އަކްރަމް ވިދާޅުވަނީ އޭސީސީން ކުރަނީ ސިޔާސީ ކުލަ ޖެހިފައިވާ ތުހުމަތެއް ކަމަށް

މާކްސް ބަދަލުކޮށްގެން ޝަރުތު ހަމަނުވާ ބައެއް މީހުންނަށް ވެސް ފްލެޓް ދީފައިވާ ކަމަށް އޭސީސީން ބުނުމުން އެކަން ދޮގުކުރައްވައި، އެއީ "ސިޔާސީ ކުލަ ޖެހިފައިވާ" ތުހުމަތެއް ކަމަށް ކުރީ ސަރުކާރުގެ ބިމާއި ފްލެޓްތަކުގެ ކޮމެޓީ ޗެއާމަން ކަން ކުރެއްވި އަކްރަމް ކަމާލުއްދީން މިރޭ ވިދާޅުވެއްޖެ އެވެ.

ކުރީގެ ސަރުކާރުގެ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން އެކްސްގައި ކުރެއްވި ޕޯސްޓެއްގައި ވިދާޅުވީ ފްލެޓަށް ޝަރުތު ހަމަވުމަށް، އެ މީހަކީ މާލޭގައި ވަޒީފާ އަދާކުރާ މީހަކަށް ވާން ނުޖެހޭ ކަމަށެވެ. ރަށެއްގައި ނުވަތަ ރިސޯޓެއްގައި ކޮންމެ ވަޒީފާއެއް އަދާކުރި ނަމަވެސް އެ ފަރާތުގެ އަނބިދަރިން މާލޭގައި ދިރިއުޅޭ ނަމަ ޝަރުތު ހަމަވާނެ ކަމަށް އޭނާ ވިދާޅުވި އެވެ.

އަކްރަމް އެގޮތަށް ވިދާޅުވި ނަމަވެސް، "ގެދޮރުވެރިޔާ" ސްކީމުގެ ދަށުން ފްލެޓް ދިނުމާ ބެހޭ އުސޫލުގައި، ފްލެޓް ހޯދުމަށް އެދޭ މީހުންގެ ޝަރުތުތަކުގެ ތެރޭގައި ވަރަށް ސާފުކޮށް ބުނެފައި އޮންނަނީ ފްލެޓަށް އެދޭ މީހާ ނުވަތަ މައި އެޕްލިކަންޓަކީ މެދުނުކެނޑި މާލޭގައި ދިރިއުޅޭތާ 15 އަހަރުވެފައިވާ މީހަކަށް ވާން ޖެހޭނެ ކަމަށެވެ.

އަކްރަމްގެ ޕޯސްޓުގައި އިތުރަށް ވިދާޅުވީ ޝަރުތު ހަމަނުވާ މީހަކަށް ގިނައިން ޕޮއިންޓް ދީގެން ޝަރުތު ހަމައެއް ނުކުރެވޭނެ ކަމަށެވެ.

"އޭސީސީން ކުރައްވާ ތުހުމަތުތަކަކީ ސިޔާސީ ކުލަޖެހިފައިވާ ތުހުމަތެއް. އެހެނީ އެކަން ރަނގަޅަށް ތަހުގީގު ނުކުރައްވާ އެހެން ހާމަކުރެއްވުމަކީ މި ދެންނެވި ސިޔާސީ ކުލަޖެހުން،" އަކްރަމް ވިދާޅުވި އެވެ.

"ސިސްޓަމް ސްކޯ އަކާ ވެރިފިކޭސަން ސްކޯއެއް ނީންނާނެ. ސިސްޓަމުން ދައްކަނީ އެޕްލިކަންޓް ނަގާފައިން އޮޕްޝަން. ވެރިފަޔާ ޑިސައިޑް ކުރަނީ ފޯމުގައި ދީފަ ހުރި މައުލޫމާތައް ބަލައި އޮޕްޝަން ނަގައިފައި އިނީ ރަނގަޅަށްތޯ. ރަނގަޅު ނޫން ނަމަ ފޯމުގެ މައުލޫމާތެއް ބަލައި ވެރިފަޔާ އޮޕްޝަން ޑިސައިޑް ކުރާނެ."

