މޮބައިލް އަދި އިންޓަނެޓް ބޭކިންގެ ސެކިއުރިޓީ ވަރުގަދަ ކުރުމަށް ބީއެމްއެލްގެ އާ ފީޗާއެއް

ބީއެމްއެލްގެ އިންޓަނެޓި ބޭންކިން އާއި މޮބައިލް ބޭންކިންގެ ސެކިއުރިޓީ އިތުރަށް ފުރިހަމަ ކުރުމުގެ ގޮތުން ޑިވައިސް މެނޭޖްމަންޓު ފީޗާއެއް ތައާރަފްކޮށްފި އެވެ.

މި ފީޗާ އަކީ އެކްޓިވް ސެޝަންތައް މޮނީޓާ ކޮށް އިންޓަނެޓް އަދި މޯބައިލް ބޭންކިން އަށް އެކްސެސް ވެފައިވާ ޑިވައިސްތަކުން ލޮގްއައުޓް ކުރެވޭ ފީޗާއެކެވެ. މި ފީޗާ މެދުވެރިކޮށް ކަސްޓަމަރުންނަށް އެކްޓިވް ސެޝަން ބަލައި، ބޭނުންވާ ވަކިވަކި އަދި ހުރިހާ ޑިވައިސްއަކުން ލޮގްއައުޓް ކުރެވޭނެ އެވެ. އަދި މި ފީޗާއިން ކަސްޓަމަރުންނަށް ފަސޭހައިން އެންމެ ފަހުން ލޮގިންވެފައިވާ ލޮކޭޝަނާއި ޑިވައިސް ބެލޭނެ އެވެ.

މިއީ ސްކޭމްތަކުން ރައްކާތެރިވުމަށް އެހީވެދޭނެ ފީޗާއެއް ކަމަށް ބީއެމްއެލްއިން ބުންޏެވެ.

ބީއެމްއެލްގެ ސީއީއޯ ކާލް ސްޓުމްކަ ވިދާޅުވީ ކަސްޓަމަރުންގެ ރައްކާތެރިކަމާއި ސެކިއުރިޓީ ކަށަވަރުކުރުމަށް އެ ބޭންކުން ކެނޑެނޭޅި މަސައްކަތްކުރާ ކަމަށެވެ.

"އަޅުގަނޑުމެންގެ ސިސްޓަމްތަކަށް މި ފަހުން ގެންނަމުންދާ ބަދަލާއި ތައާރަފް ކުރަމުންދާ މުހިންމު ފީޗާތަކަކީ ސެކިއުރިޓީ ކަށަވަރުކުރުމަށް ކުރާ މަސައްކަތްތަކެއް. އަދި މި ބަދަލުތަކާ އެކު ކަސްޓަމަރުންނަށް އަމިއްލައަށް ސްކޭމުން ރައްކާތެރިވުމަށް ފިޔަވަޅު އެޅުމަށް ފުރުސަތު ލިބޭނެ،" ސްޓުމްކަ ވިދާޅުވި އެވެ.

ބީއެމްއެލްއިން މުއާމަލާތް ކުރާ ކަސްޓަމަރުންގެ ސެކިއުރިޓީ ޔަގީންކޮށް، ސްކޭމްތަކުން ރައްކާތެރިކުރުމުގެ ގޮތުން ދާދި ފަހުން ވަނީ ކުއްލި ހާލަތްތަކުގައި އިންޓަނެޓް ބޭންކިން އަދި ކާޑުތަކުގެ ހިދުމަތް ކަސްޓަމަރަށް އަމިއްލައަށް ވަގުތުން މެދުކަނޑާލެވޭ 'ކިލް ސްވިޗް'އެއް ތައާރަފްކޮށްފަ އެވެ.

އަދި އިންޓަނެޓް ބޭންކިން އާއި މޮބައިލް ބޭންކިންގެ ލޮގިންއަށް ޓޫ ފެކްޓާ އޮތަންޓިކޭޝަން ވެސް ވަނީ ތައާރަފްކޮށްފަ އެވެ. އޭގެ އިތުރުން ލޮގިން ކުރަން މަސައްކަތް ކުރާ ކޮންމެ ފަހަރަކު ކަސްޓަމަރަށް އެލާޓުކޮށް ހުރިހާ ސްކޭން-ޓު-ޕޭ ޕޭމަންޓްތަކަށް އޯޓީޕީ ވެސް ވަނީ އިތުރުކޮށްފަ އެވެ.