ނަބާހާ، ވިދިވިދިގެން ދެވަނަ އޮލިމްޕިކްސްއިން ޖާގަ ހޯދި ބެޑްމިންޓަންގެ ފުރަތަމަ އެތުލީޓް

ބެޑްމިންޓަން ތަރި ފާތިމަތު ނާބާހާ އަބްދުރައްޒާގަށް ވިދިވިދިގެން ދެވަނަ ފަހަރަށް އޮލިމްޕިކްސްއިން ޖާގަ ލިބިއްޖެ އެވެ.

މި ފުރުސަތާ އެކު އޭނާ ވެފައި ވަނީ، ވިދިވިދިގެން ދެވަނަ އޮލިމްޕިކްސްއިން ޖާގަ ހޯދި ބެޑްމިންޓަންގެ ފުރަތަމަ އެތުލީޓަށެވެ.

ޓޯކިޔޯގައި 2021 ގައި ބޭއްވި 2020 ގެ (ކޮވިޑްގެ ސަބަބުން 2021 އަށް ފަސް ކުރި) އޮލިމްޕިކް ގޭމްސްގައި ރާއްޖޭގެ ދިދަ އުފުލި އަންހެން އެތުލިޓަކީ، އޮލިމްޕިކްސްގައި ރާއްޖޭން ވާދަ ކުރި ބެޑްމިންޓަންގެ ފުރަތަމަ އަންހެން އެތުލީޓެވެ.

ނަބާ އަށް އޮލިމްޕިކްސްގެ ޖާގަ ދިނީ އޮލިމްޕިކްސްގެ ޓްރައިޕާޓައިޓް ކޮމިޝަނުން، އޭނާގެ ނަތީޖާ އަށް ބެލުމަށް ފަހު އޭނާގެ ނަތީޖާތައް ރަނގަޅު ވުމުންނެވެ.

ޓްރައިޕާޓައިޓް ކޯޓާގެ ޖާގަ ދެނީ، އޮލިމްޕިކްސް ކޮލިފައިން މަރުހަލާގައި ވާދަކޮށް ނެރޭ ނަތީޖާތައް ރަނގަޅު ކުރުމުންނެވެ. މިދިޔަ ތިން އަހަރު ތެރޭ ނަބާހާ އާއި ރާއްޖޭގެ އެހެން ކުޅުންތެރިން ވެސް ވަނީ ގިނަ މުބާރާތްތަކެއްގައި ކުޅެފަ އެވެ.

ނަބާ އަކީ، އޮލިމްޕިކްސް ޖާގަ ކަށަވަރުވި ރާއްޖޭގެ ދެވަނަ އެތުލީޓެވެ. ރާއްޖޭގެ އެއްވަނަ ޓީޓީ ކުޅުންތެރިޔާ ފާތިމަތު ދީމާ އަލީ ވަނީ ދެކުނު އޭޝިއާގެ އޮލިމްޕިކްސް ކޮލިފައިން މުބާރާތުގެ ޗެމްޕިއަންކަން ހޯދައި އޮލިމްޕިކްސް އަށް ކޮލިފައިވި ދިވެހި ފުރަތަމަ އެތުލީޓްގެ ޝަރފު ހޯދައިފަ އެވެ.

ދެން ރާއްޖޭން ފުރުސަތު ލިބޭނީ ވައިލްޑްކާޑް ދައުވަތުގެ ދަށުން ޖާގަ ލިބޭ އެތުލެޓިކްސް އާއި ސްވިމިން އެވެ.

އޮލިމްޕިކް ކޮމިޓީގެ ޗެއާމަން މުހައްމަދު އަބްދު ސައްތާރު މީގެ ކުރިން ވިދާޅުވެފައި ވަނީ، މި އަހަރު ފްރާންސްގެ ޕެރިހުގައި ބާއްވާ އޮލިމްޕިކްސް އަކީ، ރާއްޖޭން އެންމެ ބޮޑު ކޮންޓިންޖެންޓެއް ވާދަކުރާ އޮލިމްޕިކްސް ގޭމްސް އަށް ވާނެ ކަމަށެވެ.

މި އަހަރުގެ ގޭމްސް އޮންނާނީ ޖުލައި 26 ން އޯގަސްޓް 11 ވަނަ ދުވަހަށެވެ.