ކުށުގެ ރެކޯޑު އޮތް މީހަކު ލޯބިވެރިޔާއަށް ވަޅިން ހަމަލާދިނުމުން ބަންދުކޮށްފި

ލޯބީގެ ގޮތުން ގުޅިގެން އުޅުނު އަންހެނަކަށް ވަޅިން ހަމަލާދިން ޒުވާނަކު 30 ދުވަހަށް ބަންދު ކުރަން ކްރިމިނަލް ކޯޓުން އަމުރު ކޮށްފި އެވެ.

ކޯޓު އަމުރުގައި ބުނި ގޮތުގައި ގދ. ތިނަދޫ، ރިކާޒް އާދަމް 22، ބަންދުކުރީ އަންހެން މީހާއަށް އޭނާގެ ފަރާތުން ނުރައްކާ އޮތުމުންނެވެ. އޭނާއަކީ މީގެކުރިން ވެސް 26 ކުށެއްގެ ރެކޯޑު އޮތް މީހެއް ކަމަށް އަމުރުގައިވެ އެވެ.

ކޯޓު އަމުރުގައި ބުނީ އޭނާ އާއި އަނިޔާ ލިބުނު އަންހެން މީހާގެ ލޯބީގެ ގުޅުމެއް އޮންނަކަން ދައްކާފައި ހުރި ވާހަކަތަކުން އެނގޭ ކަމަށެވެ.

ރިކާޒްގެ ދިފާއުގައި އޭނާ ކޯޓުގައި ބުނީ އަންހެންމީހާއަށް އަނިޔާނުކުރާ ކަމަށެވެ. އެ ހާދިސާ އަކީ ރުޅި އައިސްގެން ހިނގި ޒުވާބެއް ކަމަށް ވެސް އޭނާ ބުންޏެވެ.

ދަބަހުގައި އޮތް ވަޅިއަކީ، އޭނާ ބުނި ގޮތުގައި، ޑައިވިނަށް ދާއިރު ބޭނުންކުރަން ގެންގުޅުނު އެއްޗެކެވެ.

ކޯޓުން ރިކާޒް ބަންދުގައި ބަހައްޓަން ނިންމި ސަބަބެއް ކަމަށް އަމުރުގައި ބުނެފައި ވަނީ ދޫކޮށްލައިފި ނަމަ އޭނާ އެ އަންހެންމީހާއަށް އަނިޔާކޮށް، ކުށް ތަކުރާރު ކުރުމުގެ ފުރުސަތު އޮތުމެވެ.

ރިކާޒް އާދަމްގެ މައްޗަށް ދެ ދައުވާއެއް އަންނާނެ ކަމަށް ބެލެވޭއިރު އެއީ ޖިނާއީ ބޮޑު ދެ ދައުވާކަން ދައުލަތުން ފާހަގަކޮށްފައިވާ ކަމަށް ވެސް ކޯޓުގެ ހުކުމުގައިވެ އެވެ.