8 ގައުމަކަށް ސަފީރުން އައްޔަންކުރަން ކޮމިޓީން ފާސްކޮށްފި

އަށް ގައުމަކަށް ސަފީރުން އައްޔަންކުރަން ރައީސް ޑރ. މުހައްމަދު މުއިއްޒު ފޮނުއްވާފައިވާ ބޭފުޅުންނަށް ރައްޔިތުންގެ މަޖިލީހުން ރުހުން ދޭން ފެންނަ ކަމަށް މަޖިލީހުގެ ހާރިޖީ ގުޅުންތަކުގެ ކޮމިޓީން މިއަދު ފާސްކޮށްފި އެވެ.

ރައީސް ޑރ. މުހައްމަދު މުއިއްޒު ސަފީރު ކަމަށް އައްޔަނުކުރަން މިހާތަނަށް ފޮނުއްވާފައިވާ ހުރިހާ ބޭފުޅުން ރުހުން ދިނުން ކޮމިޓީ މަރުހަލާގައި ގިނަ ދުވަސްތަކެއް ވަންދެން އޮތުމަށްފަހު، މިއަދު ބޭއްވި ކޮމިޓީގެ ބައްދަލުވުމުގައި، އަށް ގައުމަކަށް އައްޔަނުކުރައްވާފައިވާ ސަފީރުންނަށް ރުހުން ދޭން ފެންނަ ކަމަށް ވަނީ ކޮމިޓީގެ އަޣުލަބިއްޔަތުން ފާސްކޮށްފަ އެވެ.

ކޮމިޓީން ރުހުން ދިން 8 ބޭފުޅުން

1. ޔޫއޭއީ - މުހައްމަދު ހުސެއިން ޝަރީފް (މުންދު)

2. އިނގިރޭސިވިލާތް - އިރުތިޝާމް އާދަމް

3. އދ. - އަލީ ނަސީރު މުހައްމަދު (އަލިނީ)

4. ސްރީ ލަންކާ - މަސްއޫދު އިމާދު

5. މެލޭޝިއާ - މަރިޔަމް ޝަބީނާ އަހުމަދު

6. ބެލްޖިއަމް އާއި އީޔޫ - ގީލާ އަލީ

7. ސިންގަޕޫރު - މުހައްމަދު ލުވެއިޒު

8. ޖެނީވާ - ޑރ. ސަލްމާ ރަޝީދު

މި އަށް ބޭފުޅުންގެ އިތުރުން، ޗައިނާގައި ހުންނަވާ ރާއްޖޭގެ ސަފީރަކަށް ޑރ. ފަޒީލް ނަޖީބު އަދި ބަންގްލަދޭޝްގައި ހުންނަވާ ދިވެހި ސަފީރަކަށް ޝިއުނީން ރަޝީދު އައްޔަނުކުރުމަށް ރުހުން ދިނުން ވެސް ކޮމިޓީން އަންނަނީ ދިރާސާކުރަމުންނެވެ.

އެކަމާ ގުޅޭގޮތުން ކޮމިޓީގެ މުގައްރިރު އަދި ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން) ވިދާޅުވީ، އެ ދެ ބޭފުޅުންނާ ގުޅުންހުރި ލިޔުންތައް ކޯޓު މަރުހަލާއިން އަދި ނުލިބޭތީ އިންޓަވިއު ކުރުން ވެސް ކުރިއަށް ގެންދެވިފައި ނުވާ ކަމަށެވެ.

އަދި އެ ލިޔުންތައް ކޯޓުތަކުން ލިބުމާ އެކު، އެ ދެ ބޭފުޅުންނާ ވެސް އިންޓަވިއުކޮށް ރުހުން ދިނުމާ މެދު ވީއެންމެ އަވަހަކަށް ގޮތެއް ނިންމުމަށް ތާވަލުކުރައްވާނެ ކަމަށް އޭނާ ވިދާޅުވި އެވެ.

