ސްކައިރޮކްގެ އަލްބަމްގެ ދެވަނަ ލަވަ "ރޭވާ" ނެރެފި

ދިވެހި މިއުޒިކް ބޭންޑް ސްކައިރޮކްގެ ފުރަތަމަ އަލްބަމްގެ ދެވަނަ ލަވަ "ރޭވާ" އިއްޔެ ރިލީޒްކޮށްފި އެވެ.

މި ލަވައިގެ ވީޑިއޯ ވެސް މިހާރު ވަނީ ޔޫޓިއުބްގައި އާންމުކޮށްފަ އެވެ.

ސްކައިރޮކް އިން ބުނީ އެ ބޭންޑުގެ ފުރަތަމަ އަލްބަމް "ސަމުގާ" އަންނަ މަހު އެކެއްގައި ނެރެން ތައްޔާރުވަމުން އަންނަ ކަމަށެވެ. އަދި ކުރިއަށް އޮތް ދުވަސްތަކުގައި މި އަލްބަމްއާ ގުޅޭ އިތުރު ވާހަކަތައް ވެސް އާންމުކުރާނެ ކަމަށް އެ ބޭންޑުން ބުންޏެވެ.

މި އަލްބަމްގެ ފުރަތަމަ ލަވަ "ހޭވައްލާ ތައްޔާރު" ނެރުނީ މިދިޔަ މާޗު މަހުގަ އެވެ.

"ރޭވާ"ގެ ލިރިކްސް ލިޔެފައި ވަނީ އަބްދުﷲ އީސާފުޅާއި ސްކައިރޮކްގެ ވޯކަލިސްޓް އަބްދުﷲ ފަރުހާނެވެ. މި ލަވަ ކިޔާފައި ވަނީ ފައްފު އާއި އިންޝާ އަހުމަދެވެ. އަދި މި ލަވައިގެ ވީޑިއޯ ތައްޔާރުކުރީ މަދޮޝިޕުންނެވެ.

ސްކައިރޮކް އަކީ ހަ މެމްބަރުންގެ ބޭންޑެކެވެ. ފައްފު އާއި އިންޝާގެ އިތުރުން އެ ބޭންޑުގައި ދެން ހިމެނެނީ ޑްރަމަރު އަހުމަދު ފައިޒާން އާއި ގިޓަރިސްޓް ޒަޔާން ފައިސަލް އާއި ކީބޯޑިސްޓް ހުސެއިން ތައުފީގު އަދި ބޭސިސްޓް އިނާން އާދިލެވެ.

ޔޫޓިއުބްގެ އިތުރުން ސްޕޮޓިފައި އާއި އެހެން މިއުޒިކް ސްޓްރީމިން ޕްލެޓްފޯމްތަކުން މި ލަވަ މިހާރު އަޑުއަހާލެވޭނެ އެވެ.