެޑް ނަތީޖާއަށް ބަލައި، މޮރޮކޯ އިން އާޖެންޓީނާ ބަލިކޮށްފައި އޮތުމުންނެވެ. ހައިޖާނު ބޮޑުވި މުބާރާތުގެ ފުރަތަމަ މެޗުގައި، ފަހު ވަގުތު އާޖެންޓީނާ ޖެހި ގޯލު ވީއޭއާރުން ބަލައި ނުގަތުމުން މޮރޮކޯ މޮޅުވީ 2-1 އިންނެވެ.

މިސްރު ވަނީ އިއްޔެ ކުޅުނު ގުރޫޕްގެ ފަހު މެޗުގައި، 2-1 އިން ވަރުގަދަ ސްޕެއިން ބަލިކޮށްފަ އެވެ. ފުރަތަމަ ހާފު ނިމެނިކޮށް އިބްރާހިމް އާދިލް މިސްރަށް ލީޑު ނަގައިދިން އިރު، ދެ ވަނަ ހާފުގައި ލީޑު ފުޅާ ކޮށްދިނީ ވެސް އޭނާ އެވެ. ސްޕެއިނުން ސުން ކަނޑުވާލީ ފަހު މިނިޓުގައި ސަމޫ އޮމޯޑިއޮން ޖަހައިދިން ގޯލުންނެވެ.

މި ނަތީޖާއާ އެކު މިސްރު ގުރޫޕްގެ އެއް ވަނަ ހޯދީ މެޗަކުން ބަލިނުވެ، ތިން މެޗުން ހަތް ޕޮއިންޓް ހޯދައިގެންނެވެ. އަމިއްލަ ފަސްގަނޑުގައި 1992 ވަނަ އަހަރު ރަން މެޑަލް ހޯދި ސްޕެއިން އަށް ވަނީ ހަ ޕޮއިންޓާ އެކު ގުރޫޕްގެ ދެ ވަނަ ލިބިފަ އެވެ.

މީގެ ތިން އަހަރު ކުރިން އޮތް ޓޯކިއޯ އޮލިމްޕިކްސްގައި ވެސް މިސްރު ވަނީ ކުއާޓާގައި ކުޅެފަ އެވެ. ނަމަވެސް އެފަހަރު ފައިނަލްގައި، ސްޕެއިން ބަލިކުރި ބްރެޒިލް އަތުން ހަނި ގޮތަކަށް ބަލިވެ، މުބާރާތް ނިންމާލަން ޖެހުނެވެ.

އެ ފަހަރު މިސްރު ކުއާޓާ އަށް ދިޔައީ ސްޕެއިންގެ ފަހަތުން ގުރޫޕްގެ ދެ ވަނައިގައި ނިންމައިގެންނެވެ.

މިސްރު، ކުއާޓާ ފައިނަލްގައި ވާދަ ކުރަން ޖެހެނީ ވާދަކުރާނީ ގުރޫޕް ޑީގެ ދެ ވަނައަށް ދިޔަ ޕެރަގުއޭއާ ދެކޮޅަށެވެ. އަދި މޮރޮކޯ ނުކުންނާނީ ގުރޫޕް އޭގެ ދެވަނަ ހޯދި އެމެރިކާއާ ދެކޮޅަށެވެ.

ދެ ފަހަރު އޮލިމްޕިކްސް ރަން މެޑަލް ހާސިލް ކޮށްފައިވާ އާޖެންޓީނާ، ކުއާޓާގައި ގުރޫޕް އޭގެ އެއް ވަނަ ހޯދި ފްރާންސްއާ ދެކޮޅަށް ކުޅޭއިރު، ސްޕެއިން ކުޅޭނީ ގުރޫޕް ޑީގެ އެއް ވަނަ ހޯދި ޖަޕާނާ ދެކޮޅަށެވެ.

ގުރޫޕް ސްޓޭޖުގެ ކުޅުން ރޭ ނިމިފައި ވާއިރު، މުބާރާތް ހޯސްޓް ކުރާ ފްރާންސް އިން ވަނީ ރޭ ކުޅުނު މެޗުގައި 3-0 އިން ނިއުޒިލެންޑް ބަލިކޮށް، ގުރޫޕް ސްޓޭޖުގައި ފުރިހަމަ ނުވަ ޕޮއިންޓް ހަމަކޮށްފަ އެވެ. އަދި ޖަޕާން ވެސް ވަނީ ރޭ އެޓީމުން އިޒްރޭލާ ދެކޮޅަށް ކުޅުނު މެޗުގެ އެންމެ ފަހު ވަގުތު ގޯލު ޖަހައި 1-0 އިން މޮޅުވެ، ނުވަ ޕޮއިންޓް ހަމަކޮށްފަ އެވެ.