އާސެނަލް މުޅިން ތަފާތުވެއްޖެ، ލީގު ހޯދުމުގެ ހުރިހާ ސިފައެއް އެބަހުރި

ބްރައިޓަން (ފެބްރުއަރީ 7) - ބްރައިޓަންއާ ދެކޮޅަށް އާސެނަލް ދެއްކި މޮޅު ކުޅުމާ އެކު ތާވަލުގެ އެއްވަނައަށް އަރައި ލީގު ހޯދުމުގެ ފެންވަރު ހުރިކަން ސާބިތުކޮށްދީފި އެވެ.

އާސެނަލް އެއްވަނަ އަށް އެރީ ކުރިން އެއްވަނައިގައި އޮތް ލިވަޕޫލަށް ވުރެ އިތުރަށް އެއް މެޗު ކުޅެ އަދި އެ ޓީމަށް ވުރެ އިތުރަށް އެއް ޕޮއިންޓް ހޯދައިގެންނެވެ.

ބޮޑު ފަރަގެއް ނެތަސް އާސެނަލުން ދަނީ އެ ޓީމުގެ ފެންވަރު މި އަހަރު ސާބިތުކޮށް ދެމުންނެވެ. މިދިޔަ އަހަރު ވެސް ލީގުގެ މިހާހިސާބަށް އައިއިރު އާސެނަލް އެއްވަނައިގައި އޮތް ނަމަވެސް ފަހުން ފަހަތަށް ވެއްޓުނީ އެެވެ. މިދިޔަ އަހަރާއި މިއަހަރުގެ ތަފާތާ ބެހޭގޮތުން އެ ޓީމުގެ ކޯޗު މިކަލް އާޓެޓާއާ ސުވާލު ކުރުމުން އޭނާ ސަމާސާ ރާގަކަށް ބުނީ މިދިޔަ އަހަރު މަތިން ހަނދާން ނައްތާލާފައިވާ ކަމަށެވެ.

އާސެނަލުން ލީގުގައި ކުޅުނު 31 ވަނަ މެޗުގައި ރޭ، ފުރަތަމަ ލަނޑު ބުކަޔޯ ސަކާ ޖެހީ ޕެނަލްޓީއަކުންނެވެ. އެ ޕެނަލްޓީއާ ވެސް މިދިޔަ އަހަރުގެ ސީޒަނާ އަޅާކިޔާލުމުގެ ޖާގަ އެބައޮތެވެ. މިދިޔަ އަހަރު 31 ވަނަ މެޗުގައި ވެސްޓްހޭމާ ދެކޮޅަށް އާސެނަލްގެ ޕެނަލްޓީ ކާމިޔާބެއް ނުވި އެވެ.

"ފިލާވަޅުތައް ވަރަށް ސާފުކޮށް ދަސްވެއްޖެކަން އެނގެ އެވެ. ސަކާގެ ގޯލަކީ 2024 ގައި އާސެނަލަކީ މިދިޔަ އަހަރާ ތަފާތު ޓީމެއްކަން ސާބިތުކޮށްދޭ އިތުރު ހެއްކެކެވެ: މާ ހަރުދަނާ ޓީމެއްގެ ގޮތުގައި ފެނެ އެވެ. ހަގީގަތުގައި ޕްރިމިއާ ލީގު ކާމިޔާބު ކުރަން އެ ޓީމު މާ ބޮޑަށް ތައްޔާރަށް އޮތްތަން ފެނެ އެވެ. ފަހަކަށް އައިސް ގޯލުގެ ކުރިމަތީގައި އެހާ ނުރައްކާތެރި އެހެން ޓީމެއް ނެތް އިރު، އަމިއްލަ އޭރިއާ ދިފާއު ކުރުމުގައި އެހެން އެއްވެސް ޓީމަކުން އެހާ ހުނަރުވެރިކަމެއް ނުފެނެ އެވެ،" އާސެނަލުން މިހާރު ދައްކާ ކުޅުމާ ބެހޭގޮތުން އިނގިރޭސި ފުޓްބޯޅަ ލިޔުންތެރިޔާ ސޭމް ޑީން ލިޔެފައި ވެއެވެ.

އާސެނަލްގެ އަނެއް ދެ ލަނޑު ދެވަނަ ހާފުގައި ޖެހީ ކައި ހަވާޓްޒް އާއި ލިއަންޑްރޯ ޓްރަސޯޑް އެވެ.

"އަހަރެމެން މިއޮތީ ވަރަށް ރަނގަޅަށް. ސްކޮޑް އޮތީ ރަނގަޅު ފެންވަރެއްގައި ހަކަތަ އެބަހުރި އަދި އިތުބާރު އެބައޮތް. ވަކިވަކި ކުޅުންތެރިންނަށް ބެލިޔަސް އަދި ޓީމެއްގެ ގޮތުގައި ބެލިޔަސް، އަހަރެމެން މި ކުރަމުންދާ މަސައްކަތް ޖެހޭނެ ދަމަހައްޓަން،" މެޗަށް ފަހު ވާހަކަ ދައްކަމުން އާޓެޓާ ބުންޏެވެ.

އޭނާ ބުނީ ކުޅުންތެރިން މިހާރު ދައްކާ ކުޅުމާ އެކު ލީގު ހޯދަން އެ ކުޅުންތެރިން ބޭނުންވާ ވަރު ދަނޑުމަތިން ފެންނަ ކަމަށެވެ.