މޯދީ ހުވާކުރައްވާ ރަސްމިއްޔާތަށް ރާއްޖެ ހިމެނޭ ގޮތަށް ސަރަހައްދުގެ ގައުމުތަކަށް އިސްކަން ދިން

އިންޑިއާގެ ބޮޑުވަޒީރު ނަރެންދުރަ މޮދީ ތިން ވަނަ ދައުރަކަށް މަގާމުގެ ހުވާކުރެއްވުމަށް ބާއްވާ ރަސްމިއްޔާތަށް ވަޑައިގަތުމަށް ގައުމުތަކަށް ދައުވަތު ދެއްވުމުގައި އިސްކަން ދީފައި ވަނީ ސަރަހައްދުގެ ގައުމުތަކަށް ބަލައިގެން ކަމަށް އެ ގައުމުގެ ފޮރިން މިނިސްޓްރީން މިއަދު ބުނެފި އެވެ.

މޮދީ ހުވާކުރެއްވުމުގެ ރަަސްމިއްޔާތު އޮންނާނީ މާދަމާ އެވެ.

އެ ރަސްމިއްޔާތުގައި ރާއްޖޭގެ ރައީސް ޑރ. މުހައްމަދު މުއިއްޒާއި ސްރީ ލަންކާގެ ރައީސް ރަނިލް ވިކްރަމަސިންހަ އާއި ސީޝެލްސްގެ ނައިބު ރައީސް އަހުމަދު އަފީފާއި ބަންގްލަދޭޝްގެ ބޮޑުވަޒީރު ޝެއިހް ހަސީނާ އާއި މޮރިޝަސްގެ ބޮޑުވަޒީރު ޕްރަވިންދު ކުމާރު ޖަގުނޯތާއި ނޭޕާލުގެ ބޮޑު ވަޒީރު ޕުޝްޕާ ކަމާލް ދަލާލު އަދި ބޫޓާނުގެ ބޮޑުވަޒީރު ޝެރިން ޓޮބްގޭ ވެސް ބައިވެރިވެވަޑައިގަންނަވާނެ އެވެ.

އިންޑިއާގެ އެކްސްޓާނަލް އެފެއާޒް މިނިސްޓްރީން ބުނީ އެ ރަސްމިއްޔާތުގައި ބައިވެރިވެވަޑައިގަތުމަށް އެ ލީޑަރުންނަށް ދައުވަތު ދެއްވުމުގައި އިސްކަންދިނީ "ނެއިބަހޫޑު ފަސްޓް ޕޮލިސީ" އާއި ސާގަރު" ވިޝަންގެ ދަށުން ކަމަށެވެ.

އިންޑިއާގެ ބޮޑުވަޒީރު ކަމުގެ ހުވާ މޮދީ ތިން ވަނަ ދައުރަކަށް ކުރެއްވުމުގެ ރަސްމިއްޔާތަށް ފަހު، އެ ގައުމުގެ ރައީސް ޑްރޮޕަޑީ މުރުމޫގެ ފަރާތުން ބާއްވާ ފަރިއްކޮޅެއްގައި ވެސް އެ ލީޑަރުން ބައިވެރިވެވަޑައިގަންނަވާނެ ކަމަށް އެ މިނިސްޓްރީން ބުންޏެވެ.

މޮދީ ހުވާ ކުރައްވާ ރަސްމިއްޔާތުގައި ރައީސް މުއިއްޒު ބައިވެރިވެވަޑައިގަންނަވާ ގޮތަށް ހަމަޖެހިފައިވާއިރު މިއީ އެ މަނިކުފާނު މިދިޔަ އަހަރުގެ ނޮވެމްބަރު މަހުގެ 17 ވަނަ ދުވަހު ވެރިކަމާ ހަވާލުވެވަޑައިގަތުމަށް ފަހު އިންޑިއާ އަށް ކުރައްވާ ފުރަތަމަ ދަތުރުފުޅެވެ.

މުއިއްޒު ރައީސް ކަމަށް ހުވާ ކުރައްވާ ރަސްމިއްޔާތަށް މޮދީއަށް ދައުވަތު ދެއްވި ނަމަވެސް އެ ގައުމުގެ ސަރުކާރުގެ ފަރާތުން ފޮނުވީ މިނިސްޓަރެކެވެ.