އައްޑޫ މަތިކިޅި އިކޯ ގާޑަން އަށް ވަނުމަށް ފީ ނަގަން ފަށައިފި

އައްޑޫ މީދޫ މަތިކިޅި އިކޯ ގާޑަން އަށް ވަނުމަށް ފީ ނަގަން ފަށައިފި އެވެ.

އެ ޕާކަށް ވަނުމަށް ފީއެއް ނެގުމަށް އައްޑޫ ސިޓީ ކައުންސިލުން ފާސްކުރީ މިދިޔަ މަހުގެ ދެ ވަނަ ދުވަހު އެވެ. އޭރު ފާސްކުރި އުސޫލުގެ ދަށުން އިއްޔެ އިން ފެށިގެން ޕާކަށް ވަނުމަށް ފީ ނަގަން ވަނީ ފަށައިފަ އެވެ.

އެ އުސޫލުގައި ބުނީ، ޕާކަށް ވަނުމަށް ފީ ނަގާނީ ޓިކެޓް ވިއްކައިގެން ކަމަށެވެ. އެ ޓިކެޓުގައި ވަދެވޭނީ ގިނަވެގެން 45 މިނިޓަށް ކަމަށް ވެސް އުސޫލުގައި ބަޔާން ކޮށްފައި ވެ އެވެ.

ޓިކެޓްގެ އަގުތައް:

- ދިވެހިންނަށް: 10ރ.

- ޓޫރިސްޓުންނަށް: 50ރ.

- ބިދޭސީ މަސައްކަތްތެރިންނަށް: 15ރ.

އިކޯ ގާޑަން ޑިވެލޮޕްމެންޓް ޓީމާއި އައްޑޫ ސިޓީ ކައުންސިލްގެ އިތުރުން ދައުލަތުގެ ރަސްމީ ބޭނުންތަކަށް އެ ތަނަށް ވަނުމަށް ވިޒިޓިން ކާޑެއް ދޫކުރާނެ ކަމަށް ވެސް އުސޫލުގައި ވެ އެވެ.

ޕާޓީތަކާއި ހަފުލާތައް ބޭއްވުމަށް އެ ތަން ކުއްޔަށް ދޫކުރާނީ މަދުވެގެން ތިން ގަޑިއިރަށެވެ. އެ ތިން ގަޑިއިރުގެ ފީއަކީ 800ރ. އެވެ. އިތުރުވާ ކޮންމެ ގަޑިއަކަށް 100ރ. ނަގާނެ އެވެ.

އިކޯ ގާޑަން އަށް ވަނުމުގެ ފީ ބޭނުން ކުރާނީ އެ ތަން މަރާމާތުކޮށް ބެލެހެއްޓުމަށް ކަމަށާއި އެ ތަނުން ލިބޭ އާމްދަނީ ޖަމާ ކުރާނީ އައްޑޫ ކޮންޒަވޭޓިން ޓްރަސްޓް ފަންޑަށް ކަމަށް ވެސް ކައުންސިލްގެ އުސޫލުގައި ވެ އެވެ. އިކޯ ގާޑަންގެ ފަންޑުގެ ފައިސާ ހަރަދުކޮށް، ބަލަހައްޓާނީ ދައުލަތުގެ މާލިޔަތު ގާނޫނާއި ގަވައިދާ އެއްގޮތަށް ކަމަށް ވެސް އުސޫލުގައިވެ ބަޔާން ކޮށްފައި ވެ އެވެ.