Roadha Mihaaru
"ހަވާލުވިއިރު އެމްޓީސީސީ އޮތީ 954 މިލިއަނުން ދަރާ"

އެމްޓީސީސީ: އާ މެނޭޖްމެންޓް ހަވާލުވި އިރު ދަރަނި 954 މިލިއަން ރުފިޔާގައި

06 މާޗް 2024

މި ވެރިކަން ފެށި، އެމްޓީސީސީއާ، އާ މެނޭޖްމަންޓުން ހަވާލުވި އިރު މާލީ ހާލަތު އޮތީ ވަރަށް ދަށް ހާލަތެއްގައި ކަމަށާއި އެ ކުންފުންޏަށް ލިބެން ޖެހޭ 1.7 ބިލިއަން ރުފިޔާ ނުލިބި އޮތް އިރު، އެ ކުންފުނިން އެހެން ފަރާތްތަކަށް ދައްކަން ޖެހޭ 954 މިލިއަން ރުފިޔާގެ ދަރަނި އެބަ އޮތް ކަމަށް އެމްޓީސީސީގެ އިސްވެރިން މިއަދު ވިދާޅުވެއްޖެ އެވެ.

ފާތިމަތު ޝަނާ މުހައްމަދު ފާތިމަތު ޝަނާ މުހައްމަދު

މި ވެރިކަން ފެށި، އެމްޓީސީސީއާ، އާ މެނޭޖްމަންޓުން ހަވާލުވި އިރު މާލީ ހާލަތު އޮތީ ވަރަށް ދަށް ހާލަތެއްގައި ކަމަށާއި އެ ކުންފުންޏަށް ލިބެން ޖެހޭ 1.7 ބިލިއަން ރުފިޔާ ނުލިބި އޮތް އިރު، އެ ކުންފުނިން އެހެން ފަރާތްތަކަށް ދައްކަން ޖެހޭ 954 މިލިއަން ރުފިޔާގެ ދަރަނި އެބަ އޮތް ކަމަށް އެމްޓީސީސީގެ އިސްވެރިން މިއަދު ވިދާޅުވެއްޖެ އެވެ.

އެމްޓީސީސީން މިއަދު ބޭއްވި ނޫސްވެރިންގެ ބައްދަލުވުމުގައި އެ ކުންފުނީގެ ސީއީއޯ އަބްދުﷲ ޒިޔާދު ވިދާޅުވީ، ވޭތުވެދިޔަ ދުވަސްތަކުގައި އެ ކުންފުންޏަކީ ވަރަށް ރަނގަޅަށް ހިންގަމުން އައި ކުންފުންޏެއް ކަމަށް މީޑިއާތަކަށް ތިލަކޮށްދީފައި އޮތް ނަމަވެސް، ކުންފުނި އޮތީ ވަރަށް ހާލަތު ގޯސްކޮށް ކަމަށެވެ.

އެމްޓީސީގެ މެނޭޖިންް ޑިރެކްޓަރަކަށް އެންމެ ފަހުން ހުންނެވީ، އެމްޑީޕީގެ ޓިކެޓުގައި މާލޭގެ މޭޔަރުކަމަށް ހޮވިވަޑައިގަތް އާދަމް އާޒިމެވެ.

"ހިންގުމުގެ ހަރަދު ވަރަށް ބޮޑު. ވަރަށް ގިނަ ސައިޓުތައް އައިޑަލްވުމާއި ކޮސްޓްތަކެއް ވަރަށް ބޮޑަށް ބެއާ ކުރަން ޖެހިފައި އޮތް ހާލަތެއް. ހަރުމުދާ ބެލެހެއްޓުމުގައި ވެސް އެބަހުރި އިހުމާލުތަކެއް ވެފައި. އަދި ހާއްސަކޮށް މަހާޖައްރާފު އޮތް ހާލަތާ މެދު ރައްޔިތުން ކަންބޮޑުވާނެ،" އޭނާ ވިދާޅުވި އެވެ.

އެމްޓީސީސީން ބިން ހިއްކުމުގެ މަސައްކަތް ކުރަނީ -- ފޮޓޯ: އެމްޓީސީސީ

އެމްޓީސީސީން ބިން ހިއްކުމުގެ މަސައްކަތް ކުރަނީ -- ފޮޓޯ: އެމްޓީސީސީ

ޒިޔާދު ވިދާޅުވީ، ކުރީގެ މެނޭޖްމެންޓްގެ ބައެއް އަމަލުތައް ހުރި ގޮތުން ބައެއް މަޝްރޫއުތައް ހުރީ މަޑުޖެހިފައި ކަމަށެވެ.

އޭނާ ވިދާޅުވީ، މައްސަލަތައް ދެނެގަނެ، އެކަންކަން ހައްލު ކުރުމަށް ފިޔަވަޅުތައް މިހާރު އަޅަން ފަށައިފައިވާ ކަމަށެވެ. އަދި ކުންފުންޏަށް ގެއްލުންވާ ގޮތައް ހުރި ކަންކަމާ ގުޅޭ ގޮތުން އޮޑިޓްތައް ހަދަމުން އަންނަ ކަމަށް ޒިޔާދު ވިދާޅުވި އެވެ.

