ނާޒިމަށް 2.3 މިލިއަން ރުފިޔާ ދައްކަން ސަންލޭންޑް ހުސެއިން ހިލްމީގެ މައްޗަށް ހުކުމްކޮށްފި

ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ޑިފެންސް މިނިސްޓަރު މުހައްމަދު ނާޒިމަށް ދެ މިލިއަނަށް ވުރެ ގިނަ ރުފިޔާ ދައްކަން ސަންލޭންޑް ހޮޓެލްސްގެ އެއް ހިއްސާދާރު ހުސެއިން ހިލްމީގެ މައްޗަށް މިދިޔަ ބުރާސްފަތިދުވަހު ސިވިލް ކޯޓުން ހުކުމްކޮށްފި އެވެ.

ހަނގުރާމަވެރި ހަތިޔާރު ގެންގުޅުމުގެ ކުށުގައި 11 އަހަރަށް ޖަލަށްލާން ހުކުމްކޮށްފައިވާ، އެކަމަކު ވަގުތީ ގޮތުން ގޭ ބަންދުގައި މިހާރު ހުންނެވި ނާޒިމަށް 2.3 މިލިއަން ރުފިޔާ ދައްކަން ކުރީގެ ރައީސް މައުމޫންގެ ސަރުކާރުގައި ޔޫތު މިނިސްޓަރު ކަމާއި ފިޝަރީޒް މިނިސްޓަރުކަން ކުރެއްވި، މއ. ވާހާރި، ހުސައިން ހިލްމީގެ މައްޗަށް ހުކުމް އައީ ދެ ފަރާތުގެ ދެމެދު ކުރެވުނު މުއާމަލާތެއްގެ ދަށުން، އެ ފައިސާ ނާޒިމަށް ލިބެންޖެހޭ ކަމަށް ބުނެ އޭނާ ދައުވާ ކުރެއްވުމުންނެވެ.

މި ފައިސާ ދައްކަންޖެހޭ ކަމަށް ހުސެއިން ހިލްމީގެ ފަރާތުން ކޯޓުގައި އެއްބަސްވެ، މި މަހުން ފެށިގެން އަންނަ ޖުލައި މަހާ ހަމަ އަށް އެކި ފަހަރު މަތިން އެކި މިންވަރަށް ފައިސާ ދައްކައި، އެ ދަރަނި ޚަލާސް ކުރަން އޭނާ ހުށަހެޅުމުން، ނާޒިމްގެ ފަރާތުން އެ ހުށަހެޅުން ގަބޫލުކުރި އެވެ. އެހެންވެ، އެގޮތަށް ފައިސާ ދައްކަން ހުސެއިން ހިލްމީގެ މައްޗަށް ކޯޓުގެ ހުކުމުގައިވަނީ އަންގައިފަ އެވެ.

ނަމަވެސް ކާސްޓް އަވޭ މޯލްޑިވްސް ނަމަކަށް ކިޔާ ކުންފުންޏެއްގެ ނަމުގައި ބޭންކް އޮފް ސިލޯންގެ މާލޭ ބްރާންޗްގައި ހުރި އެކައުންޓަކުން ނާޒިމަށް ދޫކޮށްފައިވާ އެއްވެސް ޗެކަކަށް ފައިސާ ލިބިއްޖެ ނަމަ، އެ ފައިސާއަކީ ހުސެއިން ހިލްމީ ދައްކަންޖެހޭ އެ ދަރަނިން އުނި ކުރެވޭނެ ފައިސާއެއް ކަމަށް ހުކުމުގައިވެ އެވެ. އެ ޗެކްތަކަކީ ހުސެއިން ހިލްމީގެ ބޭނުމަކަށް ނާޒިމަށް ދޫކޮށްފައިވާ ޗެކްތަކެއް ކަމަށް ހުކުމުގައި ވެ އެވެ.

ހުސެއިން ހިލްމީގެ ސަންލޭންޑަކީ އެކި ރިސޯޓްތައް ހިންގަމުން އަންނަ ކުންފުންޏެކެވެ.

ނާޒިމްގެ އާއިލީ މަސްލަހަތު އޮންނަ އާރްސީސީ ކުންފުނިން ވަނީ ކުރީގެ ރައީސް މައުމޫންގެ ހަތަރު ބޭފުޅުންނާ ދެކޮޅަށް ވެސް، ދެ މިލިއަނަށް ވުރެ ގިނަ ރުފިޔާ ހޯދަން ދައުވާކޮށްފަ އެވެ. އެ ދައުވާ ކުރަނީ އެ ހަތަރު ބޭފުޅުންގެ ނަމުގައި އޮތް ބިމެއްގައި އިމާރާތް ކޮށް ދިނުމުން ފައިސާ ނުދޭ ކަމަށް ބުނެއެވެ.