މޭރީގެ މަރު: ބޭރުގެ ޑޮކްޓަރުން ހާޒިރުކުރަން ހުރަސްތަކެއް، އޭޖީގެ ގާނޫނީ ލަފައަކަށް އެދެނީ

ރާއްޖޭގައި މަސައްކަތްކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސް މަރާލި މައްސަލާގައި އެންމެ މުހިންމު ހެކިވެރިން ކަމަށްވާ ރާއްޖެއިން ބޭރުގެ ޑޮކްޓަރުންގެ ހެކިބަސް ނެގުމުގައި ގާނޫނީ ހުރަސްތަކެއް ކުރިމަތިވެ ބަންޑާރަ ނައިބު އޮފީހުގެ ލަފައަކަށް ފޮރިން މިނިސްޓްރީން އެދިއްޖެ އެވެ.

ރާއްޖޭން ބޭރުގައި ތިބޭ މީހުންގެ ހެކިބަސް ނަގަމުން އަންނަ އުސޫލަކީ އެ ގައުމެއްގައި ހުންނަ ރާއްޖޭގެ އެމްބަސީއަކަށް އެމީހަކު ހާޒިރުކޮށް، އޮންލައިންކޮށް ޝަރީއަތުގެ މަޖިލީހާ ގުޅާލައިގެންނެެވެ. މި އުސޫލުން ވަރަށް ގިނަ މައްސަލަތަކެއްގެ ހެކިބަސް ނަގާފައިވެ އެވެ.

ކުރިން ރާއްޖެއިން ބޭރުގައި ތިބޭ ހެކިވެރިންގެ ހެކިބަސް ފޮރިން މިނިސްޓްރީ މެދުވެރިކޮށް ރާއްޖޭގެ އެމްބަސީއަކަށް ހާޒިރުކޮށްގެން ނެގުނަސް، މިހާރު އޮންނަ އުސޫލަކީ އެމްބަސީ އަށް ހާޒިރު ކުރުމުގެ ކުރިން އެ ގައުމެއްގެ ސަރުކާރުގެ ހުއްދަ ވެސް ހޯދަން ޖެހުމެވެ.

ރާއްޖޭގައި މަސައްކަތްކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސްގެ މަރުގެ މައްސަލާގައި ރާއްޖެއިން ބޭރުގައި ތިބި ބޭރުގެ މުހިންމު ހެކިވެރިންތަކެއްގެ ހެކިބަސް ނެގުން ލަސްވެފައިވާތީ، ދިފާއީ ވަކީލުން ގެންދަނީ ކަންބޮޑުވުން ފާޅު ކުރަމުންނެވެ. އޭގެ ތެރޭގައި މުހިންމު ރިޕޯޓްތަކެއް ތައްޔާރުކުރި ޑޮކްޓަރުން ހިމެނެ އެވެ.

އެ މައްސަލާގައި މިއަދު ބޭއްވި އަޑުއެހުމުގައި ވެސް ދެ ޑޮކްޓަރެއްގެ ހެކިބަސް ނަގަން އޮތެވެ. މިހާރު އިންޑިއާގައި ތިބި އެ ދެ ޑޮކްޓަރުން ހެކިބަސް ދޭން ތައްޔާރަށް ތިބި ނަމަވެސް، އިންޑިއާގެ ފޮރިން މިނިސްޓްރީން އެމީހުން އެމްބަސީއަށް ހާޒިރުކޮށް ހެކިބަސް ނެގޭނެ އިންތިޒާމް ހަމަޖައްސައިދީފައެއް ނުވެ އެވެ.

ޕްރޮސިކިއުޓާ ޖެނަރަލް އޮފީހުގެ ވަކީލް ވިދާޅުވީ އެމްބަސީތަކަށް މީހުން ހާޒިރުކުރަން ގާނޫނީ ހުރަސްތަކެއް ހުރުމުން އެކަމުގައި އަމަލު ކުރާނެ ގޮތެއް ހޯދުމަށް ފޮރިން މިނިސްޓްރީން ބަންޑާރަ ނައިބުގެ އޮފީހަށް ހުށަހަޅާފައިވާ ކަމަށެވެ. ނަމަވެސް، އެ ގާނޫނީ ހުރަސްތަކަކީ ކޮބައިކަމެއް މިނިސްޓްރީން ޕްރޮސިކިއުޓާ ޖެނަރަލްގެ އޮފީހާ ހިއްސާކޮށްފައިނުވާ ކަމަށް ވަކީލް ވިދާޅުވި އެވެ.

