ބީއެމްއެލްގެ މިދިޔަ އަހަރުގެ ފައިދާ 1.9 ބިލިއަނަށް އަރައިފި

މިދިޔަ އަހަރު ބޭންކް އޮފް މޯލްޑިވްސް (ބީއެމްއެލް) އަށް ސާފު ފައިދާގެ ގޮތުގައި 1.9 ބިލިއަން ރުފިޔާ ލިބިއްޖެ އެވެ.

އެ ބޭންކުގެ އޮޑިޓް ނުކުރާ މާލީ ރިޕޯޓުތަކުގައިވާ ގޮތުން މިދިޔަ އަހަރު އެ ކުންފުނީގެ ފައިދާ އޭގެ ކުރީ އަހަރަށް ވުރެ 17 ޕަސެންޓު އިތުރެވެ. ބީއެމްއެލް އަށް މިދިޔަ އަހަރު 4.4 ބިލިއަން ރުފިޔާގެ އާމްދަނީއެއް ލިބުނެވެ. އެއީ އޭގެ ކުރީ އަހަރަށް ވުރެ 400 ބިލިއަން ރުފިޔާ އިތުރު އަދަދެކެވެ. ބީއެމްއެލް އަށް 2022 ވަނަ އަހަރު ލިބުނީ 1.6 ބިލިއަން ރުފިޔާގެ ފައިދާ އެވެ. އެހެންވެ މިއީ 200 މިލިއަން ރުފިޔާގެ އިތުރުވުމެކެވެ.

މިދިޔަ އަހަރަކީ ބީއެމްއެލްގެ ތާރީހުގައި އެންމެ ބޮޑު ފައިދާއެއް ކުންފުންޏަށްވި އަހަރެވެ. މީގެ ކުރިން އެ ކުންފުންޏަށް އެންމެ ބޮޑު ފައިދާއެއް ލިބުނީ 2021 ވަނަ އަހަރު އެވެ. އެ އަހަރު އެ ކުންފުންޏަށް ފައިދާގެ ގޮތުގައި ލިބުނީ 1.7 ބިލިއަން ރުފިޔާ އެވެ. ކޮވިޑާ ގުޅިގެން 2020 ވަނަ އަހަރު އެ ކުންފުނީގެ ފައިދާ 325 އަށް އެރި އެވެ. ކުންފުނީގެ ފައިދާ 70 ޕަސެންޓަށް ދަށްވި ނަމަވެސް، ވޭތުވެދިޔަ ތިން އަހަރު އެ ކުންފުނިން ވަނީ ކޮވިޑްގެ ކުރީގެ ހާލަތަށް ވުރެ ވެސް ބޭންކްގެ މާލީ ހާލަތު ރަނގަޅުކޮށްފަ އެވެ.

މިދިޔަ އަހަރުގެ ފަހު ކުއާޓަރުގައި އެ ކުންފުންޏަށް 361 މިލިއަން ރުފިޔާގެ ފައިދާއެއްވި އެވެ. މިދިޔަ އަހަރު އެންމެ ބޮޑު ފައިދާއެއް ލިބުނީ ދެވަނަ ކުއާޓަރުގަ އެވެ. އެ ކުއާޓާގައި އެ ކުންފުންޏަށް 551 މިލިއަން ރުފިޔާގެ ފައިދާއެއްވި އެވެ.

މިދިޔަ އަހަރު އެ ކުންފުނިން ވަނީ ފަސް ބިލިއަން ރުފިޔާގެ އާ ލޯނު ދޫކޮށްފަ އެވެ. އެއާ އެކު މިހާތަނަށް ދޫކޮށްފައިވާ ލޯނުގެ އަަދަދު 19 ބިލިއަން ރުފިޔާއަށް ވަނީ އަރައިފަ އެވެ. އަދި ޑިޕޮސިޓްކޮށްފައިވާ އަދަދު 31 ބިލިއަން ރުފިޔާއަށް އަރަ އެވެ.

ރާއްޖޭގައި ހިންގާ އެންމެ ބޮޑު ބޭންކް، ބީއެމްއެލްގެ ރައުސުލްމާލުގެ އަގު 45 ބިލިއަން ރުފިޔާއަށް އަރަ އެވެ. އެ ބޭންކުން 340،000 ކަސްޓަމަރުން ހިދުމަތް ހޯދާ އިރު 85 މިލިއަންގެ އިންޓަނެޓް ޓްރާންސެކްޝަން ހިންގާފައިވެ އެވެ.