އޯއައިސީ ސަމިޓްގައި ރައީސްގެ މަންދޫބެއްގެ ގޮތުން ޑރ. ޝަހީމް ބައިވެރިވެވަޑައިގަންނަވަނީ

އޯގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ) ގެ ސަމިޓްގައި ރައީސް ޑރ. މުހައްމަދު މުއިއްޒުގެ ހާއްސަ މަންދޫބެއްގެ ގޮތުން ބައިވެރިވެވަޑައިގަތުމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ގެމްބިއާ އަށް ފުރާވަޑައިގެންފި އެވެ.

އޯއައިސީގެ 15 ވަނަ ސަމިޓް އަންނަ ހަފުތާގައި ގެމްބިއާގައި ފަށަން ވަނީ ހަމަޖައްސައިފަ އެވެ.

އިސްލާމިކް މިނިސްޓްރީން ބުނީ އެ ސަމިޓްގައި ރައީސް މުއިއްޒުގެ ހާއްސަ މަންދޫބެއްގެ ގޮތުން ބައިވެރިވެ ވަޑައިގަތުމަށް މިނިސްޓަރު ޝަހީމް މިއަދު ފުރާވަޑައިގެންފައިވާ ކަމަށެވެ.

އޯއައިސީގެ މި ފަހަރުގެ ސަމިޓްގައި ފަލަސްތީނުގެ މައްސަލަ ވެސް ވަނީ އެޖެންޑާ ކޮށްފަ އެވެ.

ފަލަސްތީނުގެ މައްސަލާގައި ރާއްޖެ އިން އިއްޔެ ވަނީ އދ. ގައި އެ ގައުމުގެ ހައްގުގައި ވަކާލާތުކޮށްފަ އެވެ.

އިސްލާމިކް މިނިސްޓަރު ޝަހީމް މިދިޔަ ހަފުތާގައި ވަނީ މުސްލިމް ވޯލްޑް ލީގު (ރާބިތަތުލްއާލިމިލް އިސްލާމީ) ގެ އެންމެ މަތީ މަޖިލިހުގެ ޖަލްސާ އާއި އިސްލާމިކް ޑިވެލޮޕްމަންޓް ބޭންކް (އައިޑީބީ) ގެ އަހަރީ ޖަލްސާގައި ވެސް ބައިވެރިވެވަޑައިގެންފަ އެވެ. އެ ދެ ޖަލްސާ އޮތީ ސައޫދީ އަރަބިއްޔާގަ އެވެ.