ބެލޮންޑިއޯ އެވޯޑް އަށްވަނަ ފަހަރަށް މެސީ އަށް، ރޭންކުގެ ދެވަނަ ހާލަންޑަށް

ޕެރިސް (އޮކްޓޯބަރު 31) - "ފްރާންސް ފުޓްބޯލް" މަޖައްލާއިން ހޮވާ ދުނިޔޭގެ އެންމެ މޮޅު ކުޅުންތެރިޔާގެ އެވޯޑް، އަށްވަނަ ފަހަރަށް އާޖެންޓީނާގެ ކެޕްޓަން ލިއޮނެލް މެސީ ހޯދައިފި އެވެ.

ދުނިޔޭގެ ފުޓްބޯޅައިގައި ދޭ އެންމެ ޝަރަފުވެރި އިންޑަވިޖުއަލް އެވޯޑް، ބެލޮންޑިއޯ އަށް މެސީ އާ އެންމެ ގާތުން މިފަހަރު ވާދަކުރީ މެންޗެސްޓާ ސިޓީގެ ޒުވާން ފޯވާޑް އާލިން ހާލަންޑެވެ. ތިންވަނަ ހޯދީ ފްރާންސްގެ ކިލިޔަން އެމްބާޕޭ އެވެ.

މެސީ އަށް މޮޅު ކުޅުންތެރިޔާ ލިބުމަށް އެންމެ ބޮޑަށް މަގު ފަހީވީ މިދިޔަ އަހަރުގެ ވޯލްޑް ކަޕް އާޖެންޓީނާ އަށް ހޯދައި ދިނުމުގައި އޭނާ އަދާކުރި މުހިންމު ދައުރުގެ ސަބަބުންނެވެ. އެ މުބާރާތުގެ މޮޅު ކުޅުންެތެރިޔާ އަށް ހޮވުނު މެސީ ވަނީ، މިދިޔަ އަހަރުގެ ފްރާންސް ލީގު ޕީއެސްޖީ އަށް ހޯދައި ދިނުމުގައި ވެސް މުހިންމު ދައުރެއް އަދާކޮށްފަ އެވެ.

ސިޓީ އަށް މިދިޔަ އަހަރުގެ ފުޓްބޯޅައިގެ ބޮޑު ތިން މުބާރާތް ހޯދައި ދިނުމުގައި މުހިންމު ދައުރެއް އަދާކުރި ހާލަންޑަށް އެވޯޑް ނުލިބުމުން ބައެއް ފަރާތްތަކުން ވަނީ ސުވާލު އުފައްދައިފަ އެވެ. މިދިޔަ އަހަރު ޔޫއެފާ ޗެމްޕިއަންސް ލީގު ވެސް ސިޓީ އަށް ހޯދައިން ހާލަންޑް ވަނީ ޔޫރަޕްގެ މޮޅު ކުޅުންތެރިޔާގެ އެވޯޑް މިފަހަރު ހޯދައިފަ އެވެ.

އެންމެ މޮޅު އަންހެން ފުޓްބޯޅަ ކުޅުންތެރިޔާގެ އެވޯޑް ހޯދި ބާސެލޯނާގެ މިޑްފީލްޑަރު އައިޓާނާ ބޯންމާތީ އެވެ. އޭނާ ވަނީ މިދިޔަ ސީޒަންގެ ސްޕެއިންގެ އަންހެން ފުޓްބޯޅަ ލީގު އަދި ޔޫއެފާ އަންހެން ޗެމްޕިއަންސް ލީގު ބާސާ އަށް ހޯދައިދިނުމުގައި މުހިންމު ދައުރެއް އަދާކޮށްފަ އެވެ. އަދި މި އަހަރުގެ ވޯލްޑް ކަޕް ވެސް އޭނާގެ ހިއްސާ އަ އެކު ސްޕެއިން ހޯދި އެވެ.

އެންމެ މޮޅު ޒުވާން ކުޅުންތެރިޔާ އަށް ދޭ ކޮޕާ އެވޯޑް ހޯދީ ރެއާލް މެޑްރިޑްގެ އިންގްލެންޑްގެ މިޑްފީލްޑަރު ޖޫޑެ ބެލިންހަމް އެވެ.