ބީއެމްއެލްގެ އެހީގައި އިމާދުއްދީން ސްކޫލުގައި ތެރަޕީ ރޫމެއް

ބީއެމްއެލްގެ އެހީގައި އިމާދުއްދީން ސްކޫލުގައި ތެރަޕީ ރޫމެއް ގާއިމުކޮށްފި އެވެ.

މި ރޫމަކީ އެ ސްކޫލުގައި ކިޔަވާ ދަރިވަރުންގެ ތެރެއިން އުނގެނުމުގައި ހާއްސަ އެހީއަށް ބޭނުންވާ ދަރިވަރުންނަށް ހާއްސަކޮށް ތަރައްގީ ކުރި ތަނެކެވެ.

މި ތަން އެ ސްކޫލުގެ ޖުވެލް ސެންޓަރުގެ 130 އަށް ވުރެ ގިނަ ދަރިވަރުން ބޭނުން ކުރާނެ އެވެ.

މި ތަން ފަރުމާކޮށްފައިވަނީ އުނގެނުމުގައި ހާއްސަ އެހީއަށް ބޭނުންވާ ކުދިން އެ ކުދިންގެ ގާބިލްކަން އިތުރުކޮށް، ސްޕީޗް ތެރަޕީ އާއި އޮކިއުޕޭޝަނަލް ތެރަޕީވެސް ދިނުމަށް ހާއްސަ ބައެއް ހިމަނައިގެންނެވެ. އަދި މި ތަނުގައި ދަރިވަރުންނަށް "ސެންސަރީ އެކްޓިވިޓީސް އާއި ކައުންސިލިން" ހިދުމަތް ވެސް ހޯދޭނެ އެވެ.

މި ތަނަކީ މުޖުތަމައަށް އެހީވުމަށް ބޭންކުން ކުރާ އިންވެސްޓްމަންޓްގެ ދަށުން ތަރައްގީ ކުރި ތަނެކެވެ. ތައުލީމީ ދާއިރާ އަކީ ބެންކުން ހާއްސަ ސަމާލުކަމެއް ދެމުން އަންނަ ދާއިރާ އެކެވެ.

ބީއެލްއެލް އިން ވަނީ ފާއިތުވި ހަތަރު އަހަރު ރާއްޖޭގެ އެކި ހިސާބުތަކުގެ 40 ސްކޫލަކަށް ސްޕެޝަލް އެޑިއުކޭޝަން ނީޑް ކްލާސްތަކުގައި ކިޔަވަމުންދާ ދަރިވަރުންނަށް ކިޔެވުމަށް ބޭނުންވާ އާލާތްތައް ހަދިޔާކޮށްފަ އެވެ. އަދި ބޭންކުން ވަނީ އަތޮޅުތެރޭގެ ސްކޫލުތަކުގެ ކޮންޕިއުޓާ ލެބް ތަރައްގީކުރުމަށްވެސް އެހީތެރިކަން ފޯރުކޮށްދީފަ އެވެ.