ސައިފް އިންސްޓަގްރާމްގައި ސިއްރު އެކައުންޓެއް ގެންގުޅޭ

ބޮލީވުޑް އެކްޓަރު ސައިފް އަލީ ހާން އިންސްޓަގްރާމްގައި ސިއްރު އެކައުންޓެއް ގެންގުޅޭ ކަމަށް އޭނާ ބުނެފި އެވެ.

އިންސްޓަގްރާމްގައި ސިއްރު އެކައުންޓެއް ގެންގުޅޭ ކަމަށް ސައިފް ބުނީ ދާދި ފަހުން އިންޑިއާގެ ނޫހެއް ކަމަށްވާ "ހިންދުސްތާން ޓައިމްސް" އަށް ދިން އިންޓަވިއުއެއްގަ އެވެ.

ސައިފް ބުނީ އިންސްޓަގްރާމް އެޕް ފޯނަށް އަޅާފައިި އިނަސް، އޭނާ އެ ސޯޝަލް މީޑިއާ ޕްލެޓްފޯމަށް ގިނައިން ވަންނަނީ ބްރައުޒާ އިން ކަމަށެވެ. އިންސްޓަގްރާމަކީ އޭނާ މާ ގަޔާވާ އެއްޗެއް ނޫން ކަމަށް ވެސް ސައިފް ބުންޏެވެ.

ސައިފް ބުނި ގޮތުގައި، އޭނާގެ އަމިއްލަ ނަފުސާއި ދިރިއުޅުމާ ބެހޭ ގޮތުން ސޯޝަލް މީޑިއާގައި އެއްޗިހި ހިއްސާކުރަން ބޭނުން ނުވެ އެވެ. އަދި އޭނާ ސޯޝަލް މީޑިއާގައި ނޫޅޭތީ އެއްވެސް މީހަކު، އެއްވެސް އެއްޗެއް ޕްރޮމޯޓުކުރަން ނާހާތީ އެކަމާ ވެސް ވަރަށް ހިތްހަމަޖެހެ އެވެ.

ދުވަހަކު ވެސް އިންސްޓަގްރާމްގައި ޕަބްލިކް އެކައުންޓެއް ހަދާނަންތޯ ސުވާލުކުރުމުން ސައިފް ބުނީ ފަހަރެއްގައި ކަމަށެވެ. ސައިފް ބުނީ އޭނާ އަކީ ފޮޓޯ އާއި ވީޑިއޯ ނެގުމަށް ޝައުގުވެރިކަން ހުންނަ މީހަކަށް ވުމުން ފަހަރެއްގައި އޭނާ ސޯޝަލް މީޑިއާ އިން ފެނި ވެސް ދާނެ ކަމަށެވެ.

ސައިފްއާ ހިލާފަށް އޭނާގެ އަންހެނުން އަދި މަޝްހޫރު އެކްޓްރެސް ކަރީނާ ކަޕޫރް ހާން އަކީ އިންސްޓަގްރާމްގައި ވަރަށް އެކްޓީވް މީހެކެވެ.

ސައިފް އެންމެ ފަހުން ފެނުނީ މިދިޔަ އަހަރު ނުކުތް ފިލްމު "އަދިޕުރުޝް" އެވެ. އަދި ކަރީނާގެ އެންމެ ފަހުން ފެނުނީ މި އަހަރު ނުކުތް ފިލްމު "ކްރޫ" އިންނެވެ.