ދައުލަތުގެ ހަރަދުގައި ބޯންމެރޯ ހަދަން ފަސް ކުއްޖަކަށް ފުރުސަތު ދީފި

މެދުކެނޑުމަކަށް ފަހު ދައުލަތުގެ ހަރަދުގައި ބޯންމެރޯ ޓްރާންސްޕްލާންޓް ހެދުމުގެ ފުރުސަތު މިއަދު ދީފި އެވެ.

ހެލްތު މިނިސްޓްރީން ބުނީ ޒަކާތު ފަންޑާއި އާސަންދަ އަދި އެންސްޕާގެ އެހީގައި ތެލެސީމިއާ ކުދިންގެ ބޯންމެރޯ ހަދާނީ އިންޑިއާގެ އެސްޓަ މެޑްސިޓީގައި ކަމަށެވެ.

މި ފަހަރު ޓްރާންސްޕްލާންޓް ހެދުމަށް 16 ކުއްޖަކު އިހުތިޔާރު ކުރި އެވެ. އެކަމަކު، އެސެސްމަންޓުތަކާއި ޓެސްޓުތައް ހެދުމަށް ފަހު އެ ފުރުސަތު ދިނީ މި ވަގުތަށް އެންމެ ބޭނުންވާ ފަސް ކުއްޖަކަށެވެ.

ފަރުވާ އަށް މި ހަފުތާގައި އެ ކުދިން ފުރުވާނެ ކަމަށް މިނިސްޓްރީން ބުންޏެވެ.

ޓްރާންސްޕްލާންޓަށް ފުރުސަތު ލިބުނު ކުދިންނަށް ސެޓްފިކެޓު ދިނުމަށް ބޭއްވި ރަސްމިއްޔާތުގައި ހެލްތު މިނިސްޓަރު އަހުމަދު ނަސީމް ވިދާޅުވީ، ތެލެސީމިއާ ކުދިންނަށް ވީހާ ވެސް ފަސޭހައިން ފަރުވާ އާއި ބޭސް ފޯރުކޮށްދިނުމަކީ ސަރުކާރުގެ އެއް އަމާޒު ކަމަށެވެ.

އެ އަމާޒަށް ވާސިލް ވުމަށް ގިނަ މަސައްކަތްތައް ކުރަން ނިންމާފައިވާ ކަމަށް އޭނާ ވިދާޅުވި އެވެ.

އޭގެ ތެރޭގައި ހުޅުމާލެ އިން ބިމެއް ހޯދައި މޯލްޑިވިއަން ބްލަޑް ސާވިސްގެ އާ އިމާރާތް ހެދުން ހިމެނޭ ކަމަށާއި އެ ސެންޓަރު ގާއިމް ކުރުމުން ތެލެސީމިއާ ކުދިންނަށް ދޭ ހިދުމަތްތައް އިތުރަށް ފުޅާކޮށް ޖާގައިގެ ދަތިކަން ހައްލެއް ލިބިގެންދާނެ ކަމަށް މިނިސްޓަރު ވިދާޅުވި އެވެ.

ނަސީމް ވިދާޅުވީ ނޭޝަނަލް ބްލަޑް ބޭންކުގެ ހިދުމަތް ވެސް އެ ތަނަށް ބަދަލުކުރާނެ ކަމަށެވެ.

ބޯންމެރޯ ޓްރާންސްޕްލާންޓް ހިދުމަތަށް ހާއްސަ އިސްކަމެއް ދީ، ފަރުވާގެ ކަންކަން ކާމިޔާބުކަމާއެކު ކުރިއަށްގެންދިއުމަށް އެކި ގައުމުތަކުން އެ ހިދުމަތްދޭ ގޮތް ބަލައި، ދިރާސާކޮށްފައިވާ ކަމަށާއި އެކަމުގެ އަލީގައި މި ފަހަރު ބޯންމެރޯ ހަދާ ކުދިންގެ ފަރުވާ ކާމިޔާބުކަމާއެކު ނިންމާލެވޭނެ ކަމަށް އުއްމީދުކުރާ ކަމަށް މިނިސްޓަރު ވިދާޅުވި އެވެ.

ރާއްޖޭގައި މި ވަގުތު ވެސް ތެލެސީމިއާގެ 650 ކުދިން އެބަތިއްބެވެ.

ޒަކާތު ފަންޑުން މީގެ ކުރިން ބޯންމެރޯ ހަދަން ކުދިން ފޮނުވި އެވެ. މި އަހަރު އެ ފުރުސަތު ދީފައިވަނީ ހަތަރު އަހަރުގެ މެދުކެނޑުމަކަށްފަހުގަ އެވެ.