ޔާމީނަށް އަވަހަށް އިންސާފު ލިބުމަކީ ކާމިޔާބު ފަސް އަހަރަކަށް މުހިންމު ކަމެއް: އަމީން

ކުރީގެ ރައީސް އަދި ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީނަށް އަވަހަށް އިންސާފު ލިބުމަކީ ކުރިއަށް އޮތް ފަސް އަހަރު ކާމިޔާބުކަމާ އެކު ކުރިއަށް ދިއުމަށް ވަރަށް މުހިންމު ކަމެއް ކަމަށް ޖޭޕީގެ ލީޑަރު ގާސިމް އިބްރާހިމްގެ ތަރުޖަމާން އަބްދުﷲ އަމީން ރޭ ވިދާޅުވެއްޖެ އެވެ.

އޭނާ އެހެން ވިދާޅުވީ، މި އަހަރުގެ ރިޔާސީ އިންތިހާބަށް ނުކުންނަވާ ޖޭޕީގެ ކެންޑިޑޭޓް ގާސިމްގެ ކެމްޕެއިން ހަރަކާތެއްގައި ވާހަކަ ދައްކަވަމުންނެވެ.

"އަޅުގަނޑު ގަބޫލުކުރާ ގޮތުގައި ޕީޕީއެމްގެ ރިޔާސީ ކެންޑިޑޭޓަށް އަވަހަށް އިންސާފު ލިބުމަކީ ރާއްޖޭގެ ސިޔާސީ މަސްރަހު ރަނގަޅަށް ތަރުތީބު ވުމަށް އަދި ކުރިއަށް އޮތް ފަސް އަހަރަކީ ދިވެހިންނަށް ކާމިޔާބު ފަސް އަހަރަކަށް ވުމަށްޓަކައި ވަރަށް މުހިންމު ކަމެއް،" ސަލްޓަން ޕާކްގައި ބޭއްވި ހަރަކާތުގައި ކުރީގެ ހެލްތު މިނިސްޓަރު އަމީން ވިދާޅުވި އެވެ.

"އެހެންވީމާ އެކަމުގެ ޒިންމާދާރު ފަރާތްތަކުން އަވަސް މިނެއްގައި ޕީޕީއެމްގެ ރިޔާސީ ކެންޑިޑޭޓަށް އިންސާފު ހޯދައި ދިނުން، ގޮތެއް ހޯދައި ދިނުމަކީ މުހިންމު ކަމެއް ކަމުގައި އަޅުގަނޑު ދެކެން."

މިދިޔަ އަހަރުގެ ޑިސެމްބަރު 25 އިން ފެށިގެން ޔާމީން ޖަލަށް ލާފައި ވަނީ ވ. އާރަށް ކުއްޔަށް ދިނުމުގެ މުއާމަލާތުގައި ރިޝްވަތު ދިނުމާއި އެ ފައިސާ ގަބޫލުކުރުމާއި ފައިސާ ލޯންޑާކުރި ކަމުގެ ކުށުގެ ދައުވާ ސާބިތުވުމުންނެވެ. އެ މައްސަލައިގެ އިސްތިއުނާފު މަރުހަލާގެ ދެ ޝަރީއަތެއް މިހާތަނަށް ހައި ކޯޓުގައި ބާއްވާފައިވާއިރު، ޔާމީން ވެސް އިއްޔެގެ ޝަރީއަތުގައި ވަނީ އަވަސް އަވަހަށް އަދި ވަގުތު ދިގުކޮށް އަޑުއެހުން ބާއްވައިދޭން ކޯޓަށް އިލްތިމާސް ކުރައްވައިފަ އެވެ.

އެ މަނިކުފާނު ވިދާޅުވީ "ތަންކޮޅެއް ވަގުތު ދިގުކޮށް ތަންކޮޅެއް ފްރިކުއެންޓުކޮށް، އަވަސްއަވަހަށް ގެންގޮސްދެއްވައިފިއްޔާ ޝުކުރުވެރިވާނަން" ކަމަށެވެ.

ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް ކުރިމަތިލާން އަންނަ ޖުލައި މަހުގެ 23 ގައި އިލެކްޝަންސް ކޮމިޝަނުން ހުޅުވައިލާނެ އެވެ. އިންތިހާބަށް ކުރިމަތިލުމުގެ ފަހު ދުވަހަކީ އޮގަސްޓް 3 އެވެ. އެހެންވެ، އެ އިންތިހާބުން މިހާރު ފުރުސަތު ގެއްލިިފައިވާ ޔާމީނަށް ކިރިޔާ ވެސް އުންމީދެއް އޮތީ ހައި ކޯޓުގެ އިސްތިއުނާފު މަރުހަލާ އިން ކަމަށް ޕީޕީއެމްގެ ގިނަ ބަޔަކު ދެކެ އެވެ.