މިކަމުގައި މިހާތަނަށް ހައްލެއް ހޯދިފައިނުވާ ކަން ވަކީލް ފާހަގަ ކުރެއްވި އެވެ.

މިއަދު ކްރިމިނަލް ކޯޓުގައި އޮތް އަޑުއެހުމުގައި، މޭރީ އާއި އޭނާގެ ފިރިމީހާ މާވިންއާ އެކު އެއް ގެއެއްގައި އުޅުނު ފިލިޕީންސް މީހެއްގެ ހެކިބަސް ނަގާފައިވެ އެވެ. ރާއްޖޭގައި ދިރިއުޅޭ އެ އަންހެން މީހާ ހެކިބަސް ދެމުން ބުނި ގޮތުގައި އޭނާއަށް އެނގިފައިވާ ގޮތުގައި މޭރީ މަރުވީ ބެޓްޝީޓަކުން އަމިއްލައަށް ދަންޖެހިގެންނެވެ.

މޭރީ މަރުވި ދުވަހު ހެނދުނު އޭނާ ގެއިން ނުކުމެގެން ދަނިކޮށް ފެނުނު ކަމަށާއި އެ ދުވަހު އޭނާ ގެއިން ދިޔައީ މޭރީގެ ބޭބެ އަންނާތީ ފިލިޕީންސް ކެއުމެއް ވެސް ތައްޔާރު ކޮށްފައި ކަމަށް ހެކިވެރިޔާ ބުންޏެވެ. އޭގެ ފަހުން އެ ދުވަހު ހަވީރު އޭނާއަށް އިވުނީ މޭރީ މަރުވެފައިވާ ކަމުގެ ހަބަރު ކަމަށް ބުންޏެވެ. އަދި އެ ދުވަހު މޭރީ އާއި މާވިންއާ ދެމެދު ހަލާކުވެފައިވާ އިސްކުރަކާ ހެދި ޒުވާބެއް ހިނގި ކަމަށް މާވިން ބުނި އަޑުއެހި ކަމަށް ވެސް ހެކިވެރިޔާ ބުންޏެވެ.

އޮކްޓޫބަރު، 2021 ގައި މޭރީ މަރުވި މައްސަލާގައި އޭނާގެ ފިރިމީހާ މާވިންގެ މައްޗަށް މީހަކު މެރުމުގެ ދައުވާ ކުރާއިރު، އައިޖީއެމްއެޗްގެ ނަރުހެއް ކަމަށްވާ ހަލީމަތު ލަމްހާގެ މައްޗަށް ދައުލަތުން ކުރަނީ އެކަމުގައި ބައިވެރިވުމުގެ ދައުވާ އެވެ. ދައުލަތުން ތުހުމަތު ކުރާގޮތުން މާވިން އާއި ލަމްހާ ލޯބީގެ ގޮތުން ގުޅިގެން އުޅެމުން އެ ދެ މީހުން ރާވައިގެން މޭރީ މަރާލީ އެވެ. އަދި ހޮސްޕިޓަލް ނޫން ތަނެއްގައި ބޭނުން ނުކުރެވޭނެ ބޭސްތަކެއް ލަމްހާގެ ގޭގައި ގެންގުޅުނު ކަމަށް ބުނެ އިތުރު ދެ ދައުވާއެއް ވެސް އޭނާގެ މައްޗަށް ކުރެ އެވެ.

މި މައްސަލާގެ ހެކިބަސް ނެގުމުގެ މަރުހަލާ މި މަސް ތެރޭ ނިންމާލަން މަސައްކަތް ކުރައްވާނެ ކަމަށް މައްސަލަ ބައްލަވާ ގާޒީ ހުސައިން ފާއިޒް ރަޝާދު ވަނީ ވިދާޅުވެފަ އެވެ. މި މަހަށް އިތުރު ދެ އަޑުއެހުމެއް ތާވަލު ކޮށްފައިވެ އެވެ.