ޕާކިސްތާނުގެ ކޯޓަކަށް ހަމަލާދީ ހަތަރު މީހުން މަރާލައިފި

ޕިޝާވަރު (ފެބްރުއަރީ 21) - ޕާކިސްތާނުގެ ހުޅަނގު އުތުރުގެ ކޯޓަކަށް މިއަދު ދިން ޖާނުންފިދާވުމުގެ ހަމަލާއެއްގައި ހަތަރު މީހުން މަރާލައިފި ކަމަށް އޮފިޝަލުން ބުނެފި އެވެ.

ޗަރުސައްދާ އަވަށުގެ ޓަންގީ އޭރިއާގެ ކޯޓަކަށް ވަންނަން އުޅެނިކޮށް ވަނީ ޖާނުންފިދާވުމުގެ ބޮމުގެ ހަމަލާދޭ ތިން މީހުން ވަނީ މަރާލައިފަ އެވެ. މި ހަމަލާ ދިން ކަމަށް ބުނެފައި ވަނީ ތާލިބާން ޖަމާއަތެއް ކަމަށްވާ ޖަމާއަތު އަހުރާމުންނެވެ.

ކޯޓަށް ވަނުމުގެ ކުރިން ޖާނުންފިދާވުމުގެ ހަމާލާ ދިން މީހުން ވަނީ އަތު ބޮމާއި ބަޑިން ހަމަލާދީފަ އެވެ. ޖާނުންފިދާވުމުގެ ހަމަލާ ދިން މީހުންގެ ތެރޭން އެކަކު ވަނީ އަމިއްލަ އަށް ގޮއްވާލައިފަ އެވެ. އަަދި ގައިގައި ބޮން ހަރުކޮށްފައިވާ އިތުރު މީހަކު ވަނީ ކޯޓު ސަރަހައްދުން ފިލާފައި ކަމަށް ރޮއިޓާސް އިން ބުންޏެވެ.

މަރުވި ހަތަރު މީހުންގެ ތެރޭގައި ވަކީލަކު ވެސް ހިމެނެ އެވެ.

ޕާކިސްތާނުގެ ސޫފީ މިސްކިތަކަށް މިދިޔަ ހަފުތާގައި ދިން ޖާނުން ފިދާވުމުގެ ހަމަލާގައި ވަނީ 80 މީހުން މަރާލައިފަ އެވެ. މި ހަމަލާ ދީފައި ވަނީ އިސްލާމިކް ސްޓޭޓް (އައިއެސް) އިންނެވެ. ސޫފީ މިސްކިތަށް ދިން ހަމަލާ އަށް ފަހު ޕާކިސްތާން ސިފައިން ވަނީ ހަނގުރާމަވެރިންނާ ދެކޮޅަށް އޮޕަރޭޝަނެއް ފަށައިފަ އެވެ. މި އޮޕަރޭޝަނުގައި ވަނީ 100 އަށް ވުރެ ގިނަ ހަނގުރާމަވެރިން މަރާލައިފަ އެވެ.