ބަންދުގެ މުއްދަތު ހަމަވުމުން މަންޑޭ ދޫކޮށްލައިފި

ހުޅުމާލޭގައި ހަދަމުންދާ ކޭ ޕާކް ފްލެޓްތަކުގެ މައްސަލާގައި ފުލުހުން ޖިނާއީ ތަހުގީގު ހިންގަމުންދާ ހަސަން މަމްދޫހު (މަންޑޭ) ގެ ބަންދުގެ 15 ދުވަސް ހަމަވުމުން އިއްޔެ އޭނާ ދޫކޮށްލައިފި އެވެ.

ފުލުހުން މިއަދު ބުނީ މަންޑޭގެ ބަންދުގެ މުއްދަތު ހަމަވުމުން ޝަރުތުކޮށް ހުޅުމާލެ މެޖިސްޓްރޭޓް ކޯޓުން އޭނާ އިއްޔެ ދޫކޮށްލާފައިވާ ކަމަށެވެ.

ފިލަން މަސައްކަތް ކުރާ ކަމުގެ ތުހުމަތުގައި، ހުޅުމާލޭ މެޖިސްޓްރޭޓް ކޯޓުގެ އަމުރެއްގެ ދަށުން މަންޑޭ ހައްޔަރުކޮށް، އޭނާ ބަންދުކުރީ މި މަހުގެ ހައެއްގަ އެވެ.

މަންޑޭ ހައްޔަރުކުރަން ހުޅުމާލޭ ކޯޓުން އަމުރެއް ނެރުނީ އޭނާ ފުރުން މަނާކޮށް، ޕާސްޕޯޓް ހިފަހައްޓަން ކްރިމިނަލް ކޯޓުން އޭރު ނެރުނު އަމުރު ބާތިލްކުރުމާ އެކުގަ އެވެ. މަންޑޭގެ ޕާސްޕޯޓް ދޫކޮށްލަން ކްރިމިނަލް ކޯޓުން ނެރުނު އަމުރު ދައުލަތުން ވަނީ ހައި ކޯޓުގައި އިސްތިއުނާފު ވެސް ކޮށްފަ އެވެ.

މަންޑޭގެ މައްޗަށް ޖިނާއީ ތަހުގީގު ހިންގަން ފެށީ ހަންބޯ ކުންފުންޏަށް ނޭނގި ފްލެޓް ވިއްކި ކަމަށް ބުނެ އެ ކުންފުނީގެ މައި ހިއްސާދާރު އެ މައްސަލަ ފުލުހުންނަށް ހުށަހެޅުމުންނެވެ.