އެމްޓީސީސީގެ ޗީފް ފައިނޭންޝަލް އޮފިސާ (ސީއެފްއޯ) ހުސެއިން މުހައްމަދު މަނިކު ވިދާޅުވީ، އެ ކުންފުންޏަށް ލިބެން ޖެހޭ، އެކަމަކު ނުލިބިވާ 1.7 ބިލިއަން ރުފިޔާ އެބަ އޮތް ކަމަށެވެ. އޭގެ ތެރެއިން ގާތްގަނޑަކަށް 800 މިލިއަން ރުފިޔާއަކީ ސަރުކާރުން ލިބެން ޖެހޭ އަދަދު ކަމަށް ވިދާޅުވި އެވެ.

އަދި އެކުންފުނީގެ އެހެން ފަރާތްތަކަށް ދައްކަން ޖެހޭ ދަރަނީގެ ގޮތުގައި 954 މިލިއަން ރުފިޔާ އެބަ އޮތް ކަމަށް އޭނާ ވިދާޅުވި އެވެ. އޭގެ ތެރޭގައި 50 ޕަސެންޓް ދައްކަން ޖެހެނީ ބޭރުގެ ކުންފުނިތަކަށެވެ.

"ކުންފުނީގެ ބޮރޮވިންސް [ލޯނު] މިއުޅެނީ 100 މިލިއަންގައި. ރިސީވަބަލްސް [ލިބެން ޖެހޭ ފައިސާ] ރިކަވާ ކުރުމުގައި އަޅުގަނޑުމެންގެ ސްޓްރެޓެޖީއަކީ ޕްރައިވެޓް ޕްރޮޖެކްޓްތަކަށް އަޅުގަނޑުމެން ޑައިވާސިފައިކުރުން. ޕްރައިވެޓް ޕްރޮޖެކްޓްތަކަށް ޑައިވާސިފައިކޮށްފައި އަޅުގަނޑުމެން ބޭނުންވަނީ އެ ޕްރޮޖެކްޓްތަކުން ޑޮލަރު ހޯދަން" އޭނާ ވިދާޅުވި އެވެ.

އެމްޓީސީސީއިން ޕްރޮޖެކްޓެއްގެ މަސައްކަތް ކުރުމަށް ބަނދުގައި އޮތް ޑްރެޖާއެއް -- ފޮޓޯ: އެމްޓީސީސީ

އެމްޓީސީސީއިން ޕްރޮޖެކްޓެއްގެ މަސައްކަތް ކުރުމަށް ބަނދުގައި އޮތް ޑްރެޖާއެއް -- ފޮޓޯ: އެމްޓީސީސީ

މަނިކު ވިދާޅުވީ، އެ ކުންފުނިން ދައްކަން ޖެހޭ ދަރަނި ދެއްކުމަށް ވެސް ޑޮލަރުން އާމްދަނީ ލިބޭ ޕްރޮޖެކްޓްތަކަށް ދިއުމުން ފަސޭހަވާނެ ކަމަށެވެ. އެ ކުންފުނިން މިދިޔަ ޖެނުއަރީ މަހު ވެސް 19 މިލިއަން ޑޮލަރުގެ ޕްރޮޖެކްޓެއް ފަށައިފައިވާ ކަމަށާއި 1.1 މިލިއަން ޑޮލަރުގެ ޕްރޮޖެކްޓެއްގެ ވެސް ކުރިއަށް ގެންގޮސްފައިވާ ކަމަށް އޭނާ ވިދާޅުވި އެވެ.

އޭނާ ވިދާޅުވީ، ޑޮލަރުން އާމްދަނީ ހޯދުމުން، ކުންފުންޏަށް ބޭނުންވާ ބޭރު ފައިސާ ހޯދަން ހައްލުތަކެއް ލިބޭނެ ކަމަށެވެ. އަދި ދަރަނި އަދާކުރުމަށް ފަސޭހަވާނެ ކަމަށް އޭނާ ވިދާޅުވި އެވެ.

މަނިކު ވިދާޅުވި ގޮތުގައި އެކުންފުނީގެ އަމާޒަކީ ޓްރޭޑިން ދާއިރާގެ ވިޔަފާރީގެ އާމްދަނީ 500 މިލިއަނަށް އިތުރު ކުރުމެވެ. އެކަން ހާސިލު ކުރަން ގޮންޖެހުންތައް ހުރި ނަމަވެސް، އާ ދާއިރާތަކުން މަޝްރޫއުތައް ހިންގައިގެން އެކަން ކުރެވޭނެ ކަމަށް އޭނާ ވިދާޅުވި އެވެ.

މިދިޔަ އަހަރު އެ ކުންފުނީގެ އާމްދަނީ 3.2 ބިލިއަން ރުފިޔާއަށް އަރާ ކަމަށް ކުއާޓާލީ ރިޕޯޓުތަކުން ދައްކަ އެވެ. އަދި އެކުންފުނީގެ ސާފު ފައިދާ 130 މިލިއަން ރުފިޔާއަށް އަރަ އެވެ. މިއީ 2022 ވަނަ އަހަރަށް ވުރެ 66 މިލއިަން ރުފިޔާ ދަށް އަދަދެކެވެ.