އާރަށް މައްސަލައިގެ އިސްތިއުނާފު ހައި ކޯޓުގައި ފެށި ނަމަވެސް ރ. ފުއްގިރި ކުއްޔަށް ދޫކުރުމުގެ މުއާމަލާތްތަކުގައި ރިޝްވަތު ނަގައި އެ ފައިސާ ލޯންޑާކުރި ކަމަށް ބުނެ ޔާމީންގެ މައްޗަށް އުފުލާފައިވާ ދައުވާގެ ޝަރީއަތްތައް ކްރިމިނަލް ކޯޓުން އަދި ނުނިމެ އެވެ. އެކަމަކު، އެ ޝަރީއަތުގެ އަޑުއެހުންތައް ކުރިއަށް ގެންދަނީ ވަރަށް ގާތްގާތުގައި ކަމަށް ބުނެ އެ ކަމުގެ ކަންބޮޑުވުން ޔާމީންގެ ސަޕޯޓަރުން ވަނީ ކޮށްފަ އެވެ.

ގާސިމްގެ ކެމްޕެއިން ޖަލްސާގައި އަމީން ރޭ ވިދާޅުވީ، އެހެން ސިޔާސީ ޕާޓީތަކާ އެކު މަސައްކަތް ކުރެވޭނެ ފޯމިއުލާއެއް ޖޭޕީ އަށް ނެރެވޭނެ ކަމަށެވެ. މިދިޔަ ތިން އަހަރަށް ބަލާއިރު ވެސް އެ ފޯމިއުލާ ނެރެދެއްވީ ގާސިމް ކަމަށް އަމީން ވިދާޅުވި އެވެ.

"އެހެންވީމާ އެ މަނިކުފާނު ހުންނަވާ ފަޅިއެއްގައި އެ ފޯމިއުލާ އޮންނާނެ ކަމާ ދޭތެރޭގައި އަޅުގަނޑު ޝައްކެއް ނުކުރަން. އެ މަނިކުފާނު ވެސް ވާދަކުރައްވަނީ އަދި ސަރުކާރާ އިދިކޮޅު ފަރާތްތަކުން ވެސް ވާދަކުރަނީ އެމްޑީޕީއާ. ގަބޫލު ކުރަންޖެހޭ ހަގީގަތަކީ އެމްޑީޕީ އަށް ލިބުނު ކޮންމެ ކާމިޔާބީއެއްގެ މުގުލުގައި ހުންނެވި ބޭފުޅަކީ، އެ ޕާޓީ އަށް މަގުފަހި ކޮށްދެއްވި ހަގީގީ ބޭފުޅަކީ އޮނަރަބްލް ގާސިމް އިބްރާހިމް،" އެމްޑީޕީ އާއި ގާސިމާ އޮތް ގުޅުމާ ގުޅޭ ގޮތުން އަމީން ވިދާޅުވި އެވެ.

އޭނާ ވިދާޅުވިގޮތުގައި، އިންތިހާބު ކާމިޔާބު ކޮށްދިނުން ކަމަށް ވިޔަސް އެމްޑީޕީގެ އެތެރޭގެ މައްސަލަތައް ހައްލު ކޮށްދިނުން ކަމަށް ވިޔަސް އަދި އެ ޕާޓީގެ ހަރަކާތްތަކަށް ދިރުން ދިނުން ކަމަށް ވިޔަސް އޭގެ ފަހަތުގައި ހުންނެވީ ގާސިމެވެ.

"އެހެންވީމާ އޮނަރަބްލް ގާސިމް އިބްރާހިމް ނެތި އެމްޑީޕީ އަށް ކާމިޔާބު ކުރުމަކީ ފަސޭހަ ކަމަކަށް ނުވާނެ. އެހެންވީމާ އެމްޑީޕީ އަށް އޮތް އުންމީދު އަޅުގަނޑު ދަންނަވާނީ މި ފަހަރު ކުރީ ފަހަރުއާއެއް ނޫނޭ. އޮނަރަބްލް ގާސިމް އިބްރާހިމް ހުންނަވާ ފަޅިއަކީ އަބަދުވެސް ރިޔާސީ އިންތިހާބު ކާމިޔާބުކުރާ ފަޅި،" އަމީން ވިދާޅުވި އެވެ.

