ދުބާއީގެ ޕްރިންސެސް ލަތީފާގެ ހަޔާތަށް ނެޓްފްލިކްސް އިން ސީރީޒެއް ހަދަނީ

ދުބާއީގެ ވެރިޔާގެ ދަރިކަނބަލުން ޕްރިންސެސް ލަތީފާގެ ހަޔާތަށް ސީރީޒެއް ހެދުމުގެ މަސައްކަތް ނެޓްފްލިކްސް އިން ފަށައިފި އެވެ.

ނެޓްފްލިކްސް އަށް އެ ސީރީޒް ޕްރޮޑިއުސްކޮށްދެނީ އެ ޕްލެޓްފޯމުން ގެނެސްދިނުމަށް މިހާރު ތައްޔާރުވަމުން އަންނަ އެހެން ސީރީޒެއް ކަމަށްވާ "ދަ ވިންޓަ ޕެލެސް"ގެ އުފެއްދުންތެރިޔާ ލިންޑްސީ ޝަޕޭރޯ އެވެ.

ފިންލޭންޑްގެ ޕްރޮޑަކްޝަން ހައުސްއެއް ކަމަށްވާ "ޔެލޯ ފިލްމް އެންޑް ޓީވީ" އިން ގެނެސްދޭ މި ސީރީޒަށް ކިޔަނީ "ދަ އެކްސޭޕް" އެވެ. ރިޕޯޓްތައް ބުނި ގޮތުގައި، މި ސީރީޒްގައި ދައްކާނީ ޕްރިންސެސް ލަތީފާ އާއި ފިންލޭންޑަށް ނިސްބަތްވާ އޭނާގެ އެންމެ ގާތް އެކުވެރިޔާ ކަމަށްވާ ޓީނާ ޖުހައިނަންގެ ގުޅުމެވެ.

މި ސީރީޒްގެ ޕްރޮޑަކްޝަންގެ މަސައްކަތްތައް އަންނަ އަހަރު ފަހުކޮޅު ފަށާނެ ކަމަށް ރިޕޯޓްތައް ބުންޏެވެ.

ޕްރިންސެސް ލަތީފާ އަށް އާންމުންގެ ސަމާލުކަން ފުރަތަމަ ލިބުނީ ރަހުމަތްތެރިންތަކެއްގެ އެހީއާ އެކު، ފެބްރުއަރީ 2018 ގައި އޭނާ ދުބާއީން ފިލަން މަސައްކަތް ކުރެއްވުމުންނެވެ. ފިއްލަވައިގެން ވަޑައިގެން އިންޑިއާ ކަނޑުގައި ބޯޓެއްގައި ހުންނަވަނިކޮށް ކޮމާންޑޯ އިން ގޮސް ޕްރިންސަސް ލަތީފާ ވަނީ ހައްޔަރުކޮށްގެން ދުބާއީ އަށް އަނބުރާ ގެންގޮސްފަ އެވެ. އޭގެ ފަހުން އެކަމަނާ ހުންނަވަނީ ދުބާއީގަ އެވެ. ލަތީފާ ތުހުމަތުކުރައްވާ ގޮތުގައި އޭނާގެ ބައްޕަ ވަނީ ދުބާއީގައި އޭނާ ރަހީނުކޮށްފަ އެވެ. ނަމަވެސް، ޔުއޭއީން ބުނެފައި ވަނީ ލަތީފާ ހުންނެވީ އާއިލާގެ ރައްކާތެރިކަމުގެ ދަށުގައި ކަމަށެވެ.

ޕްރިންސަސް ލަތީފާގެ ބައްޕާފުޅު ޝެއިހް މުހައްމަދު ބިން ރާޝިދު އަލް މަހްތޫމް އަކީ ދުނިޔޭގައި އެންމެ މުއްސަނދި އެއް ލީޑަރެވެ. ދުބާއީގެ ވެރިޔާގެ އިތުރުން ޝެއިހް ރާޝިދަކީ ޔޫއޭއީގެ ނައިބު ރައީސް ވެސް މެ އެވެ.