ރިޔާސީ އިންތިހާބުގެ ކަވަރޭޖަށް ޕީއެސްއެމް އަށް ހެދި ސޮފްޓްވެއާގެ ފައިސާ ދައްކަން ހުކުމްކޮށްފި

ދައުލަތުގެ މީޑިއާ، ޕީއެސްއެމް އަށް 2018 ވަނަ އަހަރުގެ ރިޔާސީ އިންތިހާބަށް ތައްޔާރުކޮށްދިން ސޮފްޓްވެއާގެ އަގު ކަމަށްވާ 39،000 ޔޫރޯ ދައްކަން އެ ކުންފުނީގެ މައްޗަށް ސިވިލް ކޯޓުން ހުކުމް ކޮށްފި އެވެ.

ރިޔާސީ އިންތިހާބުގެ ނަތީޖާ ޓީވީން ގެނެސްދޭ ސޮފްޓްވެއާ ފޯރުކޮށްދިނުމަށް ޕީއެސްއެމް އިން 2018 ވަނަ އަހަރު ވިސްޑަމް ޓެލެވިޒަން - ސިސްޓެމަސް އިންފޯމަޓިކޮސް ޕެރާ ޓެލެވިޒޯ އެލްޑީއޭ ކިޔާ ކުންފުންޏަކާ އެކު އެއްބަސްވެފައިވެ އެވެ.

އެއްބަސްވެފައިވަނީ ސޮފްޓްވެއާގެ އަގުގެ ގޮތުގައި ޖުމްލަ 72،500 ޔޫރޯ ޕީއެސްއެމް އިން ދައްކަން ޖެހޭ ގޮތަށެވެ. އެއީ ހިދުމަތް ފޯރުކޮށްދިނުމުގެ ކުރިން 50 ޕަސެންޓްގެ އަގު އަދި އޭގެ ފަހުން ބާކީ ދެއްކުމަށެވެ. ޕީއެސްއެމް އިން ވަނީ އެޑްވާންސްގެ ގޮތުގައި 36،250 ޔޫރޯ އެ ކުންފުންޏަށް ދައްކައިފަ އެވެ.

އެ އަހަރުގެ ރިޔާސީ އިންތިހާބުގެ ނަތީޖާ ޕީއެސްއެމް އިން ގެނެސްދިނީ މި ސޮފްޓްވެއާ ބޭނުންކޮށްގެންނެވެ. ނަމަވެސް، ބާކީ ފައިސާ ދޭން ޕީއެސްއެމް އިން ދެކޮޅު ހެދި އެވެ. ޕީއެސްއެމްގެ ފަރާތުން ކޯޓުގައި ބުނެފައިވާ ގޮތުގައި އެ ފައިސާ ދޭން އިންކާރު ކުރަނީ ސޮފްޓްވެއާ އެ ކުންފުނިން ޕީއެސްއެމް އަށް ކުއްޔަށް ދޫކުރީ އޮޅުވާލައިގެން ކަމަށްވާތީ އެވެ.

ޕީއެސްއެމް އިން ބުނި ގޮތުގައި އެއްބަސްވުން ހެދުމުގެ މަޝްވަރާގައި އެ ކުންފުނިން މައުލޫމާތު ދިން ގޮތުގައި އެ އަގަކީ އެފަދަ ސޮފްޓްވެއާއެއް ލިބޭނެ އެންމެ ކުޑަ އަގު ކަމަށާއި ނަމަވެސް އެ އަގަކީ އެއަށްވުރެ މާ ބޮޑު އަގެކެވެ. އެހެންކަމުން ޕީއެސްއެމް އިން އެ އެއްބަސްވުމުގައި ސޮއިކޮށްފައިވަނީ ސޮފްޓްވެއާ ކުންފުނިން ފޯރުކޮށްދިން ދޮގު މައުލޫމާތެއްގެ މައްޗަށް ބިނާވެ ކަމަށް ޕީއެސްއެމް އިން ބުންޏެވެ.

ނަމަވެސް، ސިވިލް ކޯޓުން ކުރި ހުކުމްގައި ބުނީ ޕީއެސްއެމްއިން ބުނާ އޮޅުވާލުން ސާބިތު ކުރެވޭ ފަދަ އެއްވެސް ހެއްކެއް ހުށަހަޅާފައި ނެތް ކަމަށެވެ. ޕީއެސްއެމް އިން ހުށަހެޅީ ސޮފްޓެވެއާ ކުންފުނީގެ އަގަށް ވުރެ ދަށް އަގެއްގައި އެހެން ކުންފުންޏެއްގެ ވެބްސައިޓުން ސޮފްޓެވެއާ ގަންނަން ލިބެން ހުރިކަން އެނގޭ ސްކްރީންޝޮޓެކެވެ.

ހުކުމްގައި ބުނީ އެއްބަސްވުން ހެދުމުގެ ކުރިން ވެސް އެކަން އެގޮތަށް ސާފުކުރަން ފުރުސަތު އޮވެ، އެކަން ނުކޮށް، ކުންފުނިން ހިދުމަތް ފޯރުކޮށްދިނުމުން ދެން އެއްބަސްވެފައިވާ އަގު ދައްކަން އިންކާރު ކުރުމަކީ އެއްވެސް އަސާސެއް ނެތް އިންކާރެއް ކަމަށެވެ.

އަދި ކުންފުނިން ހޯދަން ދައުވާ ކުރާ ފައިސާއަކީ ދެ ފަރާތުން އެއްބަސްވުމުގައި އެއްބަސްވެ ސޮއިކޮށްފައިވާ ފައިސާއެއް ކަމާ މެދު ހިޔާލު ތަފާތުވުމެއް ނެތް ކަމަށް ހުކުމްގައިވެ އެވެ. އެހެންވެ، ކޯޓުން ވަނީ އެއްބަސްވުމުގައިވާ އަގުގެ ބާކީ ފައިސާ ދައްކަން ޕީއެސްއެމްގެ މައްޗަށް އަމުރުކޮށްފަ އެވެ. އަދި އެ ކުންފުނީގެ މުވައްޒަފުންތަކެއް ރާއްޖޭގައި ތިބުމަށް ހޭދަވި 3،500 ޔޫރޯ ވެސް ކޯޓުން ވަނީ ނަގައިދީފަ އެވެ. އެއާ އެކު ޖުމްލަ 39،750 ޔޫރޯ އަންނަ މަހުގެ 14 ކުރިން ދައްކަން ޕީއެސްއެމްގެ މައްޗަށް ހުކުމްކޮށްފައިވެ އެވެ.