ޒިޔާދު ވިދާޅުވީ، އެކުންފުންޏާ ހަވާލުވި އިރު ކުންފުނީގެ 85 ޕަސެންޓު އާމްދަނީ އަކީ ސަރުކާރުން ހިންގާ މަޝްރޫއުތައް ކަމަށާއި އެކަން ބަދަލު ކުރުމަށްޓަކާއި މުހިއްމު މަސައްކަތްތަކެއް ކުރަން ނިންމާފައިވާ ކަމަށެވެ. އެކަން ކުރާނީ ޕްރައިވެޓް ސެކްޓަރުގެ ޕްރޮޖެކްޓްތައް ހިންގުމާއި ޓްރޭޑިން އާއި އާ ވިޔަފާރިތަކަށް ވަދެގެން ކަމަށް އޭނާ ވިދާޅުވި އެވެ.

މަހާޖައްރާފު ގްރައުންޑް ވުމުން ޕްރޮޖެކްޓްތައް ލަސްވެފައި

އެ ކުންފުނީގެ ޕްރޮޖެކްޓްް ޑިޕާޓްމެންޓްގެ ހެޑް އަހުމަދު ލަތީފު ވިދާޅުވީ، އެކުންފުންޏަށް ކޮންޓްރެކްޓް ކޮށްފައި އޮތް 192 މަޝްރޫއުއެއް އޮތް ކަމަށާއި އޭގެ ތެރެއިން ތިން މަޝްރޫއުއެއް މިދިޔަ ތިން މަހު ނިންމި ކަމަށެވެ.

އޭނާ ވިދާޅުވީ 123 މަޝްރޫއުއެއްގެ އަމަލީ މަސައްކަތް މިހާރު ކުރިއަށްގެންދާ އިރު 69 ޕްރޮޖެކްޓެއްގެ މަސައްކަތް އަދި ނުފަށާ ކަމަށެވެ.

"އަޅުގަނޑުމެން އަށް މަޝްރޫއުއެއް އަލުން ފަށައިފިން. އޭގެ ތެރޭގައި ހިމެނޭ ކުރީގެ މެނޭޖްމެންޓުން ސޮއިކޮށްފައި ހުރި ޕްރޮޖެކްޓްތައް ވެސް. އޭގެ އިތުރުން ހަތް މަޝްރޫއުއެއް މި ކުންފުންޏަށް ހޯދައިފިން. އެ ހަތް މަޝްރޫއުގެ ވެލިއުއަކީ ގާތްގަނޑަކަށް 360 މިލިއަން ރުފިޔާ،" އޭނާ ވިދާޅުވި އެވެ.

ލަތީފު ވިދާޅުވީ، އެ ކުންފުނިން އެންމެ ފުޅާ ދާއިރާއެއްގައި ކުރިއަށްގެންދަނީ ބިން ހިއްކުމުގެ މަޝްރޫއުތައް ކަމަށްވާ އިރު އެކުންފުނީގައި އެކަން ކުރުމަށް އޮންނަ މަހާޖައްރާފު ހަލާކުވެ، ބޭނުން ނުކުރާތާ އަހަރަކަށް ވުރެން ގިނަ ދުވަސްވެއްޖެ އެވެ.

އެމްޓީސީސީގެ ޕްރޮޖެކްޓެއްގެ މަސައްކަތް ކުރިއަށް ގެންދަނީ -- ފޮޓޯ: މިހާރު

އެމްޓީސީސީގެ ޕްރޮޖެކްޓެއްގެ މަސައްކަތް ކުރިއަށް ގެންދަނީ -- ފޮޓޯ: މިހާރު

"މީގެ ސަބަބުން ޑްރެޖިން ކެޕޭސިޓީ، މާނައަކީ ޑްރެޖިންއިން ލިބޭނެ ކަމަށް ބަލާ ރެވެނިއު މިވަނީ ގެއްލިގެން ގޮސްފައި. އަޅުގަނޑުމެންގެ ޕްރޮޖެކްޓްތަކުގެ ތިން ބައިކުޅަ އެއްބައި މި އަންނަނީ ޑްރެޖިން އިން. އެހެންމަ، މަހާޖައްރާފު [20 މަސް] ގްރައުންޑްވުމުން ލިބެންޖެހޭ ފައިދާ މިއޮތީ ގޮސްފައި،" އޭނާ ވިދާޅުވި އެވެ.

އެމްޓީސީސީގެ ސީއީއޯ ޒިޔާދު ވިދާޅުވީ، ކުންފުނީގެ ޑްރެޖިން މަސައްކަތްތައް އަވަސް ކުރުމަށް އިތުރު ބާޖަކާއި އެހެން މެޝިނަރީތައް ހޯދުމަށް ލޯނެއް ހަމަޖެއްސުމުގެ މަސައްކަތް ކުރަމުން އަންނަ ކަމަށެވެ.