"މި ފަހަރު ހުދު އެ މަނިކުފާނު ނުކުމެވަޑައިގެން މި ހުންނެވީ އިންތިހާބަށް ކުރިމަތިލައްވައިގެން. ސިޔާސީ މަސްރަހު އިރާދަކުރެއްވިއްޔާ ތަރުތީބު ވެގެންދާ ދިއުމުގެ ނިމުމަކަށް ވާނީ އޮނަރަބްލް ގާސިމް އިބްރާހިމް ރިޔާސީ އިންތިހާބު ކާމިޔާބު ކުރެއްވުން."

އަމީން ރޭ ވިދާޅުވީ، ގާސިމްގެ މި ފަހަރުގެ މެނިފެސްޓޯ ވަރަށް އަވަހަށް އާންމު ކުރައްވާނެ ކަމަށާއި ހާސްކަން ފިލާވަރުގެ ކަންކަން އެ އިން ފެންނާނެ ކަމަށެވެ. މެނިފެސްޓޯގައި ހިމެނޭނެ ކަންކަމުގެ އަލީގައި އޭނާ ވިދާޅުވީ "އަތްލެވޭ ތަރައްގީ" ރާއްޖެ އަށް ގެނެސް ދެއްވާނީ ގާސިމް ކަމަށެވެ.

"މިސާލަކަށް ދަންނަވާ ކަމަށް ވާ ނަމަ ހުވަދުއަތޮޅަކީ ރާއްޖޭގައި އެންމެ ބިން ބޮޑު އަތޮޅު. ރާއްޖޭގައި އެންމެ ބޮޑު އަތޮޅު. އާބާދީގެ ގޮތުން އެންމެ ބޮޑު އަތޮޅެއް. ފަތުރުވެރިކަމުގެ އުންމީދު އޮތް އަތޮޅެއް. ވަޒީފާގެ ބާޒާރެއް އުފެއްދޭނެ އަތޮޅެއް. އެހެނަސް ބައްލަވާ، މިއަދު ހުވަދުއަތޮޅުގެ ކޮން ތަނަކުން ވަޒީފާއެއް ލިބެނީ؟ ކޮބައިތޯ ރިސޯޓެއް؟ ކޮބައިތޯ މަޝްރޫއެއް؟ ކޮބައިތޯ ބޮޑު ޕްރޮޖެކްޓެއް؟. ނެތް،" ގދ. ގައްދު އަށް އުފަން އަމީން ސުވާލު ކުރެއްވި އެވެ.

އެކަމަކު، އޭނާ ވިދާޅުވީ ގާސިމްގެ ވެރިކަމެއްގައި ހުވަދުއަތޮޅު ވާނީ ޓޫރިޒަމްގެ ވަރުގަދަ ހަބަކަށް ކަމަށެވެ. ދަތުރުފަތުރުގެ ވަރުގަދަ މަންޒިލަކަށެވެ. އޭރުން ވަޒީފާ އުފައްދާނެ އާ މަންޒިލަކަށް ހުވަދުއަތޮޅު ވާނެ ކަމަށް އަމީން ވިދާޅުވި އެވެ.

"... އުތުރަށް ބައްލަވާ. އުތުރުގެ ބޭފުޅަކު ވެސް ހަގީގަތުގައި ރަނގަޅު ވަޒީފާއެއް ހޯދަން ބޭނުން ނަމަ މިހާރު ވެސް އަންނަން މި ޖެހެނީ ފަތުރުވެރިކަން އޮތް މާލެ ސަރަހައްދަށް. ނުވަތަ އުތުރަށް ނުވަތަ ދެކުނުގެ ކޮންމެވެސް ހިސާބަކަށް. ގާސިމް އިބްރާހިމް ވިދާޅުވަނީ ރާއްޖޭގެ އުތުރަކީ ވަޒީފާގެ ވަރަށް ވަރުގަދަ ބާޒާރަކަށް ވެގެންދާނެއޭ،" އަމީން ވިދާޅުވި އެވެ.

"އެއީ މިހާތަނަށް އެތައް ބަޔަކު ވައުދުވެ، ހަގީގަތަށް ވެފައި ނެތް ޓްރާންޝިޕްމަންޓް ބަނދަރާއި ތަރައްގީގެ ހަގީގީ ކާމިޔާބީ ގާސިމްގެ ވެރިކަމެއްގައި އެ ހިސާބަށް ގެނެސް ދެއްވާނެތީ."