ޔޫއޭއީގެ ސަފީރުުކަމަށް އައްޔަން ކުރަން ނިންމަވާފައިވާ މުންދު ވަނީ ކުރީގެ ރައީސް އަބްދުﷲ ޔާމީންގެ ސަރުކާރުގައި ރައީސް އޮފީހުގެ މިނިސްޓަރު ކަމުގެ އިތުރުން ޖަޕާނުގައި ހުންނަވާ ދިވެހި ސަފީރުކަން ވެސް ކުރައްވައިފަ އެވެ.

އިނގިރޭސި ވިލާތުގައި ހުންނަވާ ދިވެހި ސަފީރަކަށް އައްޔަނުކުރައްވަން ނިންމަވާފައިވާ އިރުތިޝާމް އާދަމަކީ ކުރީގެ ޔޫތު މިނިސްޓަރެވެ. އދ. ގައި ހުންނަވާ ރާއްޖޭގެ ދާއިމީ މަންދޫބަކަށް އައްޔަން ކުރައްވަނީ ކުރީގެ ފޮރިން ސެކްރެޓަރީ އަލީ ނަސީރު މުހައްމަދު (އަލިނީ) އެވެ. އެ ތިން ބޭފުޅުން ވެސް ވަނީ ރާއްޖޭގެ ހާރިޖީ ދާއިރާއާ ގުޅޭ ކަންކަމުގައި ގިނަ ދުވަސްތަކެއް ވަންދެން މަސައްކަތް ކުރައްވައިފަ އެވެ.

ލަންކާ ސަފީރު ކަމަށް އައްޔަން ކުރަން ފޮނުވި މަސްއޫދަކީ ކުރީގެ ރައީސް ޑރ. މުހައްމަދު ވަހީދުގެ ސަރުކާރުގެ ޕްރެސް ސެކެޓްރީގެ މަގާމު އަދާކުރެއްވި ބޭފުޅެކެވެ. ހެލްތު މިނިސްޓްރީގެ ކުރީގެ ޕާމަނަންޓް ސެކްރެޓަރީގެ މަގާމު ފުރުއްވި ގީލާ ވަނީ ކުރިން ވެސް ހާރިޖީ ދާއިރާގައި މަސައްކަތް ކުރައްވައިފަ އެވެ.

ޖެނީވާގައި ހުންނަވާ ދާއިމީ މަންދޫބަކަށް އައްޔަނުކުރައްވާ ޑރ. ސަލްމާއަކީ ނިމުނު މަޖިލިސް އިންތިހާބުގައި މާފަންނު މެދު ދާއިރާގެ ގޮނޑި ކާމިޔާބުކުރެއްވި އަސްމާ ރަޝީދުގެ އެއްބަނޑުއެއްބަފާ ކޮއްކޮ އެވެ. އަދި ޑރ. ސަލްމާއަކީ ޔޫއޭއީގެ ސަފީރުކަމަށް އައްޔަން ކުރައްވާ މުންދުގެ ބޮޑުދައިތަ އެވެ.

ސިންގަޕޫރު ސަފީރު ކަމަށް އައްޔަން ކުރަން ފޮނުވި ލުވެއިޒަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި ރައީސް އޮފީހުގެ މިނިސްޓަ އޮފް ސްޓޭޓް ފޯ އިކޮނޮމިކް ރިލޭޝަންސްގެ މަގާމުގެ އިތުރުން އިކޮނޮމިކް އެންޑް ޔޫތް ކައުންސިލްގެ މެންބަރުކަން ވެސް ކުރައްވާފައިވާ ބޭފުޅެކެވެ. އަދި މޯލްޑިވްސް ނޭޝަނަލް ޔުނިވާސިޓީގެ ކައުންސިލްގެ މެމްބަރުކަން ވެސް ލުވެއިޒު ކުރެއްވި އެވެ.