ގެދޮރުވެރިޔާ ސްކީމްގެ ދަށުން ފްލެޓު ދޫކުރުމުގެ މަސައްކަތް ވަގުތީ ގޮތުން ހުއްޓާލަން އޭސީސީން އެންގުމާ ގުޅިގެން މިނިވަން މުއައްސަސާތަކުގެ ކޮމިޓީއަށް އެ މެންބަރުން ހާޒިރުކޮށް ސުވާލުކުރުމުން، އެ ކޮމިޝަނުން ބުނީ ފްލެޓަށް ޝަރުތު ހަމަ ނުވާ ކަމަށް ގެދޮރުވެރިޔާ ޕޯޓަލް އިން ދެއްކި ނަމަވެސް، ސުޕަވައިޒް ކުރާ ފަރާތްތަކުން އެ ބަދަލުކޮށް ޝަރުތު ހަމަވާ ކަމަށް ކަނޑައަޅާފައިވާ ކަމަށެވެ.

އޭސީސީގެ ނައިބު ރައީސް އަބްދުއްސަލާމް ވިދާޅުވީ ހައުސިން މިނިސްޓްރީގެ ޕޯޓަލް އިން ފްލެޓަށް އެދި ހުށަހަޅާފައިވާ ހުރިހާ ލިޔެކިޔުންތަކެއް އެއްކުރުމަށް ފަހު އޮޓޯއިން މާކްސްތައް ޖެނެރޭޓްވާ ކަމަށެވެ. ނަމަވެސް މާކްސްތައް އެޕްރޫވް ކުރަން ހުންނަ ފަރާތްތައް ނުވަތަ އެޕްރޫވަލްގެ މައްޗަށް ސުޕަވައިޒް ކުރަން ހުންނަ ފަރާތްތަކުން މާކްސް ބަދަލުކޮށްފައި ހުރި ކަމަށް އޭނާ ވިދާޅުވި އެވެ.

މިސާލެއް ގޮތުން އޭނާ ވިދާޅުވީ ފޯމެއްގައި ދަރިއަކު ނެތް ކަމަށް ޖަހާފައި އޮއްވާ އަދި ޑީއެންއާރްގެ ޑޭޓާތަކުން ވެސް އެކަން އެނގޭއިރު އެޕްރޫވް ކުރަން ހުންނަ ފަރާތްތަކުން އޭނާގެ ދަރިއެއް ހުންނަ ކަމަށް ޖަހައި އިތުރަށް މާކްސް ދީފައި ހުރި ކަމަށެވެ.

އޭގެ އިތުރުން ބައެއް ފަރާތްތައް ޝަރުތު ހަމަވާ ކަމަށް ކަނޑައަޅާފައި ހުރި އިރު ލިޔެކިޔުންތަކުން އެއީ މާލޭގައި ދިރިއުޅޭ މީހެއް ނޫންކަން ވަރަށް ސާފުކޮށް ފެންނަން އޮންނަ ކަމަށް ސަލާމް ވިދާޅުވި އެވެ. އެފަދަ ފަރާތްތަކަށް ވެސް ޝަރުތު ހަމަވާ ކަމަށް ނިންމައި ފްލެޓު ވެސް ދީފައި ހުރި ކަމަށް އޭނާ ވިދާޅުވި އެވެ.

ދާއިމީ ލިސްތު ނެރުނު އިރު އެކަންކަން އިސްލާހު ކޮށްފައި ހުރިތޯ ތަހުގީގު ޓީމުން ބެލި ކަމަށް ސަލާމް ވިދާޅުވި އެވެ. ނަމަވެސް އެކަންކަން އިސްލާހު ކޮށްފައި ނުވާ ކަމަށާއި ފްލެޓު ދިނުން އޭސީސީން ހުއްޓުވީ އެހެންވެގެން ކަމަށް އޭނާ ވިދާޅުވި އެވެ.