ސައުދީ ފަންޑުގެ އެންމެ އިސްވެރިޔާ ރާއްޖޭގައި

ސައުދީ ފަންޑު ފޯ ޑިވެލޮޕްމަންޓުގެ އެންމެ އިސްވެރިޔާ އަދި ސީއީއޯ ސުލްތާން އަބްދުއްރަހްމާން އަލް މަރުޝަދު މިއަދު ރަސްމީ ދަތުރެއްގައި ރާއްޖެ ވަޑައިގެންފި އެވެ.

މިއަދު މެންދުރު ފަހު އޭނާ ވަނީ ރައީސް ޑރ. މުހައްމަދު މުއިއްޒާ ވެސް ބައްދަލުކުރައްވައިފަ އެވެ.

ސައުދީ ފަންޑުގެ ސީއީއޯ އާއި އެހެން އިސްވެރިން ރާއްޖެ އަށް ކުރައްވާ މި ދަތުރުގައި މިއަދު ހަވީރު ފިނޭންސް މިނިސްޓްރީގައި ވެސް "ހައި-ލެވެލް" ރަސްމިއްޔާތެއް ބާއްވަން ވަނީ ހަމަޖައްސަވައިފަ އެވެ.

އެ ރަސްމިއްޔާތުގައި ސައުދީ ފަންޑުގެ އެހީގައި ހުޅުމާލޭގައި ހިންގާ މަޝްރޫއުތަކުގެ އެއްބަސްވުމުގައި ސޮއިކުރުން އޮންނާނެ ކަމަށް ފިނޭންސް މިނިސްޓްރީން ބުންޏެވެ. އަދި ސައޫދީ ފަންޑުގެ އެހީގައި ހުޅުމާލޭގައި ހިންގާ ތަރައްގީގެ ބައެއް މަޝްރޫއުތައް މިއަދު ހަވީރު އިފުތިތާހު ކުރުން ވަނީ ތާވަލްކޮށްފަ އެވެ.

ރާއްޖޭގެ ފިނޭންސް މިނިސްޓަރު ޑރ. މުހައްމަދު ޝަފީގާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މީގެ ދެ ހަފުތާއެއްހާ ދުވަސް ކުރިން ސައޫދީ އަށް ކުރެއްވި ދަތުރުގައި ވެސް ސައޫދީ ފަންޑުގެ އިސްވެރިންނާ ބައްދަލުކުރައްވައި މަޝްވަރާތައް ބޭއްވި އެވެ. ސައޫދީ ފަންޑުގެ އިސްވެރިޔާ އާއި އެހެން ބައެއް ބޭފުޅުން ރާއްޖެ މި ވަޑައިގަތީ އެ މަޝްވަރާތަކުގެ އަލީގައި ކަމަށް ސަރުކާރުގެ އިސްވެރިއަކު ވިދާޅުވި އެވެ.

ސައުދީ ފަންޑުގެ އެހީގައި މިހާރު ވެސް ރާއްޖޭގައި އެކި މަޝްރޫއުތައް ހިންގަ އެވެ. އަދި މިހާރު ހިންގަމުން އަންނަ އެންމެ ބޮޑު އެއް މަޝްރޫއު ކަމަށްވާ ވެލާނާ އިންޓަނޭޝަނަލް އެއާޕޯޓްގެ އާ ޓާމިނަލްގެ މަސައްކަތަށް ވެސް ސައުދީ ފަންޑުން ވަނީ އެހީ ހަމަޖައްސައި ދީފަ އެވެ. އެ މަޝްރޫއު އަވަސްކުރަން ވެސް މި ސަރުކާރުން އައި ފަހުން ވަނީ ސައުދީ ފަންޑުން އިތުރު އެހީ ހަމަޖައްސައި ދީފަ އެވެ.