އަރަބި ބަސް ކިޔަވައިދޭން ސައުދީން 17،500 ފޮތް ހަދިޔާކޮށްފި

ރާއްޖޭގައި އަރަބި ބަސް ކިޔަވައިދޭން ސައުދީ އަރަބިއްޔާ އިން 17،500 ފޮތް މިއަދު ހަދިޔާކޮށްފި އެވެ.

އެޑިއުކޭޝަން މިނިސްޓްރީގައި ބޭއްވި ރަސްމިއްޔާތެއްގައި މިނިސްޓަރު ޑރ. އާއިޝަތު ޝިހާމާ އެ ފޮތްތައް ހަވާލުކޮށްދެއްވީ، އެ ގައުމުން ރާއްޖެ ކަނޑައަޅުއްވާފައި ހުންނަވާ ޑެޕިއުޓީ އެމްބެސެޑަރު މަޓްރެކް އަބްދުﷲ އަލްދޮސަރި އެވެ.

އެޑިއުކޭޝަން މިނިސްޓްރީން ބުނީ އެ ފޮތްތައް ބޭނުންކުރާނީ ގްރޭޑް 1-5ގެ ގްރޭޑުތަކުގައި ކިޔަވައި ދިނުމަށް ކަމަށެވެ. އެއީ ކޮންމެ ގްރޭޑަކަށް 3،500 ފޮތް ކަމަށް މިނިސްޓްރީން ބުންޏެވެ.

ސައުދީން ހަދިޔާކުރި ފޮތްތަކުގެ ތަފުސީލީ މައުލޫމާތުތައް ރެކޯޑު ކުރުމުގެ މަސައްކަތް ކުރަމުން އަންނަ ކަމަށާއި، އެ މަސައްކަތް ނިމުނުހާ އަވަހަކަށް ސްކޫލުތަކަށް ފޮނުވާނެ ކަމަށް ވެސް މިނިސްޓްރީން ބުންޏެވެ. ރާއްޖޭގައި އަރަބި ބަސް ފުޅާކުރަން ސައޫދީން އަންނަނީ ގިނަ އެހީތަކެއް ދެމުންނެވެ. އެގޮތުން މިދިޔަ އަހަރުގެ ތެރޭގައި ވެސް ރާއްޖެއަށް އެއް ލައްކަ އަރަބި ފޮތް ސައުދީން ހަދިޔާކޮށްފައި ވެ އެވެ. އަދި އަރަބި ކިޔަވައިދޭނެ 17 ޓީޗަރުން، ސައުދީން ވަނީ މިއަހަރުގެ ތެރޭގައި ރާއްޖެ ފޮނުވާފަ އެވެ.