ޑްރަގުގެ ބޮޑު މައްސަލައެއްގައި އެކަކު ޖަލަށް، ދެ މީހަކު މިނިވަންވެއްޖެ

މަސްތުވާތަކެތީގެ ބާވަތެއް ކަމަށްވާ ޑައިމޯފިން ޓްރެފިކް ކުރުމުގެ މައްސަލައެއްގައި އެކެއްގެ މައްޗަށް އުމުރު ދުވަހުގެ ޖަލު ހުކުމެއް އިއްވިއިރު، ދައުވާ ލިބުނު އަނެއް ދެ މީހުންނަށް ކުށް ސާބިތުނުވެ މިނިވަންވެއްޖެ އެވެ.

އުމުރު ދުވަހުގެ ޖަލު ހުކުމެއް އިއްވީ ގދ. ހޯނޑެއްދޫ ގުލޭނޫރަންމާގެ އަލީ ޒުބައިރުގެ މައްޗަށެވެ. އޭނާ ވަނީ 100،000ރ. އިން ޖޫރިމަނާ ވެސް ކޮށްފަ އެވެ.

ޒުބެއިރަކީ މަސްތުވާތަކެތީގެ އެހެން މައްސަލަތަކެއްގައި ދައުވާ ވެސް ލިބޭ މީހެކެވެ. އޭނާގެ މައްޗަށް ކުށް ސާބިތު ނުވި މައްސަލައެއް މިހާރު ވެސް ހައި ކޯޓުގައި ކުރިއަށްދެ އެވެ.

ދައުވާ ސާބިތުނުވީ ގދ. ހޯނޑެއްދޫ އިރުމަތީގެ އަހުމަދު ސުނައިނު އަދި އެ ރަށު އަލޯރާ އަހުމަދު މުޖާހިދުގެ މައްޗަށެވެ. މަސްތުވާތަކެތީގެ އެހެން މައްސަލައެއްގައި ސުނައިނު ސަލާމަތްވުމުން އޭނާގެ މައްސަލަ ވެސް ހައި ކޯޓުގައި ކުރިއަށް އެބަދެ އެވެ.

މިއީ 2021 ވަނަ އަހަރު ފުލުހުން ހިންގި އޮޕަރޭޝަނެއްގެ ތެރެއިން ހުއްޓުވި ޓެކްސީއަކުން މަސްތުވާތަކެތި ފެނުނު މައްސަލައެކެވެ. އެ ޓެކްސީގެ ޑިކީ ތެރެއިން މަސްތުވާތަކެތި އަޅާފައިވާ ފޮށިގަނޑެއް ފެނުނުއިރު އޭގައި ދަތުރުކުރީ ސުނައިހާއި ޒުބައިރެވެ. އޭގެ ފަހުން ފުލުހުން ބަލައިފާސްކުރުމުގެ ތެރޭގައި ޒުބައިރުގެ ގެއިންނާއި ސައިކަލުން ވެސް މަސްތުވާތަކެތި ފެނުނެވެ.

މި މައްސަލާގައި ޖުމްލަ 119 ކިލޯގެ މަސްތުވާތަކެތި އަތުލައިގަތެވެ.

މުޖާހިދު ދުއްވި ކާރެއް ހުޅުމާލެއިން ބަލައިފާސްކުރުމުގެ ތެރޭގައި އެ ކާރުން ވެސް މަސްތުވާތަކެތި ފެނިފައިވެ އެވެ. އެ ކާރުގައި މުޖާހިދުގެ އަމިއްލަ ތަކެތި ވެސް ހުއްޓެވެ. އެ ކާރުން ފެނުނު ފުޅިމަދު ފޮށިގަނޑު ހިފައިގެން ޒުބެއިރާއި ސުނެއިހު އުޅޭ މަންޒަރު ފެންނަ ސީސީޓީވީ ފުޓޭޖްތައް ވެސް ލިބިފައިވެ އެވެ. އަދި ޒުބެއިރުގެ އިނގިލީގެ ނިޝާން ވެސް ފެނިފައިވެ އެވެ.

މި މައްސަލަ ސާބިތު ކުރަން ދައުލަތުން ވަރަށް ގިނަ ހެކި ހުށަހަޅާފައިވެ އެވެ. ކިތާބީ އަދި ޝަފަހީ ހެކި ހިމެނޭ ގޮތުން 56 ހެއްކެއް ޝަރީއަތަށް ހުށަހެޅި އެވެ.

ފެނުނު މަސްތުވާތަކެއްޗަކީ ޒުބައިރުގެ ހިޔާޒަތުން ފެނުނު ތަކެތި ކަމާއި އެ ތަކެތި އެ ތަންތަނުގައި ހުރި ކަމާއި އޭގެ އިލްމު އޭނާއަށް ލިބިފައިވާ ކަމަށް ހެކިންގެ ހެކި ބަހުންނާއި ހެކިތަކުން ޝަރީއަތަށް ސާބިތުވާ ކަމަށް ކްރިމިނަލް ކޯޓުގެ ގާޒީ އިބްރާހިމް އިހްސާން އިއްޔެ އިއްވެވި ހުކުމްގައި ކަނޑައަޅާފައިވެ އެވެ.

ނަމަވެސް، ފެނުނު މަސްތުވާތަކެތީގެ މައުލޫމާތު ސުނައިހަށް އެނގޭ ކަމަށް ނުބެލެވޭ ކަމަށާއި އަދި އެކަން ސާބިތުކޮށްދިނުމަށް ދައުލަތުން އެއްވެސް ހެއްކެއް ހުށަހަޅާފައިނުވާ ކަމަށް ހުކުމްގައިވެ އެވެ. އެ މަސްތުވާތަކެތީގެ މައްޗަށް ސުނައިހުގެ ހިޔާޒަތު އޮތް ކަމަށް ޝަރީއަތަށް ގަބޫލު ނުކުރެވޭނެ ކަމަށް ވެސް ހުކުމްގައިވެ އެވެ.

މައްސަލާގައި މުޖާހިދުގެ ގެ ބަލައިފާސްކުރިއިރު ކާރާ ގުޅޭ އެއްވެސް އެއްޗެއް ފެނިފައިނުވާ ކަމަށާއި ކާރު ހުޅުވާފައިވަނީ ވެސް ފުލުހުން ބާރުގެ ބޭނުންކޮށްގެން ކަމަށް ހުކުމްގައިވެ އެވެ. ކާރުގެ ތެރެއިން ފެނުނު މަސްތުވާތަކެތި އަޅާފައިހުރި ފުޅިމަދު ފޮށިތަކާއި ދަބަސްތަކުން އޭނާގެ ފިންގަޕްރިންޓެއް، ޑީއެންއޭއެއް ވެސް ފެނުފައިނުވާ ކަމަށް ހުކުމްގައިވެ އެވެ.

ހުކުމްގައި ބުނީ މުޖާހިދުގެ މައްޗަށް މަސްތުވާތަކެތީގެ ހިޔާޒަތު އޮތްކަން އެނގޭނެ ހެއްކެއް ދައުލަތުން ހުށަހަޅާފައިނުވާ ކަމަށާއި އެހެންވެ އެ ތަކެއްޗާ ގުޅިގެން އޭނާ ގާނޫނީ ގޮތުން ޒިންމާދާރު ކުރެވިދާނެ ކަމަކަށް ނުދެކޭ ކަމަށެވެ.