އާދަޔާހިލާފަށް އުދަ އަރާތީ މާލެއާއި ހުޅުމާލެ ދެމެދު ސައިކަލުގައި ދަތުރުނުކުރަން އެދިއްޖެ

ބްރިޖުން އަރާ ފައިބާ ސަރަހައްދުތައް ހިމެނޭހެން، އާދަޔާ ހިލާފަށް ބޮޑަށް އުދަ އަރަމުން ދާތީ މާލެއާއި ހުޅުމާލެއާ ދެމެދު ސައިކަލުގައި ދަތުރުނުކުރުމަށް ފުލުހުން އެދިއްޖެ އެވެ.

ފުލުހުން އެދިފައިވަނީ އުދަ އެރުން ހުއްޓެން ދެން ކޮންމެހެން ކުރަން ޖެހޭ ދަތުރެއް މެނުވީ ނުކުރުމަށާއި ޒަރޫރީ ދަތުރެއް ނަމަވެސް ހަތަރު ފުރޮޅުލީ އުޅަނދުގައި ކުރުމަށެވެ.

އުދައިގެ އަސަރު އެންމެ ބޮޑަށް ކޮށްފައިވާ ހިސާބުތަކުގެ ތެރޭގައި ލޮނުޒިޔާރަތްކޮޅުން ބްރިޖުން އަރާ ހިސާބު ހިމެނެ އެވެ.

މެންދުރު ފަހު އާންމު ވީޑިއޯއެއްގައި ފެންނަ ގޮތުގައި އެ ސަރަހައްދަށް އެރި ބިޔަ ބޮޑު ރާޅާއެކު ބްރިޖުން ފޭބި އުޅަނދުތައް ވެސް ރާޅާއެކު ކަހާލައިގެން ބިން މައްޗަށް ވެއްޓެ އެވެ. އަދި އެ ސަރަހައްދުގައި ޓްރެފިކް ބަލަހައްޓަން ހުރި ފުލުސް މީހާ ވެސް ރާޅުގެ ތެރެއަށް ދަމައިގަނެ އެވެ.

ބްރިޖުން ހުޅުލެއަށް ފައިބާ ސަރަހައްދަށް ވެސް އުދަ އަރައި، ދަތުރުކުރި ބައެއް މީހުންނަށް އަނިޔާ ވެފައިވެ އެވެ.

ބްރިޖު ސަރަހައްދުގެ އިތުރުން ދެން އެންމެ ބޮޑަށް އުދަ އަރާފައިވަނީ ރާޅުގަނޑު ސަރަހައްދަށެވެ. އެ ސަރަހައްދަށް ވެސް އުދައާއެކު ގިނަ އަދަދެއްގެ ގާ ވަނީ އެއް ގަމަށް ޖަމާވެފަ އެވެ.

މާލެއަށް އަދަޔާ ހިލާފަށް އުދަ އަރާފައިވާއިރު މެންދުރު ފަހު ރާޅުގެ އުސްމިން ހުރީ 0.94 މީޓަރުގަ އެވެ.

މޫސުމާ ބެހޭ ގައުމީ އިދާރާއިން ވަނީ ކ. އަތޮޅުން ފެށިގެން އައްޑޫއަށް ހުދު ސަމާލު ނެރެ، އުދަ އަރާނެ ކަމަށް ލަފާކޮށްފަ އެވެ.