އެސްޓީއޯއަށް މުޅި އަހަރު ލިބުނު ފައިދާ އާއި ފަހު ކުއާޓަރުގެ ފައިދާ ވެސް ދަށަށް!

އެސްޓީއޯއަށް މިދިޔަ އަހަރު ލިބުނު ސާފު ފައިދާ އާއި ފަހު ކުއާޓަރުގެ ފައިދާ އޭގެ ކުރީ އަހަރާ އަޅާ ބަލާއިރު ވެސް ވަރަށް ބޮޑަށް ދަށަށް ހިނގައްޖެ އެވެ.

ސަރުކާރާއި ރައްޔިތުން ހިއްސާވާ އެންމެ ބޮޑު ވިޔަފާރި ކުންފުނީގެ ތަފާސްހިސާބުތައް ދައްކާ ގޮތުން މިދިޔަ އަހަރުގެ ފަހު ކުއާޓަރުގައި ސާފު ފައިދާގެ ގޮތުގައި ލިބިފައި ވަނީ 53.1 މިލިއަން ރުފިޔާ އެވެ. މިދިޔަ 2015 ވަނަ އަހަރުގެ އެ ކުއާޓަރުގައި ލިބިފައި ވަނީ 134 މިލިއަން ރުފިޔާ އެވެ.

މިދިޔަ އަހަރު ނިމުނުއިރު އެސްޓީއޯ އަށް ސާފު ފައިދާގެ ގޮތުގައި ލިބިފައި ވަނީ 301.4 މިލިއަން ރުފިޔާ އެވެ. މިއީ 2015 ވަނަ އަހަރާ އަޅާބަލާއިރު 85 މިލިއަން ރުފިޔާ ދަށް އަދަދެކެވެ.

އެސްޓީއޯގެ ތަފާސްހިސާބުތައް ދައްކާ ގޮތުން މިދިޔަ ކުއާޓަރުގައި އާމްދަނީގެ ގޮތުގައި ލިބިފައި ވަނީ 1.7 ބިލިއަން ރުފިޔާ އެވެ. އަދި ވިޔަފާރިކުރުމަށް ކުރި ހަރަދަށް 1.5 ބިލިއަން ރުފިޔާ ހޭދަކުރުމުން ޖުމްލަ ފައިދާގެ ގޮތުގައި ލިބިފައި ވަނީ 219.4 މިލިއަން ރުފިޔާ އެވެ.

އެ ކުންފުނީގެ ފަހު ކުއާޓަރުގެ ތަފާސްހިސާބުތައް ދައްކާ ގޮތުން މިދިޔަ ކުއާޓަރުގައި ހިންގުމުގެ ހަރަދު 125 މިލިއަން ރުފިޔާ އަށް ކުޑަވި ނަމަވެސް ވިއްކުމަށާއި މާކެޓްކުރުމަށް 43.1 މިލިއަން ރުފިޔާ ހޭދަކުރުމުން ހިންގުމުގެ ފައިދާ ވަނީ 62.6 މިލިއަން ރުފިޔާ އަށް ދަށްވެފަ އެވެ.

އެސްޓީއޯގެ މިދިޔަ އަހަރުގެ ތިންވަނަ ކުއާޓަރުގައި ސާފު ފައިދާ ގޮތުގައި 56.4 މިލިއަން ރުފިޔާ ލިބުނުއިރު ހިއްސާއަކަށް ފައިދާގެ ގޮތުގައި 50.08ރ. ޖެހިފައިވެ އެވެ. ނަމަވެސް އެންމެ ފަހު ކުއާޓަރުގައި ހިއްސާއަކަށް ޖެހިފައި ވަނީ 47.16ރ. އެވެ.