ނައީމާ މަރާލީ ސިހުރު ހަދާ މީހެއް ކަމަށް ގަބޫލުކޮށްގެން ކަމަށް ވިއަސް އޭނާއާ ދެކޮޅަށް އެއްވެސް ހެއްކެއް ނެތް: ޕޮލިސް

ނ. މަނަދޫގައި މިދިޔަ އަހަރުގެ އޭޕްރީލް މަހު ނައީމާ މޫސާ މަރާލީ އޭނާއަކީ ސިހުރު ހަދާ މީހެއްގެ ގޮތުގައި ބަޔަކަށް ގަބޫލުކުރެވިގެން ކަމަށް ވިއަސް، ނައީމާއަކީ އެ ފަދަ ކަމަކާ ގުޅުން އޮތް މީހެއްކަން މިހާތަނަށް އެއްވެސް ހެއްކެއް ފެނިފައިނުވާ ކަމަށް ފުލުހުން މިއަދު ބުނެފި އެވެ.

ނައީމާ، 62، ދިރިއުޅޭ ގޭގެ ތެރޭގައި އަނިޔާވެރި ގޮތަކަށް އޭނާ މަރާލި މައްސަލާގައި އެ ރަށު ތިން މީހެއްގެ މައްޗަށް ވަނީ ދައުވާ އުފުލައިފަ އެވެ. އެއީ؛ ފިނިފެންމާގޭ އަބްދުލްވާހިދު ރިފާސް އާއި ފެހިވިލާގޭ އަޒުހަމް އަބްދުއްޝުކޫރު އަދި ވިނަރެސް، ހުސައިން ފަވާޒުގެ މައްޗަށެވެ.

އެ މީހުންގެ މައްޗަށް ކުރަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާގެ އިތުރުން އަދުލު އިންސާފު ގާއިމްކުރަން ހުރަސް އެޅުމާއި މައްޔިތާގެ ބޭނުން ނަހަމަ ގޮތުގައި ހިފުމުގެ ދައުވާ އެވެ.

މަރުގެ މައްސަލަ ފެންމަތިވުމާއެކު، މަނަދޫގައި އޭރު އެއް ބަޔަކު ތުހުމަތުކުރީ ނައީމާ ސިހުރު ހަދާތީ އެކަމުގެ ބަދަލު ހިފަން މަރާލީ ކަމަށެވެ.

ނަމަވެސް، އިސްކަންދަރު ކޮށީގައި މިއަދު ބޭއްވި ނިއުސް ކޮންފަރެންސްގައި "މިހާރު"ން ކުރި ސުވާލާ ގުޅިގެން ޑެތު އެންޑް ހޯމިސައިޑް އިންވެސްޓިގޭޝަން ޔުނިޓްގެ ހެޑް އިންސްޕެކްޓަ އޮފް ޕޮލިސް މުހައްމަދު ސާމިހު ވިދާޅުވީ ފުލުހުންގެ ތަހުގީގު ނިމުނުއިރު ވެސް ނައީމާއާ ސިހުރާ ގުޅޭ ކަމެއް ފާހަގަނުކުރެވޭ ކަމަށެވެ.

ނައީމާއަކީ ފަންޑިތަ/ސިހުރު ހަދާ މީހެއްކަން ރަށު ތެރޭގައި ކިޔާ ކިޔުން ފިޔަވައި އެއްވެސް ހެއްކެއް އަދި ގަރީނާއެއް ހޯދިފައިނުވާ ކަމަށް ސާމިހު ވިދާޅުވި އެވެ.

"ނައީމާ މޫސާއަކީ ސިހުރު ހަދާ މީހެއްކަން ތަހުގީގަށް އަދި މިހާތަނަށް ނެތޭ ފެނިފައެއް ނުވަތަ އެ ވަރުގެ ހެއްކެއް ނެތޭ އަޅުގަނޑުމެންނަށް ފެނިފައެއް. އެހެން ނަމަވެސް މޯޓިވް އަކީ އެއް މޯޓިވް އެއް. ކުރިން ވެސް ފާހަގަކުރި ގޮތަށް ނައީމާ މޫސާއަކީ ފަންޑިތަ ސިހުރު ހަދާ މީހެއްގެ ގޮތުގައި ބަޔަކަށް ގަބޫލުކުރެވިގެން އެކަމުގެ ބަދަލެއް ހިފުމުގެ ގޮތުން ކޮށްފައި އޮތް ކަމެއް." އޭނާ ވިދާޅުވި އެވެ.

ނައީމާގެ ކަރަށާއި ހަށިގަނޑުގެ އެކި ތަންތަނަށް ހަމަލާދީ މަރާލާފައި އޮއްވާ ފެނުނީ އޭނާގެ ހަބަރެއް ނުވާތާ ދެ ދުވަސްވުމުން އޭނާގެ ގެއަށް ވަދެ ބެލިއިރު އެވެ.